ރޭގަނޑު 11ން ފަތިހު 5ށް ބޭރުގައި އުޅުން މަނާކޮށް، ފިޔަވަޅު އެޅުމުގައި ހަރުކަށި ވަނީ
ކޮންމެހެން ނިކުންނަން ޖެހިގެން ނޫނީ ބޭރުގައި ނޫޅެން އިލްތިމާސްކޮށްފައިވޭ
ވިލިމާލެ
މާލެސިޓީގައި ރޭގަނޑު 11ން ފަތިހު 5ށް ބޭރުގައި އުޅުން މަނާކޮށްފިއެވެ.
ބުރާސްފަތި ދުވަހު ހެލްތު އިމަރޖެންސީ އޮޕަރޭޝަން ސެންޓަރު (އެޗްއީއޯސީ)ން ބޭއްވި ނޫސްވެރިންގެ ބައްދަލުވުމުގައި ތަރުޖަމާނު ޑރ. ނަޒްލާ ރަފީގް ވިދާޅުވީ ކޮންމެހެން ނިކުންނަން ޖެހިގެން ނޫނީ ބޭރުގައި އުޅޭ ފަރާތްތަކާމެދު ފިޔަވަޅު އެޅިގެންދާނެ ކަމަށެވެ. އަދި މި އެނގުން އިތުރަށް ތަންފީޒު ކުރެވި ހަރުދަނާ ކުރެވިގެންދާނެ ކަމަށް ނަޒްލާ ވިދާޅުވިއެވެ.
ނަޒްލާ އިތުރަށް ވިދާޅުވީ ބޭރުގައި އުޅުން މަނާ ގަޑިތަށް ކަނޑައަޅާފައިވާއިރު އެކަން ބުރާސްފަތި ދުވަހުގެ ރެއިން (މިރެއިން) ފެށިގެން ތަންފީޒު ކުރަން ފަށާނެ ކަމަށެވެ.
ނަޒްލާ ވިދާޅުވީ ޕޮލިސީ ލެވަލްގައި ތިއްބެވި ހުރިހާ ބޭފުޅުންގެ މަޤްސަދަކީ ވެސް ދެވަނަ ލޮކްޑައުންއަކަށް ނުގޮސް ބަލި ކޮންޓްރޯލް ކުރުން ކަަމަށެވެ.
ފުލުހުން ވަނީ މީގެ ކުރިން ވެސް މި ގަޑިތަކުގައި ބޭރުގައި އުޅޭ މީހުންނަށް ނަސޭހަތްތެރިވެފައެވެ. އެހެންނަމަވެސް އޭރު ފިޔަވަޅުތަކެއް ނާޅައެވެ.
ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ކަނޑައަޅާފައިވާ ގަޑިތަކާއި ޚިލާފަށް މަނާގަޑީގައި ބޭރުގައި އުޅުނު 2075 މީހަކަށް ނަސޭހަތްދީފައިވާ ކަމަށް ހެލްތް އިމަޖެންސީ އޮޕަރޭޝަން ސެންޓަރ (އެޗްއީއޯސީ) އިން ބޭއްވި ނޫސްވެރިންގެ ބައްދަލުވުމުގައި ޗީފް އިންސްޕެކްޓަރ އޮފް ޕޮލިސް މުހައްމަދު ޝަރީފް ވަނީ މީގެ އެއްހަފްތާ ކުރިން ވިދާޅުވެފައެވެ.
އައު އާންމު ހާލަތުގައި އަމަލުކުރަންޖެހޭ ގޮތުގެ ގައިޑްލައިންއެއް އެޗްޕީއޭއިން ވަނީ ކަނޑައަޅާފައެވެ.
