ރޭގަނޑު 10ން ފަތިހު 5ށް މަގުމައްޗަށް ނުކުތުން މަނާކޮށްފި

މާލެ ސަރަހައްދުގައި (މާލެ، ހުޅުމާލެ، ވިލިމާލެ) ގައި ރޭގަނޑު 10:00ން ފަތިހު 5:00ށް މަގުމައްޗަށް ނުކުތުމާއި އެއްގަމު އުޅނަދު ދުއްވުން މަނާކޮށްފިއެވެ.

ހެލްތު އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ބުނެފައިވަނީ އެ ގަޑިތަކުގައި ބޭރުގައި މީހުން އުޅޭ ކަމަށްވާނަމަ ފުލުހުން ފިޔަވަޅު އަޅަމުންދާނެ ކަމަށެވެ. އަދި އެ ވަގުތުތަކުގައި ބޭރަށް ނުކުމެވޭނީ ޒަރޫރީ ބޭނުމަކަށް ކޮންމެހެން ނުކުންނަން ޖެހިގެން ފުލުހުންގެ ހުއްދައާ އެކުކަމަށް ވެސް އެ ސެންޓަރުން ބުންޏެވެ. މީގެ އިތުރުން ރޭގަނޑު 10 އަކުން ފަތިހު 05:00 އަކަށް އެއްގަމު އުޅަނދު ދުއްވުމާއި ޓޭކްއަވޭ އާއި ޑެލިވަރީގެ ހިދުމަތް ދިނުން ވެސް ހުއްޓާލުމަށް ވަނީ އަންގާފައެވެ.

އެޗްއީއޯސީން ބުނީ މާލެ ވިލިމާލޭ ހުޅުމާލޭގައި އެއްފަހަރާ 5 މީހުންނަށްވުރެން ގިނަ މީހުން އެއްވެ އުޅުން ވެސް މަނާވާނެ ކަމަށެވެ. އަދި މާލެ ވިލިމާލޭ ހުޅުމާލޭ ތިލަފުށި އަދި ގުޅީފަޅުގައި ދަތުރުކުރުމުގައި އެޗްޕީއޭގެ ގައިޑްލައިނާ އެއްގޮތަށް އަމަލު ކުރަން ޖެހޭނެ ކަމަށް ބުނެފައިވެއެވެ.

އޭޕްރިލްމަހުގެ 15 ވަނަދުވަހު ކޮވިޑް-19 މާލެއިން ފެނި ބަލި ފެތުރުން ކޮންޓްރޯލް ކުރުމަށް މާލެ ސަރަހައްދު ފުރަބަންދުގައި 60 ދުވަސް އޮތުމަށްފަހު ފުރަބަންދަށް ލުއިދީފައިވަނީ ޖޫން މަހުގެ 15 ވަނަ ދުވަހުން ފެށިގެންނެވެ. ފުރަބަންދަށް ލުއިދިން ފަހުން ފެންނަ ކޭސްތަކުގެ އަދަދު އަންނަނީ އިތުރުވަމުންނެވެ. އަދި ބަލި ޖެހޭ ދިވެހިން ނިސްބަތް އަންނަނީ އިތުރުވަމުންނެވެ.