ޒަކާތުން ފަންޑުން ބޭސްފަރުވާ އަށް 3.4 މިލިއަން ރުފިޔާ ހޭދަކޮށްފި
11 އޯގަސްޓު 2020 | އަންގާރަ 02:34ކޮވިޑާއި ގުޅިގެން 5.5 މިލިއަން ރުފިޔާ ވަނީ ހަރަދުކޮށްފައި
އިސްލާމިކް މިނިސްޓްރީން ދަނީ ކޮވިޑްގެ ހާލަތާއި ގުޅިގެން ގިނަ އެހީތެރިކަމެއް ފޯރުކޮށްދެމުން
ބޭސްފަރުވާގެ ފުދުންތެރިކަން ނެތް ފަރާތްތަކަށް ޒަކާތު ފަންޑުން 3.4 ރުފިޔާ ހޭދަކޮށްފިއެވެ.
ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަ ދައްކަވަމުން އިސްލާމިކް މިނިސްޓްރީގެ ނައިބް، ޝާފިއު އަލީ ވިދާޅުވީ، އެ އަދަދަކީ މި އަހަރުގެ ޖެނުއަރީ މަހުން ފެށިގެން މިހާތަނަށް ހަރަދުކުރެވިފައިވާ އަދަދު ކަމަށެވެ.
ޝާފިއު ވިދާޅުވީ، މާލި ފުދުންތެރިކަން ނެތިގެން ދައުލަތުގެ ފަރާތުން އެހީތެރިކަން ލިބުނު ކަމުގައިވިޔަސް އަދި އެހެނިހެން ހަރަދުތަކެއް އެކަމުގައި ހިމެނޭ ކަމަށެވެ. އޭގެ ތެރޭގައި ބޭސްފަރުވާ އަށް ބޭރަށްދާ ފަރާތްތަކުގެ ކެއުމުގެ ހަރަދާއި، ދަތުރުފަތުރު ކުރުން ހިމެނޭ ކަމަށް ވިދާޅުވިއެވެ. އެ ދަތިތައް ދިމާވާ ފަރާތްތަކުން އިސްލާމިކް މިނިސްޓްރީ އަށް ފޯމު ހުށައަޅައިގެން އެ ފަރާތްތަކަށް އެހީތެރިކަން މިހާރު ވެސް ފޯރުކޮށްދެމުންދާ ކަމަށް ޝާފިއު ވިދާޅުވިއެވެ. އޭނާ ވިދާޅުވީ، ޒަކާތު ފަންޑުގެ އެހީގައި މިހާރުވެސް ރާއްޖެއިން ބޭރުގައި 30 ފަރާތަކަށް ބޭސްފަރުވާ ކުރަމުންދާ ކަމަށެވެ.
ކޮވިޑް-19 ގެ ހާލަތާ ގުޅިގެން އިސްލާމިކް މިނިސްޓްރީން ދަނީ ޒަކާތު ފަންޑު މެދުވެރިކޮށް އެކި ކަހަލަ އެހީތެރިކަން ފޯރުކޮށްދެމުންނެވެ. ޒަކާތު ފަންޑުން ހަރަދުކޮށްފައިވާ އެންމެ ފަހުގެ މައުލޫމާތު ހިއްސާކުރައްވަމުން ޝާފިއު ވިދާޅުވީ، މިހާތަނަށް 5.5 މިލިއަން ރުފިޔާ ހޭދަކޮށްފައިވާ ކަމަށެވެ. އެގޮތުން ރާއްޖެއިން ބޭރުގައި ތާށިވެފައި ތިބި ދިވެހިން ގެނައުމަށް ތިން މިލިއަން ރުފިޔާ، އަދި ހާލުގައި ޖެހިފައިވާ ފަރާތްތަކަށް އެއްމިލިއަން ރުފިޔަ ހޭދަކޮށްފައިވާ ކަމަށެވެ.
