ވޭތުވެދިޔަ 50 އަހަރު ހެލްތްގެ ދާއިރާގައި މަސައްކަތް ކުރެއްވި އިސްވެރިންނާ ކޮމެޓީން ބައްދަލު ކުރައްވަނީ

ދިވެހިރާއްޖޭގައި ވޭތުވެދިޔަ 50 އަހަރު ސިއްހީ ދާއިރާގައި އިސްކޮށް އުޅުއްވި ފަރާތްތަކާ ބައްދަލު ކުރެއްވުމަށް ރައްޔިތުންގެ މަޖިލީހުގެ އިޖުތިމާއީ ކޮމެޓީން ނިންމައިފިއެވެ.

މަޖިލީހުގެ އިޖުތިމާއީ ކޮމެޓީން ބުރާސްފަތި ދުވަހު ބޭއްވި ބައްދަލުވުމުގައި ވަނީ، ކޮވިޑް-19 އާ ގުޅިގެން ހެލްތް މިނިސްޓްރީން އާންމު ސިއްހަތުގެ ކަންތައްތައް ހިނގަމުން ގޮސްފައިވާ ގޮތާއި މިހާރު ކަންކަން ކުރިއަށްދާ ގެންދާ ގޮތާއި، އަދި ކުރިއަށް އޮތް ދުވަސްތަކުގައި ކަންކަން ކުރިއަށް ގެންދިއުމަށް ރާވާފައިވާ ގޮތް ދެނެގަނެ، އެކަންކަން ދިރާސާ ކުރުން ކުރިއަށް ގެންދާނެ ގޮތަކާމެދު މަޝްވަރާ ކުރެއްވުމަށް، ވޭތުވެދިޔަ 50 އަހަރު ސިއްހީ ދާއިރާގައި މަސައްކަތް ކުރައްވާފައިވާ ބޭފުޅުންނާ ބައްދަލު ކުރެއްވުމަށް ނިންމާފައެވެ.

އެގޮތުން އިޖުތިމާއި ކޮމެޓީން ބައްދަލު ކުރުމަށް ނިންމާފައިވާ ފަރާތްތަކަކީ:

1. މަޖިލީހުގެ ރައީސާ ބައްދަލު ކުރެއްވި ޑޮކްޓަރުން

2. ވޭތުވެދިޔަ 50 އަހަރު ދުވަހު، ދިވެހިރާއްޖޭގައި ޕަބްލިކް ހެލްތް ޑިރެކްޓަރ ޖެނެރަލްގެ މަގާމު ފުރުއްވި ބޭފުޅުން

3. ވޭތުވެދިޔަ 50 އަހަރު ދުވަހު، ހެލްތް މިނިސްޓަރުކަމުގެ މަގާމު ފުރުއްވި ބޭފުޅުން

4. ކަމާގުޅުންހުރި، މަދަނީ ޖަމިއްޔާތަށް

5. ވަކިވަކިންހުރި ހެލްތް ސެންޓަރުތައް

6. ރީޖަނަލް ހޮސްޕިޓަލްތައް (އޮންލައިންކޮށް ބައްދަލުކުރުން)

7. އައިޖީއެމްއެޗް

8. ވޯލްޑް ހެލްތް އޮގައިނައިޒޭޝަން (ޑަބްލިޔުއެޗްއޯ)

މި ފަރާތްތަކާ ކޮމެޓީން ބައްދަލު ކުރެއްވުމަށް ނިންމާފައިވަނީ ވަކިވަކިންނެވެ. ކޮމެޓީން ފުރަތަމަ ބައްދަލު ކުރަން ނިންމާފައިވަނީ މަޖިލީހުގެ ރައީސާ ބައްދަލު ކުރެއްވި ޑޮކްޓަރުންނާއެވެ.

މި ބައްދަލުވުންތައް ފެށުމުގެ ކުރިން، ކޮވިޑް-19 އާގުޅިގެން މިހާރު ރާއްޖޭގައި އަޅާފައިވާ ހުރިހާ ފިޔަވަޅުތަކެއްގެ ތަފްސީލް ހޯދުމަށް ވެސް ކޮމެޓީން ނިންމާފައިވެއެވެ.