މަރުވި ފަހުން އައިސޮލޭޝަނަށް ގެންދިއުމަށް ގުޅުނު މައްސަލާގައި އާއިލާގެ ކިބައިން މައާފަށް އެދިއްޖެ
13 އޯގަސްޓު 2020 | ބުރާސްފަތި 03:09އެމީހާ މަރުވެ ބައިގަޑިއިރު ފަހުން އައިސޮލޭޝަނަށް ގެންދިއުމަށް ގުޅާފައިވޭ
ނޫސްވެރިންގެ ބައްދަލުވުމުގައި އެޗްއީއޯސީގެ ތަރުޖަމާނު ޑރ.ނަޒްލާ ރަފީގު ވާހަކަދައްކަވަނީ
ކޮވިޑް-19 ގައި މަރުވި ފަހުން އައިސޮލޭޝަންއަށް ގެންދިއުމަށް ގުޅި މައްސަލާގައި އާއިލާގެ ކިބައިން، ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ން މައާފަށް އެދިއްޖެއެވެ.
އަންގާރަ ދުވަހު މަރުވެފައި ވަނީ އުމުރުން 67 އަހަރުގެ މީހެކެވެ. އޭނާއަކީ އަންގާރަ ދުވަހު އައިޖީއެމްއެޗަށް ގެންގޮސް އެމަޖެންސީގައި ފަރުވާ ދެމުންދަނިކޮށެވެ.
ބުދަ ދުވަހުގެ ރޭ އެޗްއީއޯސީގައި ބޭއްވި ނޫސްވެރިންގެ ބައްދަލުވުމުގައި އެ ސެންޓަރުގެ ތަރުޖަމާނު ޑރ. ނަޒްލާ ރަފީގު ވިދާޅުވީ 67 އަހަރުގެ އެ މީހާ މަރުވެ ބައިގަޑިއިރު ފަހުން އައިސޮލޭޝަނަށް ގެންދިއުމަށް ގުޅުނު ކަމަށެވެ.
އެގޮތަށް އެކަން ދިމާވީ އުމުރުން ދުވަސްވީ މީހުން އައިސޮލޭޓްކުރަން އިސްކަންދޭ ލިސްޓަށް ބަލައިގެން މަސައްކަތް ކުރުމުން ކަމަށާއި، ޕޭޝަންޓް އޮތީ އެވަގުތު އައިޖީއެމްއެޗްގައި ކަމަށް މައުލޫމާތު ލިބިފައިނުވާ ކަމަށް ޑރ. ނަޒްލާ ވިދާޅުވިއެވެ.
މި ހާދިސާއާ ގުޅިގެން އާއިލާގެ ކިބައިން މާއަފަށް އެދި، ޑރ. ނަޒްލާ ވިދާޅުވީ އެފަދަ ކަމެއް ތަކުރާރުނުވާނެ ގޮތަށް ކަންކަން ހަމަޖައްސާ މަސައްކަތްތައް އިތުރަށް ހަރުދަނާ ކުރާނެ ކަމަށެވެ.
