ރިލްވާނުގެ މައްސަލާގައި ބޭރުގެ އިންވެސްޓިގޭޓަރަކު ބައިވެރިކުރަން ނިންމައިފިން: ރައީސް
ރިލްވާން ގެއްލުވާލާފައިވަނީ 2014 ވަނަ އަހަރުގެ އޮގަސްޓް މަހުގެ 8 ވަނަ ދުވަހުގެ ރޭ
ވަގަށް ނެގުމަށް ފަހު މަރާލާފައިވާ ނޫސްވެރިޔާ އަހުމަދު ރިލްވާން
މިނިވަން ނޫހުގެ ނޫސްވެރިޔާ އަހުމަދު ރިލްވާނު މަރާލި މައްސަލަ ތަހުގީގުކުރާ ޓީމުގައި އިތުބާރު ކުރެވޭ ބޭރުގެ އިންވެސްޓިގޭޓަރަކު ބައިވެރިކުރަން ނިންމާފައިވާ ކަމަށް ރައީސް އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ރިލްވާން މަރާލިތާ ހަ އަހަރު ފުރުމާއި ގުޅިގެން ރައިސް ސޯލިހު ކުރެއްވި ޓްވީޓެއްގައި އެމަނިކުފާނު ވިދާޅުވީ، ރިލްވާންގެ މައްސަލަ އަށް އިންސާފު ނުލިބި ލަސްވަމުންދާ ކޮންމެ ދުވަހަކީ އާއިލާ އަށް ލިބޭ އިތުރު ހިތްދަތިކަމެއް ކަމަށެވެ. ރައީސް ސޯލިހު ވިދާޅުވީ، ރިލްވާން އަށް އިންސާފު ހޯދުމަށް މެދުކެނޑުމެއްނެތި ސަރުކާރުން މަސައްކަތް ކުރަމުންދާނެ ކަމަށެވެ.
އެއަށް ފަހު ރައީސް ވިދާޅުވީ، އާއިލާގެ އެދުމާއި އެއްގޮތަށް މި ވަގުތު މަސައްކަތްކުރަމުން ދަނީ އިތުބާރު ކުރެވޭ ރާއްޖެއިން ބޭރުގެ އިންވެސްޓިގޭޓަރެއް ތަހްގީގު ޓީމުގައި ހިމަަނައިގެން މަސައްކަތް ކުރުން ކަމަށެވެ.
ގަދަކަމުން ގެންގޮސް ރިލްވާން ގެއްލުވާލާފައިވަނީ 2014 ވަނަ އަހަރުގެ އޮގަސްޓް މަހުގެ 8 ވަނަ ދުވަހުގެ ރޭ ހުޅުމާލެއިންނެވެ. ނަމަވެސް މަރު ކޮމިޝަނުން މިހާތަނަށް ހާމަކޮށްފައިވާ މައުލޫމާތުން އެނގޭ ގޮތުގައި ބަޔަކު ރިލްވާނަށް ފާރަލާ ހުޅުމާލެއިން ކާރަކަށް ގަދަކަމުން އަރުވާފައިވެއެވެ. ރިލްވާން ގަދަކަމުން ކާރަކަށް އަރުގައިވެގެން ދިޔަ ރޭގައި، އޭނާ ގެންދިޔައީ ހުޅުމާލޭގައި ފަޅުގައި އަޅާފައި އޮތް ޑިންގީ އަކަށް ކަމަށެވެ. އަދި އެ ޑިންގީގައި އޭނާ ގެންދިޔައީ ކަނޑުގައި އޮތް އުޅަނދަކަށް ކަމަށާ، އޭނާ މަރާލީ އުޅަނދުގައި ކަމަށް މަރު ކޮމިޝަނުން ބުނެފައިވެއެވެ.
އަދި ރިލްވާން މަރާލުމުގެ ކުރިން އޭނާއަށް ޝަހާދަތް ލައިދިން ކަމަށާއި، އޭނާ މަރާލީ ކުފުރު ވުމުން ކަމަށް ބުނެ ކަމުގައި މިހާތަނަށް މައުލޫމާތު ލިބިފައިވާ ކަމަށް މަރު ކޮމިޝަނުން ވަނީ ބުނެފައެވެ. އަދި އޭނާ މަރާލުމަށް ފަހު ގައިގައި ދާ އޮޅުމަށްފަހު ކަނޑުފައްތާފައި ވާ ކަމަށް އިންޓެލް މައުލޫމާތު ލިބިފައި ވާކަމަށް މަރު ކޮމިޝަނުން ހާމަކޮށްފައިވެއެވެ.
