"ޚާރިޖީ ސިޔާސަތުތައް ބައްޓަން ކުރާނީ ޤައުމުތަކާ ގުޅުން ބަދަހިކޮށް، އެކުގައި މަސައްކަތް ކުރެވޭނެ ގޮތަށް"
ރައީސް އެހެން ވިދާޅުވީ، މިނިސްޓްރީ އޮފް ފޮރިން އެފެއާޒްއިން ކުރިއަށްގެންދިޔަ ޑިޕްލޮމެޓިކް ރިސެޕްޝަންގައި
މިނިސްޓްރީ އޮފް ފޮރިން އެފެއާޒްއިން ކުރިއަށްގެންދިޔަ ޑިޕްލޮމެޓިކް ރިސެޕްޝަންގައި ރައީސް ވާހަކަފުޅު ދައްކަވަނީ
ރާއްޖޭގެ ޚާރިޖީ ސިޔާސަތުތައް ބައްޓަން ކުރާނީ ޤައުމުތަކާ ގުޅުން ބަދަހިކޮށް، އެކުގައި މަސައްކަތް ކުރެވޭނެ ގޮތަށް ކަމަށް ރައީސުލްޖުމްހޫރިއްޔާ އިބްރާޙިމް މުޙައްމަދު ސޯލިޙު ވިދާޅުވެއްޖެއެވެ.
މިނިވަން ދުވަހުގެ މުނާސަބަތުގައި ހޯމަ ދުވަހު މިނިސްޓްރީ އޮފް ފޮރިން އެފެއާޒްއިން ކުރިއަށްގެންދިޔަ ޑިޕްލޮމެޓިކް ރިސެޕްޝަންގައި ވާހަކަފުޅު ދައްކަވަމުން ރައީސް ސޯލިޙު ވިދާޅުވީ، ރާއްޖޭގެ ޚާރިޖީ ސިޔާސަތުތައް ބައްޓަން ކުރާނީ ޤައުމުތަކާ ގުޅުން ބަދަހިކޮށް، އެކުގައި މަސައްކަތް ކުރެވޭނެ ގޮތަށް ކަމުގެ ޔަޤީންކަން ދެއްވާ ކަމަށެވެ. އަދި އެކަމުގައި އެކުގައި މަސައްކަތް ކުރެއްވުމަށް ބޭރުގެ ޑިޕްލޮމެޓުން އަރިހުން ރައީސް ވަނީ އެހީތެރިކަމަށް އެދިވަޑައިގެންފައެވެ.
އޭގެ އިތުރުން، މިއަހަރު މިނިވަން ދުވަސް އައިސްފައި މިވަނީ މުޅި ދުނިޔެއަށްވެސް ކޮވިޑް-19 ގެ ބަލިމަޑުކަން ފެތުރިފައިވާ ދަނޑިވަޅެއްގައިކަން ފާހަގަ ކުރައްވައި ރައީސް ސޯލިޙު ވިދާޅުވީ، ކޮވިޑް-19 ގެ ސަބަބުން ބޯޑަރު ބަންދުކޮށް، އެޅި ފިޔަވަޅުތަކުގެ ސަބަބުން އިޤްތިސާދީ ގޮތުން ދިވެހި ޤައުމަށްވެސް ބޮޑެތި ގޮންޖެހުންތަކެއް ކުރިމަތިވި ކަމަށެވެ.
ރައީސް ސޯލިޙު އިތުރަށް ވިދާޅުވީ، ކޮވިޑް-19 އާ ގުޅިގެން ސިއްޙީ ދާއިރާއިން ކުރަމުންދާ މަސައްކަތްތަކާއި، ޚާއްސަކޮށް ފްރަންޓްލައިންގައި މަސައްކަތް ކުރެއްވި ފަރާތްތަކުގެ އަގު ވަޒަން ކުރައްވާ ކަމަށެވެ.
ފޮރިން މިނިސްޓްރީގައި ކުރިއަށް ގެންދިޔަ މި ރަސްމިއްޔާތުގައި ރައީސްގެ އިތުރުން، ފޮރިން މިނިސްޓަރ އަބްދުﷲ ޝާހިދާއި، މިނިސްޓްރީގެ އިސް އޮފިޝަލުން ބައިވެރިވެވަޑައިގެންފައިވާއިރު، އެކި ޤައުމުތަކުގެ ޑިޕްލޮމެޓުންވެސް ވަނީ ވަރޗުއަލްކޮށް ބައިވެރިވެވަޑައިގެން، މިނިވަންދުވަހުގެ ތަހުނިޔާ އަރިސް ކުރައްވާފައެވެ. އަދި ރާއްޖެއަށް އެކި ގޮތްގޮތުން އެހީތެރިވެދެއްވާނެ ކަމުގެ ފުރިހަމަ ޔަޤީންކަން އެބޭފުޅުން ވަނީ ދެއްވާފައެވެ.
