ސުޕްރީމް ކޯޓަށް ދެ ފަނޑިޔާރަކު އައްޔަނު ކުރުމަށް ޖޭއެސްސީގެ ލަފާއަކަށް އެދި ރައީސް ފޮނުއްވައިފި
6 އޯގަސްޓު 2020 | ބުރާސްފަތި 12:39މިހާރު ސުޕްރީމް ކޯޓުގެ ބެންޗުގައި ތިއްބަވަނީ ފަސް ފަނޑިޔާރުން
ދިވެހިރާއްޖޭގެ ސުޕްރީމް ކޯޓު ހުންނަ އިމާރާތް
ސުޕްރީމް ކޯޓުގެ ފަނޑިޔާރުކަމަށް، ޑރ. މުޙައްމަދު އިބްރާހިމާއި، އަލްއުސްތާޒު އަލީ ރަޝީދު ޙުސައިން، ޢައްޔަންކުރުމާ ގުޅޭގޮތުން ޖުޑީޝަލް ސަރވިސް ކޮމިޝަން (ޖޭއެސްސީ)ގެ މަޝްވަރާއަށް ފޮނުއްވާފައިވާކަމަށް ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު ވިދާޅުވެއްޖެއެވެ.
ބުރާސްފަތު ދުވަހު ރައީސް ސޯލިހު ކުރެއްވި ޓުވީޓެއްގައި ވަނީ ސުޕްރީމް ކޯޓުގެ ފަނޑިޔާރުކަމަށް، ހދ. ކުޅުދުއްފުށި، ފިނިފެންޖަންބުގޭ ޑރ. މުޙައްމަދު އިބްރާހިމާއި، ދަފްތަރު ނަންބަރު ރސ 2302، އަލްއުސްތާޒު އަލީ ރަޝީދު ޙުސައިން، ޢައްޔަންކުރުމާ ގުޅޭގޮތުން ޖޭއެސްސީގެ މަޝްވަރާއަށް ފޮނުއްވާފައިވާކަމަށެވެ.
ކޯޓުތަކުގެ ގާނޫނަށް ގެނައި އިސްލާހު 2019 ވަނަ އަހަރުގެ ޖުލައި މަހުގެ ތެރޭގައި ރައީސް ތަސްދީގު ކުރެއްވުމާއި ގުޅިގެން ސުޕްރީމް ކޯޓުގެ ބެންޗް ވަނީ ހަތަކަށް އިތުރުކޮށްފައެވެ.
މި ދެ މަގާމު ހުސްކޮށް އޮންނަތާ އެއް އަހަރު ވެގެންދިޔައިރު މިހާރު ސުޕްރީމް ކޯޓުގެ ބެންޗުގައި ތިއްބަވަނީ ފަސް ފަނޑިޔާރުންނެވެ. އެއީ އުއްތަމަ ފަނޑިޔާރު އަލްއުސްތާޒް އަޙްމަދު މުޢުތަޞިމް ޢަދުނާން އާއި ފަނޑިޔާރު ޑރ. އަޒްމިރާލްދާ ޒާހިރު އާއި ފަނޑިޔާރު އަލްއުސްތާޒާ ޢާއިޝާ ޝުޖޫން މުޙައްމަދާއި ފަނޑިޔާރު އަލްއުސްތާޒު މަޙާޒު ޢަލީ ޒާހިރުގެ އިތުރުން ފަނޑިޔާރު އަލްއުސްތާޛު ޙުސްނުއް ސުޢޫދެވެ.
ކުރިން މި މަގާމަށް ރައީސް ފޮނުއްވެވި ބައެއް ނަންތައް ޖޭއެސްސީން ވަނީ އަނބުރާ ފޮނުވާލާފައެވެ. އޭގެ ތެރޭގައި ކުރީގެ އުއްތަމަ ފަނޑިޔާރު އޒ. އަހުމަދު ފާއިޒް ހުސައިން އަދި ހައިކޯޓުގެ ފަނޑިޔާރު އޒ. އަބްދުއް ރައޫފް އިބްރާހިމް ހިމެނެއެވެ.
