އެމެރިކާގެ ޑިޕާޓްމަންޓް އޮފް ހެލްޑް އެންޑް ހިއުމަން ސަރވިސްއާއި ޑިޕާޓްމަންޓް އޮފް ޑިފެންސުން ފިޒަރއާއެކު އެތައް މިލިއަން ޑޯޒެއްގެ ކޮވިޑް-19އިގެ ވެކްސިން އުފެއްދުމަށް އެއްބަސްވުމަކަށް އައިސްފިއެވެ.

ބުދަ ދުވަހު ވެވުނު މި އެއްބަސްވުމުގެ ދަށުން މުޅި ގައުމަށް ވެކްސިން ފޯރުކޮށްދިނުމަށް 100 މިލިއަން ޑޯޒްގެ ވެކްސިން އުފެއްދުމަށް އެއްބަސްވެފައިވަނީ ވެކްސިނެއް ކާމިޔާބުވު އުފައްދަން ފަށާ ހިސާބުންނެވެ. މި އެއްބަސްވުމުގެ ދަށުން އިތުރު 500 މިލިއަން ޑޯޒްގެ ވެކްސިން ވެސް އުފެއްދުމަށް އެމެރިކާއިން އެދެވިދާނެއެވެ.

އެންމެ ފުރަތަމަ އުފައްދާ ވެކްސިން ލިބެން ޖެހޭނީ ފެޑެރަލް ސަރުކާރަށް ކަމަށް މި އެއްބަސްވުމުގައި ވެއެވެ. އެހެންކަމުން ފިޒަރ އިން ކާމިޔާބު ކަމާއެކު ވެކްސިންއެއް އުފައްދައިފި ނަމަ ވެކްސިން ފުރަތަމަ ދޭން ޖެހޭނީ އެމެރިކާއަށެވެ. ކަން މިހެން އޮތް ނަމަވެސް ބޭސް އުފައްދާ ފިޒަރ އިން އަދި ވެކްސިން އުފެއްދުމަށް 3 މަރުހަލާއެއް ކަޑައްތު ކުރަން ޖެހެއެވެ.

ޑިޕާޓްމަންޓް އޮފް ހެލްޑް އެންޑް ހިއުމަން ސަރވިސްއިން ނެރުނު ނޫސްބަޔާނުގައި ހެލްތް ސެކްރެޓަރީ އެލެކްސް އަޒަރ ވިދާޅުވެފައިވަނީ އޮޕަރޭޝަން "ވަރޕް ސްޕީޑް" ގެ ދަށުން މަސައްކަތް ކުރަމުންދަނީ ދުނިޔޭގެ އެކި ކަންކޮޅުތަކުގައި އުފައްދަމުންދާ ވެކްސިންގެ ތެރެއިން ކާމިޔާބު ވެކްސިންއެއް އުފެއްދުމާއެކު އެމެރިކާގެ ރައްޔިތުންނަށް ބޭނުންވާ ވަރަށް ވެކްސިން ލިބޭތޯ ކަމަށެވެ. އަދި ބުދަ ދުވަހު ވެވުނު އެއްބަސްވުމުގެ ދަށުން މިހާރު ހަދަމުންދާ ވެކްސިން ކާމިޔާބުވެއްޖެ ނަމަ ފިޒަރ އަދި ބައޯއެންޓެކުން 100 މިލިއަން ޑޯޒްގެ ވެކްސިން ފޯރުކޮށްދޭނެ ކަމަށް އެލެކްސް އަޒަރ ވަނީ ވިދާޅުވެފައެވެ.

މި އެއްބަސްވުމުގެ ދަށުން ފުރަތަމަ އުފައްދާ 100 މިލިއަން ޑޯޒްގެ ވެކްސިނަށް 1.95 މިލިއަން ޑޮލަރު، އެމެރިކާގެ ފުޑް އެންޑް ޑްރަގް އޮތޯރިޓީން ވެކްސިން ކާމިޔާބުކަމަށ އިއުލާންކޮށް އާންމުކޮށް ބޭނުންކުރަން ހުއްދަ ދިނުމާއެކު އެ ކުންފުންޏަށް ދެވޭނެއެވެ.

