އެފްއޭ ކަޕް ކާމިޔާބުކުރެވިއްޖެނަމަ އޮބާމަޔަން އާސެނަލްގައި މަޑުކުރުމުގެ ފުރުސަތު ބޮޑު: އާޓެޓާ
31 ޖުލައި 2020 | ހުކުރު 13:48އާސެނަލުން އެފްއޭ ކަޕް ފައިނަލްގައި ހޮނިހިރު ދުވަހުގެރޭ ނުކުންނާނީ ޗެލްސީއާ ދެކޮޅަށް
އާސެނަލްގެ ކެޕްޓަން ޕިއޭ-އެމެރިކް އޮބާމަޔަން: އޭނާ ހޯދުމަށް ޔޫރަޕްގެ ބޮޑެތި ކްލަބުތަކުން އަންނަނީ މަސައްކަތް ކުރަމުން
އިނގިރޭސި އެފްއޭ ކަޕްގެ ފައިނަލް މެޗަކީ އާސެނަލްގެ ކެޕްޓަން ޕިއޭ-އެމެރިކް އޮބާމަޔަންގެ ކުރިމަގު ނިންމާނެ މެޗު ކަމަށް އާސެނަލްގެ ކޯޗު މިކޭލް އާޓެޓާ ބުނެފިއެވެ.
އާޓެޓާ ބުނީ އެފްއޭ ކަޕްގެ ފައިނަލަކީ މިވަގުތު އާސެނަލަށް ހުރިހާ ގޮތަކުންވެސް މުހިންމު މެޗެއް ކަމަށާއި އެގޮތުން އެޓީމުގެ ކެޕްޓަން އޮބާމަޔަންގެ ކުރިމަގު ކަނޑައަޅާނީވެސް އެމެޗުން ކަމަށެވެ. އެފްއޭ ކަޕް ފައިނަލް މެޗު އާސެނަލުން ކާމިޔާބުކޮށްގެން އޮބާމަޔަން އެޓީމުގައި މަޑުކުރުމުގެ ފުރުސަތު އެބައޮތް ކަމަށް ބުނަމުން އާޓެޓާ ބުނީ އާސެނަލާއެކު ކާމިޔާބީ ހޯދޭނެކަން އޮބާމަޔަންއަށް ވިސްނައިދޭނެ ކަމަށެވެ.
އާސެނަލުން އެފްއޭ ކަޕް ފައިނަލުގައި ހޮނިހިރު ދުވަހުގެރޭ ޗެލްސީއާ ދެކޮޅަށް ނިކުންނައިރު، ޓީމު އޮތީ މި މެޗަށް ވަރަށް ރަނގަޅަށް ތައްޔާރުވެފައި ކަމަށް އާޓެޓާ ބުންޏެވެ. އާޓެޓާ ބުނީ އާސެނަލުން ބޭނުންވަނީ މި ސީޒަން ތައްޓަކާއެކު ނިންމާލަން ކަމަށެވެ.
އެފްއޭ ކަޕްގެ ފައިނަލް މެޗަކީ އާސެނަލްގެ ކެޕްޓަން ޕިއޭ-އެމެރިކް އޮބާމަޔަންގެ ކުރިމަގު ނިންމާނެ މެޗު ކަމަށް އާޓެޓާ ބުނިއިރު، އޮބާމަޔަން ހޯދުމަށް ޔޫރަޕްގެ ބޮޑެތި ކްލަބުތަކުން އަންނަނީ މަސައްކަތް ކުރަމުންނެވެ. އެގޮތުން އޮބާމަޔަން ހޯދަން ޗެލްސީ އާއި ބާސާއިންވެސް އަންނަނީ މަސައްކަތް ކުރަމުންނެވެ.
ގެބޮންއަށް އުފަން އުމުރުން 31 އަހަރުގެ އޮބާމަޔަން މި ވަގުތު އާސެނަލްގެ އެއްބަސްވުމުގައި ހުރީ 2021 ވަނަ އަހަރުގެ ހޫނު މޫސުމުގެ ނިޔަލަށެވެ. އާސެނަލުން އޮބާމަޔަންއަށް އައު އެއްބަސްވުމެއް ދޭން މިހާތަނަށް ކުރި މަސައްކަތް ކާމިޔާބުވެފައެއް ނުވެއެވެ.
މީގެ ދެ އަހަރު ކުރިން ބޮރޫޝިއާ ޑޯޓްމުންޑް ދޫކޮށް 63 މިލިއަން ޔޫރޯއަށް އާސެނަލަށް ސޮއިކުރި އޮބާމަޔަން ވަނީ މިހާތަނަށް އެޓީމަށް ކުޅެދިން 108 މެޗުގައި 68 ލަނޑު ޖަހާފައެވެ.
