އުރުގުއޭގެ ފޯވާޑް އެޑިންސަން ކަވާނީ ހޯދުމުގެ މަސައްކަތް ލީޑްސް ޔުނައިޓެޑުން ކުރަމުން އަންނަ ކަމަށް ރިޕޯޓުތައް ބުނެފިއެވެ.

އުމުރުން 33 އަހަރުގެ ކަވާނީ ޕީއެސްޖީއާއެކު ހަދާފައިވާ އެއްބަސްވުން މިދިޔަ ޖޫން މަހު ވަނީ ހަމަވެފައެވެ. އެހެންކަމުން ހިލޭ ޓްރާންސްފާއެއްގެ ދަށުން ކަވާނީ ހޯދުމަށް ލީޑްސްއިން ވަނީ މަސައްކަތް ފަށާފައިވާ ކަމަށް ރިޕޯޓުތައް ބުނެއެވެ.

16 އަހަރަށް ފަހު ލީޑްސް އަލުން އިނގިރޭސި ޕްރިމިއާ ލީގަށް ޕްރޮމޯޓް ވެފައިވާއިރު، ރިޕޯޓުތައް ބުނާ ގޮތުން އެޓީމަށް އިރުޝާދުދެމުން އަންނަ އާޖެންޓީނާގެ ކޯޗު މާސެލޯ ބިއެލްސާގެ ސިސްޓަމަށް ކަވާނީ ފެތެއެވެ. އެހެންކަމުން ލީޑްސްގެ މެނޭޖުމަންޓުން ކަވާނީއާ މިހާރު މަޝްވަރާ ކުރަމުން އަންނަ ކަމަށްވެސް ރިޕޯޓުތައް ބުނެއެވެ.

ލީޑްސްއިން ކަވާނީ ހޯދުމުގެ މަސައްކަތް ކުރަމުން އަންނައިރު، ނިއުކާސަލް ޔުނައިޓެޑާއި، އެތުލެޓިކޯ މެޑްރިޑާއި، މެންޗެސްޓާ ޔުނައިޓެޑާއި، ޓޮޓެންހަމް ހޮޓްސްޕާ އަދި ޗެލްސީންވެސް ކަވާނީއަށް ފާރަލަމުން އަންނަ ކަމަށް ރިޕޯޓުތައް ބުނެއެވެ.

އިޓަލީގެ ނާޕޮލީން 2013 ވަނަ އަހަރު 64 މިލިއަން ޔޫރޯއަށް ޕީއެސްޖީއާ ގުޅުނު ކަވާނީ އެ ކްލަބު ދޫކޮށްލާފައިވާއިރު، އޭނާ ވަނީ ޕީއެސްޖީއާއެކު ގިނަ ކާމިޔާބީތަކެއް ހޯދާފައެވެ. އެގޮތުން ޕީއެސްޖީއަށް ކުޅެދިން 301 މެޗުން 200 ލަނޑު ޖަހައިދީފައިވާ ކަވާނީ ވަނީ ޕީއެސްޖީއާއެކު ފްރެންޗު ލީގު ހަ ފަހަރު ހޯދާފައެވެ. އަދި ވަނީ އެ ކްލަބާއެކު ފްރެންޗު ކަޕް ހަތަރު ފަހަރު އަދި ފްރެންޗު ލީގު ކަޕް ފަސް ފަހަރު ކާމިޔާބުކޮށްފައެވެ.