ފިޑޭ އޮންލައިން އޮލިމްޕިއާޑްގައި ރާއްޖެއިން ބައިވެރިވެއްޖެ

ފިޑޭ އޮންލައިން ޗެސް އޮލިމްޕިއާޑްގެ ކުޅުން ފަށައިފިއެވެ.

މި މުބާރާތުގައި ރާއްޖެއިން ބައިވެރިވެފައިވަނީ ޖުމްލަ 12 ކުޅުންތެރިންނެވެ. އެއީ ހަ ކުޅުންތެރިންނާއެކު، ރިޒާވް ހަ ކުޅުންތެރިންނެވެ. ޗެސް އެސޯސިއޭޝަން އޮފް މޯލްޑިވްސްއިން މައުލޫމާތުދޭ ގޮތުގައި އޮލިމްޕިއާޑްގައި ވާދަކުރާ ޓީމުގައި އޯޕަން ދެ ކުޅުންތެރިންނާއި، އަންހެން ދެ ކުޅުންތެރިން އަދި 20 އަހަރުން ދަށުގެ ފިރިހެން ކުޅުންތެރިއަކާއި އަންހެން ކުޅުންތެރިއަކު ހިމަނާފައިވެއެވެ.

މި މުބާރާތް ކުރިއަށް ގެންދިޔުމަށް ހަމަޖެހިފައިވަނީ ފަސް ޑިވިޝަނަކަށް ބަހާލައިގެންނެވެ. އެގޮތުން ހަތަރުވަނަ ޑިވަޝަނަށް ރާއްޖެ ކޮލިފައި ވެފައިވާއިރު، ރާއްޖޭގެ އިތުރުން މި ޑިވިޝަންގައި ޖުމްލަ 50 ޓީމު ވަނީ ހިމަނާފައެވެ. ޖުމްލަ ނުވަ ރައުންޑް މި ޑިވަޝަންގައި ކުޅެފައިވާއިރު، ރާއްޖެ ވަނީ ރޭންކުގެ 43 ވަނައިގައި ހިމެނިފައެވެ.

މި މުބާރާތަކީ ވޯލްޑް ޗެސް ފެޑެރޭޝަން (ފިޑޭ) އިން އިންތިޒާމުކޮށްގެން ކުރިއަށް ގެންދާ މުބާރާތެކެވެ. މުޅި ދުނިޔޭގެ އެކި ކަންކޮޅުތަކުގައި ރާޒުވާ ކުޅެމުން އަންއިރު، ފިޑޭއާ ގުޅިގެން 190 ގައުމުން ދަނީ މި ކުޅިވަރު ކުރިއަރުވަމުންނެވެ.

އޮލިމްޕިއާޑް ކުޅުމާއެކު ރާއްޖެ މިހާރު ވަނީ ވޯލްޑް ރޭންކިންގ ލިސްޓުގައި 167ން 150 ވަނައަށް ކުރިއަށް ޖެހިލާފައެވެ. ޗެސް އެސޯސިއޭޝަނުން ބުނީ 17 ދަރަޖައިގެ ކުރިއެރުމަކާއެކު މިއީ ރާއްޖެ އާއި، ޗެސް އެސޯސިއޭޝަން އަދި ކުޅުންތެރިންނަށް ލިބުނު ވަރަށް ބޮޑު ކުރިއެރުމެއް ކަމަށާއި، މި ކާމިޔާބީއަކީ މުޅި ރާޒުވާ ކޮމިއުނިޓީއަށް ލިބުނު ވަރަށް ބޮޑު ފަހުރެއް ކަމަށެވެ.