އޭއެފްސީ ކަޕަށް މާޒިޔާއިން އަޑުބަރޭއަށް ފާރަލަނީ

އޮކްޓޯބަރު މަހު އަލުން ފަށާ އޭއެފްސީ ކަޕްގެ ގްރޫޕް ސްޓޭޖް މެޗުތަކަށް ޓީމު ވަރުގަދަ ކުރުމުގެ ގޮތުން މާޒިޔާ ސްޕޯޓްސް އެންޑް ރެކްރިއޭޝަނުން އިތުބާރު މިޑްފީލްޑަރު އަދި ކުޅިވަރާ ބެހޭ ވުޒާރާގެ ސްޓޭޓް މިނިސްޓަރު އަސްހަދު އަލީ (އަޑުބަރޭ) ގެނައުމުގެ މަސައްކަތް ފަށައިފިއެވެ.

މާޒިޔާގެ މީޑިއާ އޮފިސަރު އަދި ބޯޑު މެންބަރު ޝިފާން ރައޫފް ވިދާޅުވީ އޭއެފްސީ ކަޕަށް ޓީމު ވަރުގަދަ ކުރުމުގެ މަސައްކަތް ކުރުމުގެ ގޮތުން އަޑުބަރޭއާ ވާހަކަ ދައްކަމުން އަންނަ ކަމަށާއި، އެކަމަކު އަދި މި ކަމަށް ގޮތެއް ނިމިފައިނުވާ ކަމަށެވެ.

އަނިޔާގެ ސަބަބުން ގިނަ ދުވަސްތަކެއް ވަންދެން ކުޅުމާ ދުރުގައި ހުރި އަޑުބަރޭ އެންމެ ފަހުން ފެނިގެން ދިޔައީ 2018 ވަނަ އަހަރު ކްލަބު ގްރީން ސްޓްރީޓްސްއިންނެވެ. ގައުމީ ޓީމަށް ގިނަ ދުވަސްތަކެއް ވަންދެން ކުޅުނު އަޑުބަރޭއަކީ ކުރިން މާޒިޔާއަށްވެސް ކުޅެދިން ކުޅުންތެރިއެކެވެ. އަދި މާޒިޔާގެ ކެޕްޓަންކަން ވެސް އޭނާ ވަނީ ކޮށްފައެވެ.

މާޒިޔާއާއެކު 2014 ވަނަ އަހަރުގެ އެފްއޭ ކަޕާއި 2016 ވަނަ އަހަރުގެ ލީގުގެ އިތުރުން 2017 ވަނަ އަހަރުގެ މާލޭ ލީގު އަޑުބަރޭ ވަނީ ކާމިޔާބު ކޮށްފައެވެ.

އޭއެފްސީ ކަޕަށް ޓީމު ވަރުގަދަ ކުރުމުގެ ގޮތުން މާޒިޔާއިން އަންނަނީ އެޓީމުގެ ކުޅުންތެރިންގެ އެއްބަސްވުން އާކޮށް، އައު ކުޅުންތެރިން ހޯދުމަށް މަސައްކަތް ކުރަމުންނެވެ. އެގޮތުން އެޓީމުގެ ޑިފެންޑަރު މުޙައްމަދު އަބްދުﷲ (ލިލީ) އާއި ސެއިންޓް ވިންސެންޓްގެ ފޯވާޑް ކޯނެލިއަސް ސްޓެވާޓް (ކޯނޭ) ވެސް ވަނީ އަންނަ ސީޒަނުގެ ނިޔަލަށް އެއްބަސްވުން އާކޮށްފައެވެ. މީގެ އިތުރުން މާޒިޔާއިން ވަނީ އޭއެފްސީ ކަޕަށް ތަޖުރިބާކާރު ކޯޗު މުޙައްމަދު ނިޒާމް (ނިޒާމްބެ) ގެ ސޮއި ހޯދައިފައެވެ.

މިފަހަރުގެ އޭއެފްސީ ކަޕްގެ ކޮލިފައިން ފަހަނައަޅައި ގްރޫޕް ސްޓޭޖުން މާޒިޔާ ޖާގަ ހޯދާފައިވާއިރު، ގްރޫޕް ސްޓޭޖުގެ ފުރަތަމަ މެޗުގައި އިންޑިއާގައި އެގައުމުގެ ޗެންނާއި ސިޓީ އެފްސީއާ މާޒިޔާ ވަނީ 2-2 ން އެއްވަރުކޮށްފައެވެ.

އޭއެފްސީ ކަޕްގެ ދެކުނު އޭޝިއާގެ ޓީމުތަކުގެ ގްރޫޕްގެ މެޗުތައް މިހާރު ވަނީ އޮކްޓޯބަރު މަހު 23ން ނޮވެމްބަރު ހަތަރަކާ ދެމެދު ރާއްޖޭގައި ކުޅޭ ގޮތަށް ނިންމާފައެވެ.