މިވަގުތު އެންއީއޯސީއަށް އަޕްގްރޭޑް ކުރުމުގެ ވިސްނުމެއް ނެތް: ޑރ. ނަޒްލާ
3 އޯގަސްޓު 2020 | ހޯމަ 07:11ކުރިއަށް އޮތް ތަނުގައި އެންއީއޯސީއަށް އަޕްގްރޭޑް ކުރެވިގެން ދިޔުމުގެ ފުރުސަތު އެބައޮތް
އެންއީއޯސީގެ ނޫސްވެރިންގެ ބައްދަލުވުމެއްގެ ތެރެއިން އެ ސެންޓަރުގެ ތަރުޖަމާން މަބްރޫކް އަޒީޒް އާއި އެޗްއީއޯސީގެ ތަރުޖަމާން ޑރ. ނަޒްލާ ރަފީގް
ހެލްތު އިމަރޖެންސީ އޮޕަރޭޝަން ސެންޓަރ (އެޗްއީއޯސީ) އިން ނޭޝަނަލް އިމަރޖެންސީ އޮޕަރޭޝަން ސެންޓަރ (އެންއީއޯސީ) އަށް އަޕްގްރޭޑް ކުރުމުގެ ވިސްނުމެއް މިވަގުތު ނެތް ކަމަށް އެޗްއީއޯސީގެ ތަރުޖަމާން ޑރ. ނަޒްލާ ރަފީގް ވިދާޅުވެއްޖެއެވެ.
އެންމެ ފުރަތަމަ ރާއްޖެއިން ކޮވިޑް-19 ފެނުމާއެކު ގިނަ އިދާރާތަކެއް އެކުލެވޭ ގޮތަށް ދަަރުބާރުގޭގައި އެންއީއޯސީގެ ނަމުގައި ސެންޓަރެއް ސަރުކާރުން އުފެއްދިއެވެ. އެކަމަކު އޭރު ކޮވިޑާ ދެކޮޅަށް ކުރެވުނު މަސައްކަތުގެ ނަތީޖާ ރަނގަޅު ކަމަށް ނިންމާ، ޖުލައި މަހުގެ އެއްވަނަ ދުވަހު ސަރުކާރުން ވަނީ އެންއީއޯސީ އުވާލާ، އެތަނުގެ ދަށުން ކުރަމުންގެންދިޔަ މަސައްކަތްތައް އެޗްއީއޯސީގެ ދަށަށް ބަދަލުކޮށް ޑައުންގްރޭޑް ކޮށްފައެވެ.
މިހާރު ރާއްޖެއިން 4،000 ށްވުރެ ގިނަ މީހުން ކޮވިޑަށް ޕޮޒިޓިވްވެ، ހޮސްޕިޓަލުގައި ފަރުވާ ހޯދަމުންދާ ފަރާތްތަކުގެ އަދަދުތައް އިތުރުވަމުންދާތީ ގިނަ ބަޔަކު ދަނީ ކަންބޮޑުވުން ފާޅުކުރަމުންނެވެ. އަދި ރާއްޖެއިން ކޮވިޑް-19ށް ޕޮޒިޓިވްވި ދިވެހިންގެ އަދަދު 2،000 ށްވުރެ އިތުރުވެފައިވާއިރު، ޕޮޒިޓިވްވާ ދިވެހިންގެ އަދަދުވެސް ދުވަހެއް ދުވަހަކަށް ދަނީ އިތުރުވަމުންނެވެ.
މާލޭގައި ކޮވިޑް-19 ގެ ކޭސްތައް ފާއިތުވި ދެ ހަފުތާ ތެރޭގައި އިތުރުވެ، ހާލަތު ގޯސްވަމުންދާތީ އެންއީއޯސީ އެނބުރި ގެންނަން ގިނަ ބަޔަކު ދަނީ ގޮވާލަމުންނެވެ. މިކަމާއި ގުޅިގެން ގިނަ ބަޔަކު ސޯޝަލް މީޑިއާގައި އެމީހުންގެ ޝުއޫރުތައް ބަންޑުން ކުރަމުންދާއިރު، އެ މީހުން ބުނަމުންދަނީ އެންއީއޯސީ އުވާލީ މާ އަވަހަށް ކަމަށެވެ.
އެންއީއޯސީން އެޗްއީއޯސީއަށް ޑައުންގްރޭޑް ކުރެވުމާއެކު، އެ ސެންޓަރުގައި މަސައްކަތް ކުރަމުންދާ މުވައްޒަފުންގެ އަދަދުތައްވެސް މަދުކުރެވުނެވެ. އެހެންނަމަވެސް ކޭސްތައް އިތުރުވަމުންދާއިރު، މަދު މުވައްޒަފުންނާއި ވަސީލަތްތަކާއެކު މަސައްކަތް ކުރަންޖެހުމުން ކަންކަމުގައި ގިނަ ވަގުތު ނަގާކަމުގެ ޝަކުވާތައްވެސް ދަނީ އިތުރުވަމުންނެވެ.
އަދި އެޗްއީއޯސީއަށް ބަދަލުވި ފަހުން އާއްމުންގެ ޝަކުވާތައް އިންތިހާއަށް ގިނަވެ، މައްސަލަތައްވެސް ފެންމަތިވަމުން އަންނައިރު، މިކަމާއި ގުޅޭގޮތުން އެޗްއީއޯސީގެ ބަހެއް ހޯދުމަށް "ރާއްޖެ.އެމްވީ" ން އެ ސެންޓަރުގެ ތަރުޖަމާން ޑރ. ނަޒްލާ އަށް ގުޅާލުމުން އޭނާ ވިދާޅުވީ އެންއީއޯސީއަށް ބަދަލުކުރުމުގެ ވިސްނުމެއް މިވަގުތަކު ނެތް ކަމަށެވެ. އެހެންނަމަވެސް ކުރިއަތް އޮތް ތަނުގައި އެންއީއޯސީއަށް އަޕްގްރޭޑް ވެގެންދިޔުމުގެ ފުރުސަތު އެބައޮތް ކަމަށްވެސް ވިދާޅުވިއެވެ.
