ކުޑަރިކިލު ފުޓްސަލް ދަނޑުގެ މަސައްކަތް ނިންމާލައިފި
13 އޯގަސްޓު 2020 | ބުރާސްފަތި 09:40މި ދަނޑުގެ މަސައްކަތް ކޮށްފައިވަނީ ހެއިޓްސް ކޮމްޕެނީ ޕްރައިވެޓް ލިމިޓެޑުން
ބ. ކުޑަރިކިލުގައި ކުޅިވަރާ ބެހޭ ވުޒާރާގެ ފަރާތުން އެޅި ފުޓްސަލް ދަނޑު
ބ. ކުޑަރިކިލުގައި ކުޅިވަރާ ބެހޭ ވުޒާރާގެ ފަރާތުން އެޅި ފުޓްސަލް ދަނޑުގެ މަސައްކަތް ނިންމާލައިފިއެވެ.
މި ދަނޑުގެ މަސައްކަތް ކުރިއަށް ގެންގޮސްފައިވަނީ ކުޑަރިކިލު ކައުންސިލްގެ ފަރާތުން އިއުލާން ކޮށްގެންނެވެ. އެގޮތުން ކައުންސިލްގެ ފަރާތުން ހެއިޓްސް ކޮމްޕެނީ ޕްރައިވެޓް ލިމިޓެޑާ ދަނޑުގެ މަސައްކަތް ހަވާލުކުރިއިރު، މި ދަނޑުގެ މަސައްކަތަށް ގާތްގަނޑަކަށް 1.23 މިލިޔަން ރުފިޔާ ޚަރަދުވި ކަމަށް ކުޅިވަރާ ބެހޭ ވުޒާރާއިން މައުލޫމާތުދެއެވެ.
ކުޑަރިކިލުގައި އެޅި ފުޓްސަލް ދަނޑުގައި ވަނީ ރޭގަނޑު ކުޅެވޭ ގޮތަށް ލައިޓުވެސް ހަރުކޮށްފައެވެ.
މި ދަނޑުގެ މަސައްކަތް ނިމިފައިވާކަން ހާމަކުރައްވަމުން ކުޅިވަރާ ބެހޭ ވަޒީރު އަޙްމަދު މަޙްލޫފް ކުރެއްވި ޓްވީޓެއްގައި ވިދާޅުވީ ދަނޑުގެ މަސައްކަތްތައް ނިންމާލާފައިވަނީ ކުޑަރިކިލު ޒުވާނުން އެދުނު ގޮތަށް ކަމަށެވެ. ހަމައެހެންމެ މި ދަނޑަކީ ދެ ޖިންސްގެ ޒުވާނުން ވެސް ބޭނުންކުރާނެ ތަނެއް ކަމަށް އުންމީދު ކުރައްވާ ކަމަށާއި، މި ދަނޑުގެ މަސައްކަތް ނިންމާލުމަށް ކުޑަރިކިލު ކައުންސިލާއި ޒުވާނުން ދެއްވި އެހީތެރިކަމަށް ޝުކުރު އަދާކުރައްވާ ކަމަށްވެސް ވިދާޅުވިއެވެ.
ކުޑަރިކިލު ފުޓްސަލް ދަނޑުގެ މަސައްކަތް ނިންމާލިއިރު، ކުޅިވަރާ ބެހޭ ވުޒާރާގެ ފަރާތުން ރާއްޖޭގެ އެކި ކަންކޮޅުތަކުގައި މިހާރު ކުރިއަށްގެންދާ ގިނަ މަޝްރޫއުތައް ވަނީ ނިމުމަކާ ހަމަޔަށް އައިސްފައެވެ. އެގޮތުން ގިނަ ރަށްތަކެއްގައި އެޅު ފުޓްސަލް ދަނޑުގެ މަސައްކަތްތައް ނިންމާލާފައިވާއިރު، ކުރިއަށް އޮތް ދުވަސްތަކުގައި ވެސް ގިނަ މަޝްރޫއުތަކެއް ނިމިގެންދާނެ ކަމަށް އެ ވުޒާރާއިން މައުލޫމާތުދެއެވެ.