ކާމިޔާބު ވެކްސިނެއް އުފެއްދިއްޖެނަމަ މިހާރު ރާވާފައިވާ ގޮތުން މުޅި ގައުމަށް ވެކްސިން ދިނުމުގެ ޕްރޮގްރާމް މި އަހަރުގެ ހަތަރުވަނަ ކުއާޓާގައި ނުވަތަ ފަހުކޮޅުގައި ލިބޭނެއެވެ. އަދި ވެކްސިން ފޯރުކޮށްދެމުންދާނީ އެމެރިކާގެ ސަރުކާރުގެ އިރުޝާދާއެކު ކަމަށާއި، އެމެރިކާގެ ރައްޔިތުންނަށް އެއްވެސް އަގަކާއި ނުލާ ވެކްސިން ލިބޭނެކަމަށް ބުދަ ދުވަހު ނެރުނު ނޫސްބަޔާނުގައި ބުނެފައިވެއެވެ. ނަމަވެސް ސިއްހީ ހިދުމަތް ފޯރުކޮށްދޭ ފަރާތްތަކުން ވެކްސިންއަށް އިންޝިއުރަންސްގެ ތެރެއިން އަގު ނެގިދާނެކަމަށް ވެސް މި ބަޔާނުގައި ބުނެފައިވެއެވެ.

މި އެއްބަސްވުމާއި ގުޅޭގޮތުން ފިޒަރގެ ޗެއަރ އަދި ސީއިއޯ ޑރ. އަލްބަރޓް ބޯރލާ ވިދާޅުވި މަސައްކަތް ކުރަމުންދަނީ ނުވާނެ ކަންކަން ވުމަށް މަގުފަހިކުރުމަށް ކަމަށާއި، ރައްކާތެރި އަދި ކުރު މުއްދަތެއްގައި ވެކްސިންއެއް ކާމިޔާބުކަމާއެކު ހޯދާ ފޯރުކޮށްދިނުމަކީ މިވަގުތު އެންމެ އިސްކަންދޭ ކަންތައް ކަމަށެވެ.

އެ ކުންފުނިން މީގެ ކުރިން ބުނެފައިވަނީ ޕްރިލިމިނަރީ ޑާޓާތައް ދައްކާ ގޮތުން ފިޒަރ އަދި ބައޯއެންޓެކުން ބުނެފައިވަނީ އުފައްދަމުން އަންނަ ކޮވިޑް-19 ގެ ވެކްސިން ރައްކާތެރިކަމަށް ދައްކާ ކަމަށާއި، ފޭސް އެކެއްގެ މަސައްކަތްތައް ވެސް ކާމިޔާބު ކަމަށެވެ. ނަމަވެސް އިތުރު ދިރާސާތައް އަދި ވެސް ބޭނުންވާ ކަމަށް ބުނެފައިވެއެވެ. އަދި ފޭސް ތިނެއްގެ މަސައްކަތްތައް ކަމާބެހޭ ފަރާތްތަކުން ހުއްދަ ދިނުމާއެކު މި ޖުލައި މަހުގެ ފަހުކޮޅު ފެށުމަށް ތައްޔާރަށް އޮތް ކަމަށް އެ ކުންފުނިން ނެރުނު ބަޔާނެއްގައި މީގެ ކުރިން ވަނީ ބުނެފައެވެ.

މުޅި ދިނުޔޭގައި 100ށް ވުރެ ގިނަ ކުންފުނިތަކުން ކޮވިޑް-19ށް ވެކްސިނެއް އުފައްދަން މަސައްކަތް ކުރަމުން އަންނަ އިރު މި ރޭހުގެ ކުރީގައި އުޅެނީ އޮކްސްފޯޑް ޔުނިވަރސިޓީއެވެ. ބީބީސީގައި ރިޕޯޓް ކޮށްފައިވާ ގޮތުން ޔުނިވަރސިޓީ އޮފް އޮކްސްފޯރޑުން އުފެއްދި މި ވެކްސިން އިންސާނުންގެ ހަށިގަނޑުގައި މަސައްކަތްކުރާ މިންވަރު ދެނެގަތުމަށް ހަދާފައިވާ "ހިއުމަން ޓްރަޔަލް" އިން ކާމިޔާބު ނަތީޖާތަކެއް ވަނީ ނުކުމެފައެވެ. އެގޮތުން އެއްވަނަ މަރުޙަލާގައި 1077 މީހުން ބައިވެރިކޮށްފައިވާއިރު، ވެކްސިން ހަށިގަނޑަށް ޖެހުމުން ހަށިގަނޑުގެ އެތެރޭގައި "އެންޓިބޮޑީސް"އާއި، ވައިރަސްއާ ހަނގުރާމަކުރާ "ވައިޓް ބްލަޓް ސެލްސް" އުފައްދާކަމަށް ހޯދިފައިވާކަމަށް ސައިންސްވެރިންނާ ޙަވާލާދީ ބީބީސީގައި ރިޕޯޓް ކޮށްފައިވެއެވެ.

