އުރީދޫގެ އަހަރީ ދުވަހާ ގުޅުވައި ވަރޗުއަލް ރަން އެއް ބާއްވަނީ
މިރަން ގައި 20 އަތޮޅުން 20 ދުވުންތެރިން ބައިވެރިވުމަށް ވަނީ ހަމަޖެހިފައި
މީގެކުރިން އުރީދޫ އިން ބޭއްވި ކަލަރ ރަންގެ ތެރެއިން
އުރީދޫ މޯލްޑިވްސްގެ 15 ވަނަ އަހަރީ ދުވަހުގެ މުނާސަބަތާއި ގުޅިގެން ރާއްޖޭގެ ފުރަތަމަ ވަރޗުއަލް ރިލޭ "އަތޮޅު ރަން" ގެ ނަމުގައި ބޭއްވުމަށް އެ ކުންފުނިން އިއުލާންކޮށްފިއެވެ.
އުރީދޫ އިން ބުނީ މި ރަން ރާއްޖޭގެ ހުރިހާ އަތޮޅެއްގައި ކުރިއަށް ގެންދިޔުމަށް ރާވާފައިވާ ކަމަށެވެ. މި ރަން ބޭއްވުމަށް ހަމަޖެހިފައިވަނީ މި ހިނގާ އޮގަސްޓް މަހުގެ 28 ވަނަ ދުވަހު ކަމަށާއި މި ރަންއަކީ އުރީދޫ އިން ދިވެހިންނާއެކު ކާމިޔާބު ކަމާއެކު ޚިދުމަތް ދިނުމުގައި 15 އަހަރު ވެގެންގޮސްފައިވާތީ ކަމަށް އުރީދޫ އިން ބުނެއެވެ.
މި ރަން އާ ގުޅިގެން އިތުރު ތަފްސީލް ދެއްވަމުން އުރީދޫގެ ޗީފް ކޮމަރޝަލް އޮފިސަރ ހުސައިން ނިޔާޒު ވިދާޅުވީ އަތޮޅު ރަން ބޭއްވުމުގެ މައިގަނޑު މަގްސަދަކީ ކުޅިވަރު މެދުވެރިކޮށް އެކުވެރިކަމާއި އެއްބައިވަންތަކުގެ ރޫހު ދައްކައި ދިނުން ކަމަށެވެ. އަދި މިދަނޑިވަޅުގައި ރަން ވަރޗުއަލް ރަން އެއްގެ ގޮތުގައި ރާވާފައި މި ވަނީ ގައިދުރުކަމުގެ މުހިންމު ކަަމަށް ވެސް އިސްކަންދީގެން ކަމަށް ހުސައިން ނިޔާޒު ވިދާޅުވިއެވެ. އަދި އެހެން އަހަރުތަކުގައި އުރީދޫ އިން ބާއްވާ ފޯރިގަދަ ކަލަރ ރަން މިއަހަރު ބޭއްވުމަށް އުނދަގޫވެފައިވާ ކަމަށާއި އަތޮޅު ރަން އަކީ އެކި ހިސާބުތަކުގެ ދުވުންތެރިންނާއެކު ކުރިޔަށް ގެންދެވޭ ތަފާތު ރަން އަކަށްވާނެ ކަމަށާއި އެހެންކަމުން މި ރަން އަކީ އެންމެންނަށް ވެސް ކަމުދާނެ ރަންއަކަށް ވާނެ ކަމަށް އުންމީދު ކުރާ ކަމަށް ވެސް ހުސައިން ނިޔާޒު ވިދާޅުވިއެވެ.
މި ރަން ގައި 20 އަތޮޅުން 20 ދުވުންތެރިން ބައިވެރިވުމަށް ވަނީ ހަމަޖެހިފައެވެ. އަދި އަތޮޅު ރަން ކުރިއަށްދާއިރު ސޯޝަލް މީޑިޔާ މެދުވެރިކޮށް ރަންގެ ލައިވް ފޮޓޯ އާއި ވީޑިއޯތައް ބެލުންތެރިންނަށް ފެނިގެންދާނެ ކަމަށް އުރީދޫ އިން ބުނެއެވެ.
