ހެލްތު މިނިސްޓްރީއަށް ރައީސް ނަޝީދުގެ ވަރުގަދަ އިލްތިމާސެއް
ހެލްތު މިނިސްޓްރީން ނެރުނު ބަޔާނުގައި މަޖިލިސް ހިންގަންވާ ގޮތް ކަމަށް ދޭހަވާ ކަމަށް ވިދާޅުވި
ކުރީގެ ރައީސް އަދި ރައްޔިތުންގެ މަޖިލިހުގެ ރައީސް މުހައްމަދު ނަޝީދު
ރާއްޖޭގެ ހިނގުމުގެ ނިޒާމު ގަޑުބަޑުނުކުރެއްވުމަށާއި، މަޖިލީހުން ކުރާ މަސައްކަތްތަކާ ގުޅިގެން ވުޒާރާތަކުން ބަޔާން ނުނެރުމަށް ރައްޔިތުންގެ މަޖިލީހުގެ ރައީސް، ރައީސް މުޙައްމަދު ނަޝީދު ވިދާޅުވެއްޖެއެވެ.
ރައީސް ނަޝީދުގެ ވާހަކަތައް އަމާޒުކުރެއްވީ ހެލްތު މިނިސްޓްރީއަށެވެ. ހޯމަ ދުވަހުގެ މަޖިލީސް ޖަލްސާގައި ވާހަކަ ދައްކަވަމުން ރައީސް ނަޝީދު ވިދާޅުވީ ހެލްތު މިނިސްޓްރީން ނެރުނު ބަޔާނުގައި، މަޖިލިސް ހިންގަންވާ ގޮތް ކަމަށް ދޭހަވާ އިބާރާތް ހުރި ކަމަށެވެ. އަދި މިއީ އެއްވެސް ވުޒާރާއަކަށް ކުރެވިގެން ވާނެ ކަމެއް ނޫންކަމަށް ވިދާޅުވެ ޒާތްޒާތުގެ ނޫސްބަޔާން ނެރިގެން މަޖިލީހުގެ މަސައްކަތްތަކާ ނުބެހުމަށް އިލްތިމާސް ކުރެއްވިއެވެ.
ހެލްތު މިނިސްޓްރީން ނެރުނު ބަޔާނަކީ، އިޖުތިމާޢީ ކޮމިޓީގައި ސިއްހީ ދާއިރާގެ ތަޖުރިބާކާރުން ރާއްޖޭގެ ސިއްހީ ނިޒާމާއި ހެލްތު މިނިސްޓްރީއާ ގުޅޭގޮތުން ދެއްކެވި ވާހަކަތަކާއި ގުޅިގެން ނެރުނު ބަޔާނެކެވެ. އެގޮތުން އެ ދުވަހުގެ ކޮމިޓީ ބައްދަލުވުމުގައި ބައެއް ފަރާތްތަކުން މައުލޫމާތު ހިއްސާކޮށްފައިވަނީ ކަމުގެ ހަގީގަތް އެ މިނިސްޓްރީން އޮޅުންފިލުވުމެއް ނެތި ކަމަށް ހެލްތު މިނިސްޓްރީގެ ބަޔާނުގައިވެއެވެ.
އިޖުތިމާޢީ ކޮމިޓީގައި ބައިވެރިވަޑައިގެންނެވި ބޭފުޅުން ވަނީ ސިއްހީ ދާއިރާ ހިންގުމަށް ކަނޑައެޅިފައިވާ ސިޔާސަތުތަކާއި އެކުލަވާލާފައިވާ ގައިޑްލައިންތަކާ އެއްގޮތަށް އަމަލުނުކުރާ ކަމަށް ވިދާޅުވެފައެވެ. އަދި މިބުނާ ސިޔާސަތުތަކާއި ގައިޑްލައިންތައް އެ ވުޒާރާގައި ތިއްބެވި ފަރާތްތަކަށް ނޭނގޭ ކަމަށްވެސް ވިދާޅުވިއެވެ.
މި ކޮމިޓީ ބައްދަލުވުމުގައި ސިއްހީ ދާއިރާގެ ތަޖުރިބާކާރުންގެ ގޮތުގައި ބައިވެރިވެ ވަޑައިގެންނެވީ ޑރ. ހުސައިން މާހިރު، ޑރ. އިސްހާގު ޝަފީގު، ޑރ. މުހައްމަދު ޝާފީ މުނީރު، ހަފީޒާ އަލީ އަދި ހަދީޖާ އަބްދުއްސަމަދު އަބްދުﷲ އެވެ. މި އެންމެންނަކީވެސް ރާއްޖޭގެ ސިއްހީ ދާއިރާގައި ގިނަ ދުވަސްތަކެއް ވަންދެން މަސައްކަތްކުރައްވާފައިވާ ބޭފުޅުންތަކެކެވެ.
މިފަހުން ހެލްތު މިނިސްޓްރީއާ ގުޅޭގޮތުން ތިލަވި ބައެއް ކަންކަމާއި ގުޅިގެން އެ ވުޒާރާއަށާއި ސަރުކާރަށް ވަނީ ބޮޑެތި ފާޑުކިޔުންތަކެއް އަމާޒުވެފައެވެ. މި ވާހަކަތަކަށް ރައްދު ދެމުން ހެލްތު މިނިސްޓްރީން ބުނެފައިވަނީ އެ ވުޒާރާއިން ހުރިހާ މަސައްކަތެއް ވެސް ކުރަމުންދަނީ ދެފުށް ފެންނަ އުސޫލެއްގެ ތެރެއިން ކަމަށެވެ. އަދި މިނިސްޓްރީން ކުރާ ހުރިހާ މަސައްކަތްތަކަކީ ވެސް ރައީސް އިބްރާހިމް މުޙައްމަދު ޞާލިޙުގެ ވައުދުނާމާގައި ހިމަނާފައިވާ ކަންކަން ފުރިހަމަކުރުމަށް ކުރާ މަސައްކަތްތަކެއް ކަމަށެވެ.
މީގެ ކުރިން މި މައްސަލައިގައި ރައީސް ނަޝީދު ވަނީ، އިޖުތިމާޢީ ކޮމިޓީގައި ސިއްހީ ތަޖުރިބާކާރުން ދެއްކެވި ވާހަކަތަކަށް ތާއީދުކުރައްވާ ޓްވީޓް ކުރައްވާފައެވެ. އެގޮތުން ތަފާތު ހިޔާލުތަކުގެ ބޭފުޅުން މަޖިލީހަށް ވަޑައިގެން މަޝްވަރާ ދިނުމަކީ ސަރުކާރު ޖަވާބުދާރީ ކުރުމުގެ ނިޒާމު ކަމަށް ވިދާޅުވިއެވެ.
