ރަންކޮކާލާ ބަރަވެލި ކަލެކްޝަންގެ ތެރެއިން ހަމްދާ!

ރަންކޮކާލާ ބަރަވެލި ކަލެކްޝަންގެ ތެރެއިން އައީ މޮޑެލްއެއް ހެއްޔެވެ؟ ނޫނީ ފަންނުވެރި މޮޅު ފެހުންތެރިއެއް ހެއްޔެވެ؟ އިލްމާއި ހިލްމީ ގާބިލުކަން ހުރި ޒުވާނުންގެ ތެރެއިން މި ޒުވާނާ ފާހަގަކުރެވެނީ އަމިއްލައަށް ހެދުންތައް ޑިޒައިންކޮށް، ހެދުންތައް ފަހައިގެން މޮޑެލް ވެސް ކުރާތީއެވެ. އެހެންކަމުން އޭނާ އަކީ މޮޑެލްއެކޭ ވެސް ފެހުންތެރިއެކޭ ވެސް ބުނުމުގެ ޖާގަ އެބައޮތެވެ. މި ޒުވާނާ އަކީ ހދ. މަކުނޫދޫ އަށް އުފަން ހަމްދާ އަބްދުﷲ އެވެ.

ހަމްދާ 2012 ވަނަ އަހަރު މާލެސިޓީއަށް ދިރިއުޅުން ބަދަލުކުރީ މަތީ ތައުލީމު ހާސިލު ކުރުމަށެވެ. މިހާރު ސައިކޮލޮޖީ ދާއިރާއިން މަތީ ތައުލީމު ހާސިލް ކުރަމުންދާއިރު، މުޅި ދުވަސް ހޭދަކުރަމުން ދަނީ ހެދުންތައް ފެހުމުގައެވެ. ތަފާތު އެކި ޑިޒައިންތަކުން ޚާއްސަކޮށް އަބާޔާ އަދި އަބާޔާ ސްޓްއިލްގެ ވެޑިން ޑްރެސް ވެސް މި ޒުވާނާ ފަހައެވެ. ތަފާތު ވައްތަރުގެ ހެދުންތައް ފަހަމުންދާއިރު، ގިނަ ބައެއްގެ ލޯބި ހަމްދާ މިހާރު ވަނީ ހޯދާފައެވެ.

ކުޑައިރުއްސުރެ ރީތި ހެދުން ލުމަށް ޝައުގުވެރިކަން ހުންނަ ހަމްދާ ފެހުމުގެ ދާއިރާއަށް ނުކުތީ 2018 ވަނަ އަހަރު މަޝްހޫރު ޑިޒައިނަރ ރަޒީނާ ތައުފީގު (ރަޒީ) ހިންގި ފަހާ ކޯހެއް ފުރިހަމަ ކުރުމަށް ފަހުގައެވެ. މި ކޯހަކީ ވަރަށް ފުރިހަމަ ކޯހެއްގެ ގޮތުގައި ހަމްދާ ސިފަކުރެއެވެ.

ހަމްދާ ކިޔާދިން ގޮތުގައި ފުރަތަމަ ފަހަން ފެށީ އަމިއްލަ ހެދުންތަކެވެ. ތަޖުރިބާއަކަށް ހެދުންތައް ލައިގެން ފޮޓޯ އިންސްޓަގްރާމް ކުރުމުން ބައެއް ރައްޓެހިންނަށް ކަމުދިޔަ ކަމަށާއި، ހެދުން ފަހައި ދިނުމަށް ރިކުއެސްޓް ކުރި ހިސާބުން ''ފާތިމާސް ވޯޑްރޯބް'' ވުޖޫދުވެގެން ދިޔައެވެ. ''ފާތިމާސް ވޯޑްރޯބް'' ނަންދީފައިވާ އިންސްޓަގްރާމް އޮންލައިން ޕޭޖުން ހެދުން ފެހުމަށް ފެށި ވިޔަފާރި މިހާރު ވަނީ ވަރަށް ބޮޑަށް ފުޅާވާން ފަށާފައެވެ.

