މޯލްޑިވްސް އިންލަންޑް ރެވެނިއު އޮތޯރިޓީ (މީރާ)ގެ ބޯޑުން ހުސްވެފައިވާ ހަތަރު މެމްބަރު ކަމުގެ މަގާމަށް ކުރިމަތިލެއްވި 8 ބޭފުޅުންގެ ނަންތައް ދިރާސާކުރުމަށް އިގްތިޞާދީ ކޮމިޓީއަށް ފޮނުވައިފި އެވެ.

ބުދަ ދުވަހުގެ ޖަލްސާގައި މިކަމާއި ގުޅިގެން ރައީސުލްޖުމްހޫރިއްޔާ ރައްޔިތުންގެ މަޖިލީހަށް ފޮނުއްވި ސިޓީފުޅު ވަނީ އަމީން އާންމު ފާތުމަތު ނިއުޝާ މަޖިލީހުގެ ތަޅުމަށް އިއްވަވާފައެވެ. މީރާގެ ބޯޑުން ހުސްވެފައިވާ މެންބަރުކަމުގެ މަޤާމަށާއި، އަދި އެ ބޯޑުގެ 3 މެންބަރުންގެ މެންބަރުކަމުގެ މުއްދަތު 8 އޮގަސްޓު 2020 ގެ ނިޔަލަށް ހަމަވެފައިވާތީ، އެ މަޤާމުތަކަށް ބޭފުޅުން ޢައްޔަން ކުރެއްވުމަށްޓަކައި، ހުޅުވާލި ފުރުސަތުގައި 8 ބޭފަކު އެކަމަށް ކުރިމަތިލައްވާފައިވާތީ އެކަމާމެދު ގޮތެއް ނިންމެވުމަށް ރައީސް ވަނީ އެދިވަޑައިގެންފަ އެވެ.

މީރާއަކީ މިނިވަން ވަކި މުސްތަގިއްލު މުއައްސަސާއެކެވެ. މީރާގެ ބޯޑުގައި 5 މެމްބަރުން ތިއްބަވައެވެ.