މިއަދުވެސް ގިނައިން ޕޮޒިޓިވްވީ ދިވެހިން
4 އޯގަސްޓު 2020 | އަންގާރަ 17:29116 ދިވެހިން ވަނީ ޕޮޒިޓިވްވެފައި
މި ފަހަކަށް އައިސް ގިނައިން ޕޮޒިޓިވްވަނީ ދިވެހިން
އިތުރު 153 މީހަކު ކޮވިޑް-19ށް ޕޮޒިޓިވްވެއްޖެއެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނީ، ޕޮޒިޓިވްވި މީހުންގެ ތެރޭގައި ހިމެނެނީ 116 ދިވެހިންނާއި، ބަންގަލްދޭޝްގެ 22 މީހުންނާއި، އިންޑިއާގެ 11 މީހުން ކަމަށެވެ. އިންޑޮނެޝިޔާގެ، މިސްރު، އިނގިރޭސިވިލާތުގެ އިތުރުން ކެންޔާ ހިމެނޭ ގޮތަށް މިއިން ކޮންމެ ގައުމަކުން އެކަކު ވަނީ ކޮވިޑަށް ޕޮޒިޓިވްވެފައެވެ. މިއާއި އެކު ޕޮޒިޓިވް ކޭސްތަކުގެ އަދަދު ވަނީ 4446ށް އަރާފައެވެ. ބަލިން ފަސޭހަވި މީހުންގެ އަދަދު އުޅެނީ 2693 ގައެވެ.
އެކްޓިވް ކޭސްތަކުގެ އަދަދު އުޅެނީ 1719 ގައެވެ. މިފަހަކަށް އައިސް ޕޮޒިޓިވް ކޭސްތައް އިތުރުވެފައިވާއިރު މީގެ ތެރެއިން ގިނަ މީހުންނަކީ ދިވެހިންނެވެ.
ކޮވިޑް ފެތުރޭ މިންވަރު ރާއްޖޭގައި އިތުރުވެފައިވާއިރު މާލެ ސަރަހައްދުގައި (މާލެ، ހުޅުމާލެ، ވިލިމާލެ) ގައި ރޭގަނޑު 10:00ން ފަތިހު 5:00ށް މަގުމައްޗަށް ނުކުތުމާއި އެއްގަމު އުޅަނަދު ދުއްވުން ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ވަނީ މަނާކޮށްފައެވެ.
އެ ގަޑިތަކުގައި ބޭރުގައި މީހުން އުޅޭ ކަމަށްވާނަމަ ފުލުހުން ފިޔަވަޅު އަޅަމުންދާނެ ކަމަށެވެ. އަދި އެ ވަގުތުތަކުގައި ބޭރަށް ނުކުމެވޭނީ ޒަރޫރީ ބޭނުމަކަށް ކޮންމެހެން ނުކުންނަން ޖެހިގެން ފުލުހުންގެ ހުއްދައާ އެކުކަމަށް ވެސް އެ ސެންޓަރުން ބުންޏެވެ. މީގެ އިތުރުން ރޭގަނޑު 10 އަކުން ފަތިހު 05:00 އަކަށް އެއްގަމު އުޅަނދު ދުއްވުމާއި ޓޭކްއަވޭ އާއި ޑެލިވަރީގެ ހިދުމަތް ދިނުން ވެސް ހުއްޓާލުމަށް ވަނީ އަންގާފައެވެ.
