މުވައްޒަފުން ޕޮޒިޓިވްވުމާއި ގުޅިގެން ލިސްޓު އާއްމުކުރުން ލަސްވާނެ : ފްލެޓު ކޮމިޓީ

ކޮވިޑް-19 ށް ޕޮޒިޓިވްވެ، ބައެއް މުވައްޒަފުން ކަރަންޓީނު ވާން ޖެހުމުގެ ސަބަބުން ފްލެޓްތަކުގެ މައްސަލަ ބަލާ ކޮމިޓީގެ މަސައްކަތްތައް މެދުކަނޑާލައިފިއެވެ.

އެ ކޮމިޓީގެ ފަރާތުން އާއްމުކޮށްފައިވާ ބަޔާނެއްގައި ބުނެފައިވަނީ ޖުލައި މަހުގެ 28 ވަނަ ދުވަހު، ފްލެޓްތަކުގެ މައްސަލަ ބަލާ ކޮމިޓީގެ މުވައްޒަފަކު ކޮވިޑަށް ޕޮޒިޓިވްވުމާ ގުޅިގެން، ކޮމިޓީގެ ބައެއް މުވައްޒަފުން ކަރަންޓީންކުރަން ޖެހި، ކޮންޓެކްޓް ޓްރޭސިންގގެ މަސައްކަތް ކުރިއަށްގެން ދިއުމަށްޓަކައި ކޮމިޓީގެ މަސައްކަތް ވަގުތީގޮތުން މެދުކަނޑާލަން ޖެހިފައިވާ ކަމަށެވެ.

Advertisement

އަދި އާދީއްތަ ދުވަހު ވެސް ކޮމިޓީގެ އިތުރު މުވައްޒަފަކު ކޮވިޑަށް ޕޮޒިޓިވްވުމާއި އެކު 14 ދުވަހުގެ މުއްދަތަށް، ކޮމިޓީގެ މެންބަރުންނާއި ހުރިހާ މުވައްޒަފުން ގޭގައި ކަރަންޓީނު ވެ ތިބުމަށް ހެލްތު ޕްރޮޓެކްޝަން އޭޖެންސީ (އެޗް.ޕީ.އޭ) އިން ވަނީ އަންގާފައިވާ ކަމަށެވެ.

ފްލެޓު ކޮމިޓީގެ މަސައްކަތްތައް މެދުކަނޑާލަން ޖެހިފައި މިވަނީ ޖުލައި މަހުގެ ފަހުކޮޅު ނުވަތަ އޮގަސްޓް މަހުގެ ކުރީކޮޅު ހިޔާ މަޝްރޫއުގެ ދަށުން ދޫކުރާ ފްލެޓްތައް ލިބޭ، ފަރާތްތަކުގެ ތެރެއިން، މަސައްކަތް ނިމޭ ކެޓަގަރީތަކުގެ ލިސްޓްތައް ޢާންމުކުރުމަށް ނިންމާފައި ވަނިކޮށެވެ.

މިކަމާއި ގުޅިގެން ކޮމިޓީން ބުނެފައިވަނީ މި ހާލަތު ދިމާވީ ލިސްޓު އާއްމު ކުރުމަށް ކުރަންޖެހޭ އެންމެ ފަހުގެ މަސައްކަތްތައް ކުރަމުންދަނިކޮށް ކަމަށާއި އެހެންކަމުން، ލިސްޓުތައް ޢާންމުކުރުން ލަސްވެގެންދާނެ ކަމަށެވެ.

ކޮމިޓީން ވަނީ ޢާންމުކުރުމަށް ނިންމާފައިވާ ކެޓަގަރީތަކުގެ ކުރެވިފައިވާ މަސައްކަތްތަކާއި ނުނިމިހުރި މަސައްކަތްތަކުގެ ތަފްސީލު ހިއްސާކޮށްފައެވެ. އެގޮތުން ޑޮކްޓަރުންނާއި ނަރުހުންގެ ކެޓަރަގަރީގެ ތެރެއިން 284 ފަރާތެއްގެ ފިޒިކަލް ވެރިފިކޭޝަން ފުރިހަމަކޮށްފައިވާއިރު ވެރިފައި ކުރެވިފައިނުވަނީ މާލެ ނޫން އެހެން ރަށެއްގައި ދިރިއުޅޭ އެންމެ ފަރާތެކެވެ. އަދި ޓީޗަރުންގެ ކެޓަގަރީން 720 ފަރާތެއްގެ ފިޒިކަލް ވެރިފިކޭޝަން ފުރިހަމަކޮށްފައިވާއިރު މި ކެޓަގަރީންވެސް ވެރިފައި ކުރެވިފައިނުވަނީ މާލެ ނޫން އެހެން ރަށެއްގައި ދިރިއުޅޭ އެންމެ ފަރާތެކެވެ. މާލޭ ރަށްވެހިން ކެޓަގަރީން 4261 ފަރާތެއްގެ ފިޒިކަލް ވެރިފިކޭޝަން ފުރިހަމަކޮށްފައިވާއިރު ވެރިފައި ކުރެވިފައިނުވަނީ މާލެ ނޫން އެހެން ރަށެއްގައި ދިރިއުޅޭ 23 ފަރާތެކެވެ.

ކޮިމިޓީން ބުނެފައިވަނީ މި ކެޓަގަރީތަކުގެ ފޯމުތަކުގެ ތެރެއިން ފިޒިކަލް ވެރިފިކޭޝަން ފުރިހަމަކުރެވިފައިނުވާ ފޯމަތައް ފިޔަވައި އެހެން ހުރިހާ ފޯމުތަކަށް ޕޮއިންޓް ދިނުމަށް ކުރަންޖެހޭ މަސައްކަތް ނިމިފައިވާކަމަށެވެ. H7 ކެޓަގަރީ ފިޔަވައި އެހެން ހުރިހާ ކެޓަގަރީއެއްގެ ދިރިއުޅުމުގެ ހާލަތު ބެލުމުގެ ޕްރޮސެސް ވަނީ ފަށާފައި ކަމަށެވެ. އެގޮތުން ޖުމްލަ 12013 ފަރާތެއްގެ ދިރިއުޅުމުގެ ހާލަތު ބަލާ ނިމިފައިވާ ކަމަށް ވެސް ކޮމިޓީން ބުންޏވެ.

ކޮމިޓީން ބުނެފައިވަނީ މަސައްކަތް އަލުން ފެށުމާއެކު، ވީ އެންމެ އަވަސް ތާރީޚެއްގައި ލިސްޓްތައް ޢާންމުކުރަން ފަށާނެ ކަމަށެވެ.