އިންޑިއާ ސަރުކާރުން ހިންގާ ނުވަ މަޝްރޫއުއަށް 85 މިލިއަން ރުފިޔާ ދީފީ
28 ޖުލައި 2020 | އަންގާރަ 13:14ހއ ހޯރަފުށީގައި ބޯފެން ބަންދުކުރާ ޕްލާންޓެއް ގާއިމްކުރެވިގެންދާނެ
ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް\'\' ގެ ދަށުން ހިންގާ މަޝްރޫއުތަކަށް ބޭނުންވާ ފައިސާ އިންޑިއާ ސަރުކާރުން ހަވާލުކުރުމަށް ބޭއްވި ރަސްމިއްޔާތުގެ ތެރެއިން
އިންޑިއާ ސަރުކާރުގެ އެހީގައި ރާއްޖޭގައި ކުރިޔަށްގެންދާ ނުވަ މަޝްރޫއުއަކަށް ބޭނުންވާ 85 މިލިއަން ރުފިޔާ ހަވާލުކޮށްފިއެވެ.
''ހައި އިމްޕެކްޓް ކޮމިއުނިޓީ ޑިވެލޮޕްމަންޓް ޕްރޮޖެކްޓް'' ގެ ދަށުން ހިންގާ މަޝްރޫއުތަކަށް ބޭނުންވާ ފައިސާ އިންޑިއާ ސަރުކާރުން ރަމްޒީކޮށް ހަވާލުކުރުމަށް އަންގާރަ ދުވަހު ފޮރިން މިނިސްޓްރީގައި ވަނީ ރަސްމިއްޔާތެއް ބާއްވާފައެވެ.
85 މިލިއަން ރުފިޔާގެ އެހީ ފޮރިން މިނިސްޓަރ އަބްދުﷲ ޝާހިދުއާ ހަވާލުކޮށްދެއްވީ އިންޑިއާއިން ރާއްޖެއަށް ކަނޑައަޅާފައި ހުންނަވާ ސަފީރު ސަންޖޭ ސުދީރުއެވެ.
މި ނުވަ ޕްރޮޖެކްޓަކީ އައްޑޫ ސިޓީ ހިތަދޫ، މަރަދޫ އަދި ހުޅުމީދޫގައި ގޭދޮށު މަސް ފެކްޓްރީ ގާއިމްކުރުމުގެ މަޝްރޫއާއި، އައްޑޫ ސިޓީ ހިތަދޫ، މަރަދޫ، ފޭދޫ، ހުޅުދޫ އަދި މީދޫގައި ފަތުރުވެރިކަމުގެ ޒޯންތައް ތަރައްގީކުރުމުގެ އިތުރުން ހއ ހޯރަފުށީގައި ބޯފެން ބަންދުކުރާ ޕްލާންޓެއް ގާއިމްކުރުމުގެ ޕްރޮޖެކްޓެވެ.
އެ ރަސްމިއްޔާތުގައި ވާހަކަ ދައްކަވަމުން ފޮރިން މިނިސްޓަރު ޝާހިދު ވިދާޅުވީ، ގެދޮށު މަސްފެކްޓަރީ ގާއިމްކުރެވިގެން ދިޔުމުން މަސް ރަނގަޅު އަގެއްގައި ވިކި، މަސް ގަންނަ އަދަދާއި މަހުގެ ކެޕޭސިޓީތައް އިތުރުވެ ސަރަހައްދުގެ ގިނަ ބަޔަކަށް ވަޒީފާގެ ފުރުސަތު ލިބިގެންދާނެ ކަމަށެވެ. ޓޫރިޒަމް ޒޯންތަކުގެ ސަބަބުން ޕްރައިވެޓް އިންވެސްޓްމެންޓްތައް އިތުރުވެ އައްޑޫގެ ސިނާއީ ތަރައްގީއަށް ބަދަލުތަކެއް އަންނާނެ ކަމުގެ އުއްމީދު ޝާހިދު ދެއްވިއެވެ.
ޝާހިދު ވިދާޅުވީ، އިންޑިއާ އާއި ރާއްޖެއާ ދެމެދު ހިންގާ އުމްރާނީ ތަރައްގީގެ މަޝްރޫއުތަކަށް ބަލާއިރު މި ޕްރޮޖެކްޓްތަކަކީ ކުޑަ ޕްރޮޖެކްޓްތަކަކަށްވުން އެކަށީގެންވާ ކަމަށެވެ. އެކަމަކު މިއަކީ އޭގެ ރަނގަޅު އަސަރުކުރާނެ ޕްރޮޖެކްޓްތަކެއްކަން އޭނާ ފާހަގަކުރެއްްވިއެވެ.
މި ޕްރޮޖެކްޓްތަކަކީ މިދިޔަ އަހަރުގެ މާޗް މަހުގެ 17 ވަނަ ދުވަހު ދިވެހިރާއްޖެއާ އިންޑިއާ އާ ދެމެދު ސޮއިކުރެވުނު އެހީގެ އެއްބަސްވުމުގެ ދަށުން ކުރިއަށްގެންދާ ޕްރޮޖެކްޓްތަކެވެ.
ޕްރޮޖެކްޓްތަކަށް ބޭނުންވާ ފައިސާ ދިވެހި ސަރުކާރާ ހަވާލުކުރުމުގެ ރަސްމިއްޔާތުގައި ރައްޔިތުންގެ މަޖިލީހުގެ އައްޑޫ ސިޓީގެ ދެ މެމްބަރުން އަދި ހޯރަފުށީގެ މެމްބަރު އަދި ފޮރިން މިނިސްޓްރީގެ އިތުރުން އިންޑިއާ ހައިކޮމިޝަންގެ އިސް ބޭފުޅުން ބައިވެރިވެވަޑައިގަތެވެ. އަދި އައްޑޫ ސިޓީ މޭޔަރާއި، ހޯރަފުށީ ކައުންސިލްގެ ރައީސްގެ އިތުރުން ރައީސް އޮފީހުގެ އޮފީހުގެ އޮފިޝަލުންނާއި، ފިނޭންސް މިނިސްޓްރީގެ އޮފިޝަލުންގެ އިތުރުން އިންޑިއާގައި ހުންނަ ދިވެހިރާއްޖޭގެ ހައިކޮމިޝަންގެ އޮފިޝަލުން ވަރޗުއަލްކޮށް ބައިވެރިވެވަޑައިގަތެވެ.
