ބްރެޒިލްގެ މަޝްހޫރު ފުޓްބޯޅަ ތަރި ނޭމާ އަދި ރެޑްބުލްއިން އިންތިޒާމް ކޮށްގެން ކޮންމެ އަހަރަކު ބާއްވަމުން އަންނަ "ނޭމާ ޖޫނިއަރސް ފައިވް" ފުޓްސެލް މުބާރާތުގެ ޗެމްޕިއަންކަން ހޯދައި ބްރެޒިލްއަށް ދިޔުމުގެ ޓިކެޓް އަނެއްކާ ވެސް ކްލަބް ޓީނޭޖުން ކަށަވަރު ކޮށްފިއެވެ.

ގައުމީ ކޮލިފައިންގެ ފައިނަލުގައި ކްލަބް ޓީނޭޖް ކުރި ހޯދީ އެލްޕީ ސްޕޯޓްސްގެ މައްޗަށް ގޯލްޑެން ގޯލުގައި 1-0 ގެ ނަތީޖާއަކުންނެވެ. މިއަހަރުގެ މުބާރާތުގައި ރާއްޖޭގައި 11 ކޮލިފައިން ބުރު ކުޅުނުއިރު 220 ޓީމު ބައިވެރިވިއެވެ. ހަމައެހެންމެ މިފަހަރުގެ މުބާރާތުގައި ރާއްޖޭގެ 2261 ކުޅުންތެރިޔަކު ވެސް ބައިވެރިވިއެވެ. މި މުބާރާތުގެ ތައްޓާއި ބޯޑިން ޕާސް ކްލަބް ޓީނޭޖާއި ހަވާލު ކޮށްދެއްވީ ރެޑްބުލްގެ ބާސްކެޓްބޯލް އެތުލީޓު އިބްރާހިމް ރަޝްވާން (ޗިކޫ) އެވެ.

ކްލަބް ޓީނޭޖްގެ ކެޕްޓަން އިސްމާއިލް ފާތިހު ބުނީ މުބާރާތުގެ ޗެމްޕިއަންކަން ލިބުމަކީ ލިބޭ ވަރަށް ބޮޑު އުފަލެއް ކަމަށާއި ދެވަނަ ފަހަރަށް މި މުބާރާތުގެ ޗެމްޕިއަންކަން ލިބުމަކީ ފަސޭހަ ކަމެއް ނޫން ކަމަށެވެ. އޭނާ ބުނީ މިއަހަރުގެ މުބާރާތުގައި ކުޅުނީ އެންމެ މުހިންމު ދެ ކުޅުންތެރިން ނުލައި ކަމަށާއި އެ ދެ ކުޅުންތެރިން ނެތިވެ މޮޅުވުމަކީ ވެސް ލިބޭ ބޮޑު އުފަލެއް ކަމަށެވެ.

ކްލަބް ޓީނޭޖްގެ ކުޅުންތެރިންނަކީ ރާއްޖޭގައި ފާހަގަ ކޮށްލެވޭ އެންމެ މޮޅު ފުޓްސަލް ކުޅުންތެރިންގެ ތޭރޭގައި ހިމެނޭ ކުޅުންތެރިންނެވެ. މީގެ ތެރޭގައި އިސްމާއިލް ފާތިހް (ތާޑޭ)، ހުސެން ޝަރީފް (އޮންލީ)، ރިހާމް އަބްދުލް ޣާނީ (ރިއްޕެ)، އިބްރާހިމް ނަޝީދް، އަހުމަދު އަޔާޒް (އަޔާ) އަދި އިބްރާހިމް މުބީން އަހްމަދު ރަޝީދު (މުއްކި) ހިމެނެއެވެ.

ކުރީ އަހަރު ބޭއްވި މި މުބާރާތުގެ ދުނިޔޭގެ ފައިނަލުގައި ގްރޫޕް ސްޓޭޖްގައި ކްލަބް ޓީނޭޖްއިން ވަނީ ހަތަރު ގައުމަކާއި ވާދަކޮށްފައެވެ. އޭގެ ތެރެއިން ސްވީޑެންއާއި މެލޭޝިޔާއާއި ކުޅުނު ދެ މެޗުން ބަލިވެފައިވީ ނަމަވެސް، ސްޕެއިން އަދި އިންޑިޔާ އާއި އެކު ކުޅުނު ދެ މެޗުން ވަނީ މޮޅުވެ ނޮކައުޓް ސްޓޭޖަށް ދަތުރު ކޮށްފައެވެ. އިންޑިޔާ އަތުން 5:1 ގެ ނަތީޖާއިން މޮޅުވެ، ސްޕެއިން އަތުން ރާއްޖެ މޮޅުވީ 5:2 ގެ ނަތީޖާއަކުންނެވެ.

ކުރީ އަހަރާއި އެއްގޮތަށް މިއަހަރު ވެސް މާލެ، ގދ. ތިނަދޫ، ގއ. ވިލިނގިލި، ޏ. ފުވައްމުލައް އަދި އައްޑޫގައި ކޮލިފަޔަރުތައް ބޭއްވުނެވެ. އަދި މީގެ އިތުރުން ފުރަތަމަ ފަހަރަށް ހދ. ކުޅުދުއްފުށި، ލ. ގަން އަދި ރީތިރަށް ރިސޯޓުގައިވެސް ކޮލިފަޔަރު ބޭއްވުނެވެ.

މި މުބާރާތުގެ ގަވާއިދު އޮންނަ ގޮތުން ކޮންމެ ޓީމެއްގައި ވެސް ކީޕަރާއެކު ހިމެނޭނީ ފަސް ކުޅުންތެރިންނެވެ. އަދި 10 މިނެޓަށް ކޮންމެ މެޗެއް ވެސް ކުޅެވިގެންދާއިރު އިދިކޮޅު ޓީމުން ޖަހާ ކޮންމެ ލަނޑަކަށް، ލަނޑު ވަން ޓީމުގެ ކުޅުންތެރިޔަކު ދަނޑުން ފައިބަންޖެހޭނެއެވެ.

މިއަހަރުގެ މުބާރާތުގައި ވާދަކުރުމަށް ކްލަބް ޓީނޭޖް ބްރެޒިލްއަށް ދަތުރުކުރާނީ އަންނަ ޖުލައި މަހުގެ 21 ވަނަ ދުވަހުއެވެ.