ރާއްޖޭގައި ތިބި ބިދޭސީން ގައުމަށް ފޮނުވާލުމަށް ސަރުކާރުން ކުރަމުންދާ މަސައްކަތުގެ ތެރެއިން ބަންގްލަދޭޝްގެ އިތުރު 200 މީހަކު ފުރުވާލައިފިއެވެ.

މި މީހުން ފުރުވާލާފައިވަނީ ގައުމީ އެއަރލައިން، މޯލްޑިވިއަންގެ ފްލައިޓެއްގައެވެ.

ބިދޭސީން ފޮނުވާލުމުގެ މަސައްކަތް ފަށާފައިވަނީ ކޮވިޑް-19އާ ގުޅިގެން މާލެ ލޮކްޑައުންކުރި ހިސާބުންނެވެ. މި ލޮކްޑައުން ތެރޭގައި ރާއްޖޭގައި ލިޔެކިއުމެއް ނެތި އުޅޭ ބިދޭސީންގެ ތެރެއިން 4205 މީހަކު އަނބުރާ ގައުމަށް ފޮނުވާލާފައިވެއެވެ. މިއާއި އެކު ކޮވިޑާ ގުޅިގެން ސަރުކާރުން ފެށި ވޮލުންޓަރީ ރިޕެޓްރިއޭޝަން ޕްރޮގްރާމުގެ ތެރެއިން އަނބުރާ ގައުމަށް ފޮނުވާލެވުނު ބިދޭސީންގެ ޖުމްލަ އަދަދު ވަނީ 14،000 ގާތްކޮށްފައެވެ.

ރާއްޖޭގައި މަސައްކަތް ކުރާ ބިދޭސީންގެ ތެރެއިން ލައްކައަކާއި ގާތްކުރާ އަދަދަކަށް ގަވާއިދާ ހިލާފަށް ބިދޭސީން އުޅެމުން އަންނަ ކަމަށް ސަރުކާރުން ވަނީ ހާމަކޮށްފައެވެ. މުޅި މައްސަލައަށް ހައްލެއް ގެނައުމުގެ ގޮތުން އިކޮނޮމިކް މިނިސްޓްރީން ދަނީ މިހާރުވެސް މަސައްކަތްތަކެއް ކުރަމުންނެވެ. އެގޮތުން އިކޮނޮމިކް މިނިސްޓަރ ވަނީ އަމާޒަކީ މި އަހަރުގެ ތެރޭގައި 20،000 ބިދޭސީން އެ މީހުންގެ ރުހުމުގައި އަނބުރާ ގައުމަށް ފޮނުވާލުން ކަމަށް ވިދާޅުވެފައެވެ. އަދި އަނބުރާ ގައުމަށް ދާން ބޭނުންވާ ފަރާތްތަކަށް ސަރުކާރުން ވަނީ ލުއި ފަސޭހަ ގޮތްތަކެއް ހުޅުވާލާފައެވެ.

ރާއްޖޭގައި ދިިރިއުޅެމުންދާ ބިދޭސީން ފޮނުވާލުމަށް ސަރުކާރުން ކުރަމުންދާ މަސައްކަތްތަކުގެ ތެރެއިން، އަނބުރާ ގައުމަށް ދާން ބޭނުންވާ ބިދޭސީން ހޯދަން އިކޮނޮމިކް މިނިސްޓްރީން މާލޭ މަގުމަތީގައި ވަނީ ހަރަކާތްތެރިވެފައެވެ.