ބަޝުންދަރާއަށް ބްރެޒިލްގެ ފޯވާޑެއް

އޭއެފްސީ ކަޕަށް ޓީމު ވަރުގަދަ ކުރުމުގެ ގޮތުން ބްރެޒިލްގެ ފްލުމިނެސޭގެ ފޯވާޑް ރޮބްސަން އަޒެވޭޑޯ ޑަ ސިލްވާ (ރޮބީނިއޯ) ގެ ސޮއި ބަންގްލަދޭޝްގެ ޗެމްޕިއަން ބަޝުންދަރާ ކިންގްސްއިން ހޯދައިފިއެވެ.

ބަންގްލަދޭޝްގެ ރިޕޯޓުތައް ބުނާ ގޮތުން އުމުރުން 25 އަހަރުގެ ރޮބީނިއޯ ބަޝުންދަރާއާ ގުޅުނީ އެއް އަހަރުގެ ލޯނު އެއްބަސްވުމެއްގެ ދަށުން އަންނަ އަހަރު ޖުލައި މަހުގެ ނިޔަލަށެވެ. އަދި ބަޝުންދަރާއިން ވަނީ އެޓީމަށް ކުޅެމުން އައި ކޮސްޓަ ރިކާ ގައުމީ ޓީމުގެ ފޯވާޑް ޑެނިއަލް ކޮލިންދްރެސް ދޫކޮށްލާފައެވެ.

ބަޝުންދަރާއާ ގުޅުނު ރޮބީނިއޯ، އޭނާގެ ކެރިއަރު ފަށާފައިވަނީ 2017 ވަނަ އަހަރު ބްރެޒިލްގެ ފުރަތަމަ ޑިވިޝަނުގައި ވާދަކުރަމުން އަންނަ ފްލުމިނޭސޭ އާއެކުއެވެ. އެކަމަކު ފާއިތުވި އަހަރުތަކުގައި ރޮބީނިއޯ ކުޅެފައިވަނީ ލޯނު އުސޫލުން އެހެން ޓީމުތަކަށެވެ. އެގޮތުން މިދިޔަ ދެ އަހަރު އެމެރިކާގެ ޓީމުތަކަށް ކުޅުމަށްފަހު، އޭނާ އެންމެ ފަހުން ކުޅެފައިވަނީ ބްރެޒިލްގެ ސައޮ ޕައޮލޯގެ ސްޓޭޓް ލީގުގައި ވާދަކުރާ އެގުއާ ސަންޓާއަށެވެ.

ރާއްޖޭގެ ނިއުރޭޑިއަންޓް ސްޕޯޓްސް ކްލަބަށް ކުރިން ކޯޗުކޮށްދިން ސްޕެއިންގެ އޮސްކާ ބްރުޒޮންގެ އިރުޝާދުގެ ދަށުން ކުޅެމުން އަންނަ ބަޝުންދަރާއަށް ބްރެޒިލްގެ ފޯވާޑެއް ގެނައިރު، އަންނަ އޮކްޓޯބަރު މަހު އަލުން ފަށާ އޭއެފްސީ ކަޕަށް ޓީމު ވަރުގަދަ ކުރުމުގެ މަސައްކަތް އެ ޓީމުން އަންނަނީ ކުރަމުންނެވެ.

ކޮވިޑް-19 އާ ގުޅިގެން އޭއެފްސީ ކަޕްގެ މެޗުތައް މެދުކަނޑާލީ މާޗު މަހުގެ ތެރޭގައެވެ. އޭއެފްސީ ކަޕްގެ ދެކުނު އޭޝިއާގެ ޓީމުތަކުގެ ގްރޫޕްގެ މެޗުތައް އޮކްޓޯބަރު މަހު 23ން ނޮވެމްބަރު ހަތަރަކާ ދެމެދު ރާއްޖޭގައި ކުޅޭ ގޮތަށް މިހާރު ނިންމާފައިވާއިރު، ގްރޫޕް ސްޓޭޖުގައި ކުޅުނު ފުރަތަމަ މެޗުން ބަޝުންދަރާ ވަނީ ރާއްޖޭގެ ޓީސީ ސްޕޯޓްސް ކްލަބު އަތުން 5-1 ގެ ތަފާތު ބޮޑު ނަތީޖާއަކުން މޮޅުވެފައެވެ.

އޮކްޓޯބަރު މަހުގެ 13 ވަނަ ދުވަހު އޭއެފްސީ ކަޕް މެޗުތައް އަލުން ފަށާއިރު، ފުރަތަމަ މެޗުގައި ބަޝުންދަރާ ނުކުންނާނީ ރާއްޖޭގެ މާޒިޔާ ސްޕޯޓްސް އެންޑް ރެކްރިއޭޝަނާ ދެކޮޅަށެވެ.