ރޮނާލްޑޯއާ ނުލައި ރެއާލަށް ކާމިޔާބު ހޯދޭނެކަން އެނގޭ: މޮޑްރިޗް

ރެއާލް މެޑްރިޑަށް ކްރިސްޓިއާނޯ ރޮނާލްޑޯއާ ނުލައި ކާމިޔާބު ހޯދޭނެކަން ކުރިންވެސް އެނގޭ ކަމަށް އެ ކްލަބުގެ މިޑްފިލްޑަރު ލޫކާ މޮޑްރިޗް ބުނެފިއެވެ.

މޮޑްރިޗް މިހެން ބުނިއިރު ރެއާލުން ވަނީ މި ސީޒަނުގެ ސްޕެނިޝް ލީގު ކާމިޔާބުކޮށްފައެވެ. މިއީ 2017 ވަނަ އަހަރަށް ފަހު ރެއާލުން ސްޕެނިޝް ލީގު ކާމިޔާބުކުރި ފުރަތަމަ ފަހަރެވެ. އަދި ރެއާލުން މި ސީޒަނުގެ ސްޕެނިޝް ލީގު ނިންމާލީ، މިދިޔަ ސީޒަނުގެ ޗެމްޕިއަން ބާސެލޯނާ އަށްވުރެ ފަސް ޕޮއިންޓު އިތުރަށް ހޯދައިގެންނެވެ.

މޮޑްރިޗް ބުނީ ރޮނާލްޑޯ އަކީ ކިހާފެންވަރެއްގެ ކުޅުންތެރިއެއްކަން އެންމެނަށްވެސް އެނގޭނެ ކަމަށާއި، އޭނާ ކޮށްދިން ކަންކަން ރެއާލުން ހަނދާން ކުރާނެ ކަމަށެވެ. އެކަމަކު ރޮނާލްޑޯ އާއެކު ހޯދި ކާމިޔާބީތައް، ރޮނާލްޑޯ ނުލައިވެސް ހޯދޭނެ ކަމުގެ ފުރިހަމަ ޔަގީންކަން އަބަދުވެސް އޮންނަ ކަމަށާއި، ރެއާލުން ކާމިޔާބީއަށް އަބަދުވެސް މަސައްކަތް ކުރާނެ ކަމަށެވެ.

މޮޑްރިޗް އިތުރަށް ބުނީ ރެއާލްގެ ކޯޗު ޒިނެދިން ޒިދާން އަނެއްކާވެސް ސާބިތުކޮށްދިނީ އޭނާ އަކީ އެންމެ ފެންވަރު ރަނގަޅު އެއް ކޯޗުކަން ކަމަށާއި، ޒިދާނާއެކު ރެއާލަަށް ގިނަ ކާމިޔާބީތަކެއް ހޯދޭނެ ކަމަށެވެ.

ރެއާލްގެ ކުޅުންތެރިންގެ މެދުގައި ހަމަނުޖެހުން އޮންނަ ކަމަށް ބުނާ ވާހަކަ ދޮގު ކުރަމުން މޮޑްރިޗް ބުނީ ރެއާލްގެ އެއްވެސް ކުޅުންތެރިއެއްގެ މެދުގައި ހަމަނުޖެހުމެއް ނެތް ކަމަށާއި، ކޮންމެ ކުޅުންތެރިއެއްވެސް މަސައްކަތް ކުރަނީ އެ ކުޅުންތެރިއެއްގެ އެންމެ ރަނގަޅު ކުޅުމެއް ދައްކާ، ފުރަތަމަ އެގާރައިން ޖާގަ ހޯދުމަށް ކަމަށެވެ.

ރެއާލުން ޔޫރަޕްގެ އެންމެ ބޮޑު މުބާރާތް ތިން ފަހަރު ކާމިޔާބު ކުރުމުގައި ރޮނާލްޑޯގެ ހިއްސާ ބޮޑެވެ. ޖެހިޖެހިގެން ތިން ފަހަރަށް ރެއާލަށް ޔުއެފާ ޗެމްޕިއަންސް ލީގު ކާމިޔާބުކޮށްދިނުމަށްފަހު، 2018 ވަނަ އަހަރު އިޓަލީގެ ޔުވެންޓަސްއަށް ރޮނާލްޑޯ ބަދަލުވީ 117 މިލިއަން ޔޫރޯއަށެވެ. ރޮނާލްޑޯއާ ނުލައި ރެއާލުން ކުޅުނު ފުރަތަމަ ސީޒަނުގައި އެޓީމަށް ތިން ކޯޗަކު އިރުޝާދު ދިންއިރު، އެ ސީޒަނުގައި އެޓީމަށް އެދެވޭ ނަތީޖާއެއް ނެރެވިފައެއް ނުވެއެވެ.