ސްވިމިންގ އެސޯސިއޭޝަން އޮފް މޯލްޑިވްސްގެ ނައިބު ރައީސް އިސްމާއިލް އަލީ ކޮވިޑް-19ށް ޕޮޒިޓިވް ވެއްޖެއެވެ.

އިސްމާއިލް ކޮވިޑް-19ށް ޕޮޒިޓިވްވީ މީގެ ދެ ދުވަސް ކުރިން ހުން އައުމުން، ކޮވިޑަށް ޓެސްޓް ކުރުމުން އަންގާރަ ދުވަހު ލިބުނު ނަތީޖާއިންނެވެ.

އިސްމާއިލް ކޮވިޑް-19ށް ޕޮޒެޓިވް މިވީ އަންނަ ހޮނިހިރު ދުވަހު ސްވިމިންގ އެސޯސިއޭޝަން އޮފް މޯލްޑިވްސްގެ އިންތިޚާބު ބޭއްވުމަށް ހެލްތު ޕްރޮޓެކްޝަން އޭޖެންސީ (އެޗްޕީއޭ) އިން ހުއްދަދިނުމުން، އެ އިންތިޚާބު ބޭވުމަށް ނިންމާފައި ވަނިކޮށެވެ. އިސްމާއިލް އަކީ މި އިންތިޚާބުގައި ނައިބު ރައީސް ކަމަށް ވާދަކުރައްވާ ބޭފުޅާއެވެ.

ސްވިމިންހ އެސޯސިއޭޝަންގެ ނައިބު ރައީސް ކަމުގައި ދެ ދައުރު އަދާކޮށްފައިވާ އިސްމާއިލް އަކީ މެދުނުކެނޑި ގިނަ އަހަރުތަކެއްގައި ފެތުމުގެ ކަންކަމަށް ޚިދުމަތް ކޮށްދީފައިވާ ބޭފުޅެކެވެ. ޖަމާލުންދީން ސްކޫލްގެ ޓީޗަރެއްގެ ގޮތުގައި ހުރިއިރު، އެ ސްކޫލުގެ ދަރިވަރުން ގޮވައިގެން އިނިސްޓަކްޓަރެއްގެ ގޮތުގައި އެންމެ ފުރަތަމަ ފަތާ ޓްރެކަށް އެރުނު އިސްމާއިލް ސްވިމިންގ އެސޯސިއޭޝަންގައި މަސައްކަތް ކުރަން ފަށާފައި ވަނީ 2006 އަހަރުއެވެ. ނައިބު ރައީސް ކަމަށް އައުމުގެ ކުރިން އިސްމާއިލް ވަނީ އެ އެސޯސިއޭޝަންގެ ޖެނަރަލް ސެކްރެޓަރީ ކަންވެސް ކޮށްފައެވެ.

ސްވިމިންގ އެސޯސިއޭޝަންގެ އިންތިޚާބު މީގެ ކުރިން އެޕްރީލް މަހުގެ 11 ވަނަ ދުވަހު ބޭއްވުމަށް ނިންމި ނަމަވެސް، ކޮވިޑް-19 އާ ގުޅިގެން ސްވިމިންގ އެސޯސިއޭޝަންގެ އިންތިޚާބު އޭރު ފަސްކުރިއެވެ. އެ އެސޯސިއޭޝަންގެ އިންތިޚާބު ނުބޭއްވި ލަސްވަމުންދާތީ މިހާރު އެސޯސިއޭޝަން ހިންގަމުންދަނީ ދުނިޔޭގެ ފެތުމުގެ މައި ޖަމިއްޔާ (ފީނާ) އާއި ސްޕޯޓްސް ކޮމިޝަނުގެ ހުއްދަ އާއެކު ހިންގާ ކޮމިޓީގެ ދައުރު ދަމަހައްޓައިގެންނެވެ.

ސްވިމިންގ އެސޯސިއޭޝަންގެ އިންތިޚާބު ހަތަރު ފަހަރަށް މިހާތަނަށް ވަނީ ފަސްކޮށްފައެވެ. ސްވިމިން އެސޯސިއޭޝަންގެ ހިންގާ ކޮމިޓީއަށް މާ ބޮޑެތި ބަދަލުތަކެއް ނެތި ތިން ދައުރު ހަމަކޮށްފައިވާއިރު، ކުރިއަށް އޮތް ދައުރުގައިވެސް އެ ސޯސިއޭޝަންގެ ރައީސްގެ މަގާމަށް ކުރިމަތިލައްވާފައި ވަނީ މިހާރުގެވެސް ރައީސް މުޙައްމަދު އަބްދުއްސައްތާރެވެ.

އެ އެސޯސިއޭޝަންގެ އިންތިޚާބުގައި ނުވަ މަގާމެއް އިންތިޚާބު ކުރުމަށް ހަމަޖެހުފައިވާއިރު، އޭގެ ތެރޭގައި ހިމެެނީ ރައީސް، ނައިބު ރައީސް، ހަޒާންދާރު، ޓެކްނިކަލް އޮފިޝަލުންގެ ގޮނޑި، ކޯޗުންގެ ގޮނޑި، އާންމު މެންބަރުންގެ ތެރެއިން އަންހެން އަދި ފިރެން ގޮނޑި، ކްލަބުތަކުގެ ގޮނޑި، ޖެނަރަލް ސެކްރެޓަރީ އެވެ.