އުސޫލުތަކާއި ހިލާފުވި އިތުރު 20 ތަނެއް ބަންދުކޮށްފި
6 އޯގަސްޓު 2020 | ބުރާސްފަތި 04:29ބުދަ ދުވަހު 235 ތަނެއް ވަނީ ޗެކްކޮށްފައި
ބާޒާރުމަތީ ސަރަހައްދު ފިހަރާއެއްގެ ކުރިމަތީ ބަޔަކު ހުއްޓިލައިގެން
ހެލްތް ޕްރޮޓެކްޝަން އެޖެންސީ (އެޗްޕީއޭ) ގެ މިންގަނޑުތަކާއި ހިލާފަށް ހިންގި އިތުރު 20 ތަނެއް ބަންދުކޮށްފިއެވެ.
އެޗްޕީއޭއިން ހިންގަމުންދާ އިންސްޕެކްޝަންގެ މައުލޫމާތު ނޫސްވެރިންނާ ހިއްސާކުރައްވަމުން އެ އެޖެންސީގެ މެޑިކަލް އޮފިސަރު ޑރ. ފާތިމަތު ނަޒްލާ ރަފީގް ވިދާޅުވީ، ބުދަ ދުވަހު 235 ތަަނެއް އިންސްޕެކްޓް ކޮށްފައިވާ ކަމަށެވެ.
އެއީ ކާބޯތަކެތީގެ ހިދުމަތްދޭ 51 ތަނާއި، 154 ފިހާރަ، ފަސް ޖިމްގެ އިތުރުން ހަތަރު މާރުކޭޓް އެވެ. ޑރ. ނަޒްލާ ވިދާޅުވީ، އިންސްޕެކްޓްކުރި ތަންތަނުގެ ތެރެއިން ގަވާއިދާ ހިލާފަށް ނުފެތޭތީވެ 20 ތަނެއް ބަންދުކޮށްފައިވާ ކަމަށެވެ. އެއީ ހަ ސެލޫނާއި، އަށްފިހާރާ، ތިން މާރުކޭޓްގެ އިތުރުން ކާބޯތަކެތީގެ ހިދުމަތްދޭ ތިންތަނެއް ކަމަށް އޭނާ ވިދާޅުވިއެވެ.
އެޗްޕީއޭއިން އާއްމުކޮށްފައިވާ އުސޫލުތަކާއި އެއްގޮތަށް ގްރޭޓަރ މާލެ ސަރަހައްދުގައި ހިމެނޭ ކެއިން ބުއިމުގެ ހިދުމަތްތައް ދޭ ތަންތަނާއި، އާއްމު ކާބޯތަކެތި ވިއްކާ ފިހާރަތަކާއި، ޖިމް ނުވަތަ ފިޓްނަސް ސެންޓަރުތަކާއި، ސެލޫން އަދި މާރުކޭޓް ފަދަ ތަންތަން އަމަލުކުރަމުންދޭތޯ ބެލުމަށްޓަކައި މިދިޔަ ހަފްތާގެ ބުދަ ދުވަހުން ފެށިގެން ހާއްސަ އޮޕަރޭޝަނެއް ވަނީ ފަށާފައެވެ.
