މުސާރަ ނުދީގެން އަނެއްކާވެސް ބިދޭސީންތަކެއް އިހުތިޖާޖު ކޮށްފި
އެ ސަރަޙައްދުގައި ގާތްގަނޑަކަށް 50 ބިދޭސީން އެއްވެ އުޅުނު
ޣިޔާސުއްދީން ސުކޫލް ކުރިމައްޗަށް އެއްވެ ބިދޭސީންތަކެއް އިހުތިޖާޖު ކުރަނީ
މުސާރަ ނުދީގެން މާލޭގައި ބިދޭސީންތަކެއް މުޒާހަރާ ކޮށްފިއެވެ.
"ރާއްޖެ.އެމްވީ" އަށް އެނގިފައިވާ ގޮތުގައި ހޯމަ ދުވަހުގެ ހެނދުނުގެ ވަގުތެއްގައި ބިދޭސީންތަކެއް ވަނީ ޣިޔާސުއްދީން ސުކޫލް ކުރިމައްޗަށް އެއްވެ އިހުތިޖާޖު ކޮށްފައެވެ. އެގޮތުން ބިދޭސީން އިހުތިޖާޖު ކޮށްފައިވަނީ މުސާރަ ނުދޭތީ އާއި، ކުންފުނީގެ ވެރިންގެ އެއްވެސް ޚަބަރެއް ނުވާ ކަމަށް ބުނެއެވެ. އެހެން ނަމަވެސް އިހުތިޖާޖު ކޮށްފައިވަނީ ކޮން ކުންފުންޏެއްގެ ބިދޭސީންނެއް ކަމެއް އެނގިފައެއް ނުވެއެވެ.
އެކަމާ ގުޅޭގޮތުން ފުލުހުން ބުނީ، ހޯމަ ދުވަހުގެ ހެނދުނުގެ ވަގުތެއްގައި ފުލުހުން އެ ސަރަޙައްދަށް ގޮސް، އިހުތިޖާޖު ހުއްޓުވާފައިވާ ކަމަށެވެ. އަދި ބިދޭސީން އަނބުރާ އެ ސަރަޙައްދުން ފޮނުވާލާފައިވާ ކަމަށްވެސް ވަނީ ބުނެފައެވެ.
އެ ސަރަޙައްދުގައި ގާތްގަނޑަކަށް 50 ބިދޭސީން އެއްވެ އުޅުނު ކަމަށް މައުލޫމާތު ލިބެއެވެ. އެހެން ނަމަވެސް ކޮވިިޑް-19 ގެ މި ޙާލަތުގައި 30 މީހުންނަށްވުރެ ގިނައިން އެއްވުންތައް ބޭއްވުން ސަރުކާރުން ވަނީ މަނާކޮށްފައެވެ.
މުސާރައާ ގުޅޭ މައްސަލަތަކުގައި މީގެ ކުރިންވެސް ބިދޭސީން ވަނީ އެކި ފަހަރު މަތިން އިހުތިޖާޖު ކޮށްފައެވެ. އެގޮތުން ބިދޭސީން ލައްވައި މަސައްކަތް ކުރުވައި، އެ މީހުންނަށް ދޭން ޖެހޭ އުޖޫރަ ނުދޭ މައްސަލަތަކެއް މި ފަހުންވެސް ފެންމަތިވެފައިވެއެވެ.
