އިރާނުގެ ބޯޓަކުން މަސްތުވާތަކެތި އެތެރެކުރި މައްސަލައިގައި ހިމެނޭ ބަންދު މީހަކު ކެންސަރު ބަލީގައި މަރުވެއްޖެ

އައިޖީއެމް ހޮސްޕިޓަލުން ކެންސަރަށް ފަރުވާ ހޯދަމުން ދިޔަ ބަންދު މީހެއް ނިޔާވެފައިވާކަމަށް މޯލްޑިވްސް ކަރެކްޝަނަލް ސަރވިސަސްއިން ބުނެފިއެވެ.

ކަރެކްޝަންސްއިން ބުނީ، އީރާންގެ ރައްޔިތެއް ކަމަށްވާ ރަހުމަތުﷲ (49 އަހަރު) ނިޔާވެފައިވަނީ ބުރާސްފަތި ދުވަހުގެރޭ 11:49 ގައި ކަމަށެވެ. އަދި އޭނާއަކީ ދިގު މުއްދަތަކަށް ކެންސަރަށް ފަރުވާ ހޯދަމުން އައި މީހެއް ކަމަށް ކަރެކްޝަންސްއިން ބުނެއެވެ.

އޭގެ އިތުރުން، އޭނާއަކީ މަސްތުވާތަކެތި ޓްރެފިކް ކުރުމުގެ ތުހުމަތުގައި ޝަރީއަތް ނިމެންދެން ހައްޔަރު ކޮށްފައިވާ މީހެއް ކަމަށް ކަރެކްޝަންސްއިން މައުލޫމާތުދެއެވެ. އަދި ރަހުމަތުﷲ ނިޔާވުމާ ގުޅިގެން އެކަން އިންސްޕެކްޓަރ އޮފް ކަރެކްޝަނަލް ސަރވިސް، މޯލްޑިވްސް ޕޮލިސް ސަރވިސް އަދި ހިއުމަން ރައިޓްސް ކޮމިޝަން އޮފް ދަ މޯލްޑިވްސް އަށް އަންގާފައިވާކަމަށްވެސް ބުނެފައިވެއެވެ.

ރަހުމަތުﷲ އަކީ ޑްރަގް ޓްރެފިކް ކުރަން އުޅުނު އިރާނުގެ ބޯޓެއްގެ މައްސަލާގައި ހިމެނޭކަމުގެ ތުހުމަތުގައި ހައްޔަރުކުރި މީހެކެވެ. އެގޮތުން އިރާން ބޯޓުގެ މައްސަލާގައި ބޯޓުގައި ތިބި ހަތް މީހަކު ހައްޔަރު ކޮށްފައިވާއިރު، އެއީ އިރާންގެ ހަ މީހަކާއި ޕާކިސްތާނުގެ މީހެއްކަމަށް ފުލުހުން މީގެ ކުރިން ބުނެފައިވެއެވެ.

ބ. އަތޮޅުގެ ހުޅަނގު ފަޅިން 126 މޭލު ބޭރުން މަސްތުވާތަކެތި ޓްރެފިކް ކުރަން އުޅުނު އިރާން ބޯޓު ފުލުހުން އަތުލައިގަތީ ނިމިދިޔަ އަހަރުގެ މެއި މަހުގެ ތެރޭގައެވެ.