މި މަހު ބޭއްވުމަށް ހަމަޖެހިފައިވާ އެތުލެޓިކްސް އެސޯސިއޭޝަން އޮފް މޯލްޑިވްސްގެ ރައީސްގެ މަގާމަށް މިހާރުވެސް އެ މަގާމު ފުރުއްވަމުން އަންނަ މުޙައްމަދު ތޮލާލް އަދި ކުރީގެ ދުވުންތެރިޔާ ޔަޒްނީ ނަޝީދާ (ޔަޒޫ) ކުރިމަތިލައްވައިފިއެވެ.

މި މަހުގެ 29 ވަނަ ދުވަހު އެތުލެޓިކްސް އެސޯސިއޭޝަނުގެ އަހަރީ އާންމު ޖަލްސާ އާއި އިންތިޚާބީ ޖަލްސާ ބާއްވަން ވަނީ ނިންމާފައެވެ.

އެތުލެޓިކްސް އެސޯސިއޭޝަންގެ ހިންގާ ކޮމިޓީއަށް އިންތިޚާބުކުރާ މަގާމުތަކަކީ ރައީސް އާއި، ނައިބު ރައީސް އާއި، ހަޒާންދާރާއި، ހިންގާ ކޮމިޓީގެ އިތުރު ތިން މެންބަރުންގެ އިތުރަށް ހިންގާ ކޮމިޓީގެ އަންހެން މެންބަރެވެ. އިންތިޚާބުގެ މަގާމުތަކަށް ކުރިމަތިލުމުގެ މުއްދަތު އަންގާރަ ދުވަހު ހަމަވިއިރު، ރައީސްގެ މަގާމަށް ކުރިމަތިލެއްވީ ތޮލާލާއި ޔަޒޫއެވެ. އެކަމަކު މީގެ ކުރިން އެތުލެޓިކްސް އެސޯސިއޭޝަނުގެ ރައީސްގެ މަގާމަށް އެ އެސޯސިއޭޝަނުގެ ފުރަތަމަ އިންތިޚާބީ ރައީސް މައިޒާން އަލިމަނިކު (އަލިބެ) ކުރިމަތިލައްވާނެ ކަމުގެ އިޝާރާތެއް ވަނީ ދެއްވާފައެވެ.

ތޮލާލް އިތުރު ދައުރަކަށް އެތުލެޓިކްސް އެސޯސިއޭޝަނުގެ ރައީސްގެ މަގާމަށް ކުރިމަތިލެއްވިއިރު، އޭނާ އަންނަނީ 2012 ވަނަ އަހަރުން ފެށިގެން އެ އެސޯސިއޭޝަނުގެ ރައީސްގެ މަގާމު ފުރުއްވަމުންނެވެ. ދެން މި މަގާމަށް ކުރިމަތިލެއްވި ޔަޒޫ ވަނީ 1994ން 2004ށް ގައުމީ ޓީމަށް ދުވެފައެވެ.

އެތުލެޓިކްސް އެސޯސިއޭޝަނުގެ ރައީސްގެ މަގާމަށް ތޮލާލާއި ޔަޒޫ ކުރިމަތިލެއްވިއިރު، ނައިބު ރައީސްގެ މަގާމަށް ކުރިމަތިލެއްވީ މިހާރުވެސް އެ މަގާމު ފުރުއްވަމުން އަންނަ އަހުމަދު އަޒީލު އެކަންޏެވެ. ހަޒާންދާރުގެ މަގާމަށް ކުރިމަތިލެއްވީ މީގެ ކުރިން އެ މަގާމު ފުރުއްވި މުސްތަފާ މުހައްމަދެވެ.

އިތުރު ތިން މެމްބަރުންގެ މަގާމަށް ވާދަކުރަނީ މިހާރުވެސް އެ މަގާމު ފުރުއްވަމުން އަންނަ މުހައްމަދު ޝުޖާއު އާއި، މުހައްމަދު ޝާހިދާއި، ކުރީގެ ދުވުންތެރިޔާ އިބްރާހީމް އުމަރު އަދި އަލަށް ވާދަކުރާ ހުސެއިން އަމީން ނަސީރާއި، ކުރީގެ ދުވުންތެރިޔާ އަހުމަދު ޝަގީފެވެ. އަންހެން މެމްބަރު ކަމަށް ވާދަކުރަނީ މިހާރު ވެސް އެ މަގާމު ފުރަމުން އަންނަ ޔާސްމީން އަބްދުﷲ އެކަންޏެވެ.