އާރާއި ބާރާއި މަގާމުން އިންސާފަށް ލޮޅުމެއް ނުގެނެވޭނެ: ޚުތުބާ
31 ޖުލައި 2020 | ހުކުރު 08:11އިންސާނިއްޔަތުގެ ތިލަފަތަކީ ހަމަހަމަ ތިލަފަތެއް
މިއަދުގެ ހުކުރު ޚުތުބާ އިއްވާފައިވަނީ \'\'ޚުތްބަތުލް ވަދާއުގެ ހިޔާވަހިކަމުގެ ދަށުގައި\'\' މިމައުޟޫއަށް
އިސްލާމްދީނުގައި އިންސާނީވަންތަކަމުގައި އެއްވެސް ތަފާތު ކުރުމެއްނެތް ކަމަށާއި، އާރާއި ބާރާއި މަގާމުން އިންސާފަށް ލޮޅުމެއް ނުގެނެވޭނެ ކަމަށް ހުކުރު ޚުތުބާގައި ބުނެފިއެވެ.
''ޚުތްބަތުލް ވަދާއުގެ ހިޔާވަހިކަމުގެ ދަށުގައި'' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ޚުތުބާގައި ބުނީ އިންސާނުންނަކީ އިންސާނީވަންތަކަމުގައި އެއްމަގާމަކާއި އެއްހައިސިއްޔަތެއް ލިބިގެންވާ އެއް ދަރަޖައިގެ ބައެއް ކަމަށާއި، އިންސާނާ އުފެދުމުގެ އަސްލާއި އިންސާނީ ވަންތަކުގެ ސިފަތަކާއި އިންސާނީ އިހުސާސްތަކަށް ބަލާއިރު އިންސާނިއްޔަތުގެ ތިލަފަތަކީ ހަމަހަމަ ތިލަފަތެއް ކަމަށެވެ.
ޚުތުބާގައި ބުނީ އިންސާނަކަށް ވީތީ، ދޭން ޖެހޭ މަގަމާއި، އިހްތިރާމާއި ރަހްމާއި، ހަމްދަރުދީއާއި އަޅައިލުމާއި، އެހީތެރިކަން ދިނުމުގައި ތަފާތު ކުރުމެއް ނެތް ކަމަށާއި، ގައުމާއި ނަސްލާއި، ގަބީލާއާއި، އާއިލާއަކީ އިންސާނިއްޔަތުގެ ތިލަފަތުގެ ކުރިމަތީގައި އެއްވެސް އަގެއް ބުރަދަނެއް ހުރި އެއްޗެއް ނޫން ކަމަށެވެ.
މީސްތަކުން ކުލައާއި ބުރުސޫރައާއި ޖިންސާއި އުމުރަކީ އެމީހުންގެ މެދުގައި ތަފާތު ކުރެވޭނެ އަސާސެއް ނޫން ކަމަށާއި، އާރާއި ބާރާއި މަގާމާއި، ނުފޫޒާއި މާލާއި ޖާހަކީ އިންސާނީ ހަމަހަމަކަމާއި، އިންސާފަށް ލޮޅުމެއް ގެނެވޭނެ ކަމެއް ނޫން ކަމަށް ޚުތުބާގައި ބުނެފައިވެއެވެ.
މުޖުތަމައުގެ ސަލާމަތަށްޓަކައި އަތުކުރި އޮޅާލަންޖެހޭކަން ފާހަގަކޮށް ޚުތުބާގައި ބުނީ އަހަރުމެންގެ ނަފުސުތަކާއި އެހެން މީހުންގެ ނަފްސުތައް ރައްކާތެރި ކުރުމަށް ތެދުވަން ޖެހޭ ކަމަށާއި، އަހަރުމެންގެ ފުށުން އެއްވެސް މީހަކަށް ގޯނާއެއް ގެއްލުމެއް ދީގެން ނުވާނެ ކަމަށެވެ. މުޖްތަމައާއި ވަތަނުގެ ހިމާޔަތުގައި އަތާއި އަތް ގުޅާލުމަށް ޚުތުބާގައި ގޮވާލާފައިވެއެވެ.
މީގެ އިތުރުން ޚުތުބާގައި ބުނީ މިއީ އިންސާނާގެ އެންމެ މުހިންމު އަސާސީ ދެހައްގު ކަމުގައިވާ ދިރި ހުރުމުގެ ހައްގާއި މިލްކުވެރިކަމުގެ ހައްގު އިސްލާމްދީނުގައި މީގެ ސާދަ ސަތޭކަ ކުރިން ކަށަވަރު ކޮށްދީފައިވާ ކަމަށެވެ. އަދި އިސްލާމް ދީނުގައި މިދެ ހައްގު ކަށަވަރު ކޮށްދީފައި މިވަނީ، ހަމައެކަނި މުސްލިމުންނަކަށް ނޫން ކަމަށް ވެސް ޚުތުބާގައި ބުނެފައިވެއެވެ.
