މޯލްޑިވިއަނުން ޑާކާއަށް ސީދާ ދަތުރުތައް ބާއްވަނީ

ގައުމީ އެއަރލައިން މޯލްޑިވިއަނުން ބަންގުލަދޭޝްގެ ޑާކާއަށް ސިދާ ދަތުރުތައް ފެށުމަށް ނިންމައިފިއެވެ.

މޯލްޑިވިއަނުން ބުނީ ކޮންމެ ހަފްތާއަކު ދެ ދުވަހު ޑާކައަށް ސީދާ ފުލައިޓްތައް ބާއްވަން ނިންމާފައިވާ ކަމަށާއި، ދަތުރު ކުރާނީ ކޮންމެ އަންގާރަ އަދި ހުކުރު ދުވަހު ކަމަށެވެ. މިއީ ލޮކްޑައުންގެ ފަހުން ރާއްޖެއިން ބޭރުގެ މަންޒިލަކަށް މޯލްޑިވިއަނުން ސީދާ ދަތުރުތައް ބާއްވާ ފުރަތަމަ ފަހަރެވެ.

މޯލްޑިވިއަނުން ބުނީ އެއްކޮޅު ޓިކެޓު ފެށޭ އަގަކީ 433 ޑޮލަރު ކަމަށެވެ. އިތުރު މައުލޫމާތު ހޯދުމަށް މޯލްޑިވިއަންގެ ނަންބަރު 3335544ށް ގުޅުމަށް ބުނެފައިވާއިރު، 72 ގަޑިއިރު ކުރިން ހަދާފައިވާ ކޮވިޑް-19 ގެ ޓެސްޓުގެ ނެގެޓިވް ނަތީޖާ ފުރާއިރު އަތުގައި އޮންނަންވާނެ ކަމަށެވެ. އަދި އެ ޓެސްޓުގެ ނަތީޖާ ޗެކިން ވުމުގެ ކުރިން ދައްކަން ޖެހޭނެ ކަމަށާއި، އިމިގްރޭޝަންގެ އިމުގާ ޕޯޓަލްގައި ފުރުމުގެ 24 ގަޑި އިރު ކުރިން ރަޖިސްޓްރީ ވާން ޖެހޭނެ ކަމަށެވެ.

ކޮވިޑް-19 އާއި ގުޅިގެން ބޭރުގެ މަންޒިލްތަކަށް ކުރާ ދަތުރުތައް ލޮކްޑައުންއާއެކު ހުއްޓުމަކަށް އައި ނަމަވެސް މި ހާލަތާއި ގުޅިގެން އަނބުރާ ގައުމަށް ދާން ބޭނުންވި ބިދޭސީ މަސައްކަތްތެރިން ގެންދިއުމަށް މޯލްޑިވިއަނުން ވަނީ 26 ފުލައިޓް ބާއްވާފައެވެ.

ރާއްޖޭގެ ބޯޑަރު އަލުން ހުލުވާލާފައިވާ އިރު، ރާއްޖެއިން ބޭރަށް ފުރާ އަދި އަންނަ ފަސިންޖަރުން އިމިގްރޭޝަންގެ އިމުގާ ޕޯޓަލްގައި ރަޖިސްޓްރީވުމަށް ވަނީ އަންގާފައެވެ.