އުދިނޭޒީ އަތުން މޮޅުވެގެން ޖެހިޖެހިގެން ނުވަވަނަ ފަހަރަށް އިޓާލިއަން ލީގު ކާމިޔާބުކުރަން ލިބުނު ފުރުސަތު ޔުވެންޓަސްއިން ނަގާލައިފިއެވެ.

ބުރާސްފަތި ދުވަހުގެރޭ ކުޅުނު މެޗުން ޔުވެންޓަސް ބަލިވީ 2-1 ގެ ނަތީޖާއަކުންނެވެ. މި މެޗުން މޮޅުވެގެން ޔުވެންޓަސްއަށް ލީގު ޗެމްޕިއަންކަން ކަށަވަރުކުރެވެން އޮތެވެ. މިހާރު އޮތްގޮތުންވެސް ލީގުގައި ބާކީ އޮތް ތިން މެޗުން ޗެމްޕިއަންކަން ހޯދަން ޔުވެންޓަސްއަށް ބޭނުންވަނީ ތިން ޕޮއިންޓެވެ.

އުދިނޭޒީ ދަނޑުގައި ކުޅުނު މެޗު ފަށައިގެން ޔުންޓަސްއިން ވަނީ އުދިނޭޒީގެ ގޯލަށް ނުރައްކާކޮށް ގިނަ ހަމަލާތަކެއް ފޮނުވާލާފައެވެ. އެގޮތުން ޔުވެންޓަސްގެ ޕައުލޯ ޑިބާލާގެ އިތުރުން ކްރިސްޓިއާނޯ ރޮނާލްޑޯއަށްވެސް ވަނީ ލަނޑު ޖަހަން ރަނުގެ ފުރުސަތުތަކެއް ލިބިފައެވެ. ފުރަތަމަ ހާފުގައި ޔުވެންޓަސްއިން ރަނގަޅު ކުޅުމެއް ދެއްކިއިރު، ފުރަތަމަ ހާފު ނިމުމުގެ ކުރިން އެޠީމުން ވަނީ ލަނޑު ޖަހާ ލީޑު ނަގާފައެވެ. މި ލަނޑު މެޗުގެ 42 ވަނަ މިނެޓުގައި އެޓީމަށް ކާމިޔާބުކޮށްދިނީ މަތައިސް ޑިލީޓްއެވެ.

ދެވަނަ ހާފުގައި އުދިނޭޒީން އެޓީމުގެ ކުޅުން ރަނގަޅު ކުރިއިރު، ދެވަނަ ހާފު ފަށައިގެން ހަތްވަނަ މިނެޓުގައި އެޓީމުން ވަނީ ލަނޑު ޖަހާ ނަތީޖާ ހަމަހަމަކޮށްފައެވެ. ކެން ސެމާ ނަގައިދިން ހުރަހަކުން މި ލަނޑު އެޓީމަށް ކާމިޔާބު ކޮށްދިނީ އިލީއާ ނެޓޮރޯވްސްކީއެވެ. އަދި މި މެޗުން އުދިނޭޒީ މޮޅު ކޮށްދިން ލަނޑު މެޗުގެ އިތުރު ވަގުތުގައި އެޓީމަށް ކާމިޔާބު ކޮށްދިނީ ސެކޯ ފޮފާނާއެވެ.

މި ނަތީޖާއާއެކު ޔުވެންޓަސް ތާވަލުގެ އެއްވަނައިގައި އޮތީ ކުޅުނު 35 މެޗުން ކާމިޔާބުކުރި 80 ޕޮއިންޓާއެކުގައެވެ. ދެވަނައިގައި އޮތް އެޓަލާންޓާއަށް 35 މެޗުން 74 ޕޮއިންޓު ލިބިފައިވާއިރު، ތިންވަނައިގައި އިންޓަ މިލާން އޮތީ 35 މެޗުން ލިބުނު 73 ޕޮއިންޓާއެކުގައެވެ.

އަދި ޔުވެންޓަސް އަތުން ހޯދި މޮޅާއެކު ރެލިގޭޝަނުން ސަލާމަތްވާން މަސައްކަތްކުރާ އުދިނޭޒީ މިހާރު އޮތީ ތާވަލުގެ 15 ވަނައިގަ އެވެ. އެ ޓީމަށް 35 މެޗުން ލިބިފައިވަނީ 39 ޕޮއިންޓެވެ.