އޭގެ އިތުރުން، މި މަރުޙަލާގެ ނަތީޖާތަކާއެކު، ކޮވިޑް-19 އަށް ވެކްސިނެއް ހޯދިދާނެ ކަމުގެ އުއްމީދު ބޮޑުވެފައިވާ ކަމަށާއި، ނަމަވެސް އެކަން ކަށަވަރު ކުރުމަށް އިތުރު ޓެސްޓުތައް ހަދަން ޖެހޭކަމަށް ސައިންސްވެރިން ބުނެއެވެ.

ކޮވިޑް-19 އަށް ވެކްސިނެއް ހޯދުމަކީ މިހާރު އެންމެ ހަލުވިމިނުގައި ފާމަސޫޓިކަލް ކުންފުނިތަކުން ކުރަމުންދާ މަސައްކަތެވެ. މިކަން ކުރުމުގައި އެކި ގައުމުތަކުގެ އެކި ޓީމުތައް ހަރަކާތްތެރިވާއިރު އޮކްސްފޯޑް ޔުނިވަރސިޓީން ކުރިޔަށް ގެންދާ ޕްރޮޖެކްޓަކީ އެސްޓްރާޒެނިކާ އާއެކު ކުރިޔަށް ގެންދާ މަޝްރޫޢެކެވެ. އެގޮތުން މި ވެކްސިންއަށް ނަން ދެވިފައިވަނީ AZD1222 (އޭޒެޑްޑީ 1222)ގެ ނަމުންނެވެ.

މީގެ އިތުރުން ކޮވިޑް-19 އަށް ވެކްސިނެއް އުފެއްދުމަށް އިންޑިއާއިން ކުރަމުންދާ މަސައްކަތްތައް ވަރަށް ކާމިޔާބު ކަމަށާއި، ނޮވެންބަރު މަހުގެ ތެރޭގައި ވެކްސިން ލިބޭނެ ކަމުގެ އުންމީދު އެގައުމުން ވަނީ ދީފައެވެ. ވެކްސިން އުފެއްދުމުގެ މަސައްކަތް ކުރަމުންދާ ސީރަމް އިންސްޓިއުޓްގެ ސީއީއޯ އަދަރް ޕޫނަވަލާ ވިދާޅުވީ ވެކްސިން އުފެއްދުމުގެ މަސައްކަތް ވަރަށް ކާމިޔާބު ކަމަށާއި، ވެކްސިންގެ އިންސާނުންގެ ތިންވަނަ ޓްރައަލް ފެށުމުގެ މަސައްކަތް ކުރަމުންދާ ކަމަށެވެ. އެގޮތުން އަންނަ ހަފްތާ ތެރޭގައި އިންސާނުންގެ ތިންވަން ޓްރަޔަލްގެ ފެށޭނެ ކަމުގެ އުންމީދު އެބަ އޮތް ކަމަށް އޭނާ ވިދާޅުވިއެވެ.

މީގެ އިތުރުން އަދަރް ވިދާޅުވީ ވެކްސިން އުފެއްދުމަށް ކުރާ މަސައްކަތުގައި ޓްރަޔަލްތައް ކާމިޔާބުވާ ކަމުގައިވާނަމަ މިވެކްސިން މިއަހަރު ނޮވެންބަރު މަހުގެ ތެރޭގައި ލޯންޗް ކުރުމުގެ އުންމީދު ބޮޑު ކަމަށެވެ.

ދުނިޔޭގެ އެކި ކަންކޮޅުތަކުގައި ކޮވިޑް-19 އަށް ވެކްސިން އުފެއްދުމުގެ 120ށް ވުރެ ގިނަ ޕްރޮގްރާމް ކުރިޔަށްދާއިރު އިންޑިއާގެ އެކި ކުންފުނިތަކުންވެސް ވެކްސިން އުފެއްދުމަށް އަންނަނީ މަސައްކަތް ކުރަމުންނެވެ.

ކަމާބެހޭ މާހިރުން ގަބޫލުކުރާ ގޮތުގައި ކޮވިޑް-19 އަށް ވެކްސިނެއް ލިބޭވަރު ވާނީ އަންނަ 2021 ވަނަ އަހަރުގެ މެދުތެރޭގައެވެ.