ހެދުން ފެހުމަކީ ޝައުގުވެރިކަން ހުރި ކޮންމެ މީހަކަށް ވެސް ކުރެވިދާނެ ކަމެއް ކަމަށް ހަމްދާ ބުނެއެވެ. މި މަސައްކަތުން ރަނގަޅު އާމްދަނީއެއް ލިބޭއިރު، މިއީ ވަރަށް ބޮޑު ހިތްހަމަ ޖެހުމެއްގެ ގޮތުގައި ހަމްދާ ސިފަކުރިއެވެ.

ވިޔަފާރިއެއްގެ ގޮތުގައި ހަމްދާ މި މަސައްކަތްކުރާއިރު، ކަސްޓަމަރުން އެދޭ ގޮތަށް ހެދުން ފަހާދިނުމަށް ހަމްދާ ޚާއްސަ އިސްކަމެއްދެއެވެ. ކަސްޓަމަރަކު ނުރުހުންވި ނަމަވެސް އެމީހަކާ މައްސަލަ މަޝްވަރާ ކުރުމަށްފަހު ވަރަށް ރަނގަޅަށް ވާހަކަ ދައްކައިގެން ހައްލު ކުރެއެވެ.

ހަމްދާ މަސައްކަތްތައް މިހާރު އިޝްތިހާރު ކުރަމުންދަނީ ފޮޓޯތަކާއެކު ކުދިކުދި ވީޑިއޯ ކްލިޕްތަކުންނެވެ. މި ވީޑިއޯތަކުން ހަމްދާ ފެނިގެންދާއިރު، ކެމެރާކޮށް، އެޑިޓްކޮށް ސޯޝަލް މީޑިއާއަށް ދޫކޮށްލަނީ ހަމްދާގެ ފިރިމީހާއެވެ. ހަމްދާގެ ފިރިމީހާގެ އިތުރުން އާއިލާ މީހުންގެ ވަރަށް ބޮޑު އެއްބާރުލުމެއް ލިބޭކަން އޭނާ ފާހަގަކުރިއެވެ.

ކަނބުލޮ، ކަޅުދިރި، މަރިޔަމްމާ އަދި ހިންދޫރާ ފަދަ ނަންތަކުން ނަންދީގެން ކޮންމެ މަހަކު ވެސް އެކި ޑިޒައިންތަކުން ނެރެމުންދާ ހެދުންތަކަށް ގިނަ ބަޔަކު މިހާރު އިންތިޒާރު ކުރެއެވެ. ކުރިއަށް އޮތްތާނގައި ވެސް ރީތި ކަލެކްޝަންތަކެއް ނެރޭނެ ކަމަށް ހަމްދާ ބުނެއެވެ.

ހަމްދާ ނެރެމުންދާ ހެދުންތަކުގެ އިތުރުން ހެދުމުގެ ކަލެޝަންތަކަށް ދޭ ނަންތައް ވެސް ވަރަށް ތަފާތެވެ. މިނަންތަކާ ބެހޭ ގޮތުން ހަމްދާ ބުނެފައިވަނީ އަބަދުވެސް ނަން ދިނުމުގައި ދިވެހިވަންތަ ނަންތައް ދިނުމަށް ޚާއްސަ ސަމާލުކަމެއްދޭ ކަމަށެވެ.

ކުޑައިރުއްސުރެ ރީތި ހެދުންލުމަށް ޝައުގުވެރިކަން އުފެދުނު ހަމްދާ މިއަދު އޭނަގެ ހުވަފެން ހަގީގަތަކަށް މިވަނީ ހަދާފައެވެ. ފަހަން ދޭ ފޮތިގަނޑު ބޭނުންވާ ގޮތަށް ނުފެހިގެން އެކަމާ ހިތްހަމަ ނުޖެހިގެން މިއަދު ހަމްދާ އުޅޭކަށް ނުޖެހެއެވެ.

މި ވިޔަފާރި ފުޅާކޮށް ''ފާތިމާސް ވޯޑްރޯބް'' ރާއްޖޭގެ ބްރޭންޑަކަށް ހެދުމަކީ ހަމްދާގެ އަމާޒެކެވެ. އަދި އޭނާ ދެކެމުން އަންނަ ހުވަފެނެކެވެ.