ރާއްޖެ ސަސްޕެންޑް ވެދާނެ އެއްވެސް ކަމެއް މަޖިލީހުން ކުރާނެ ކަމަށް ނުދެކެން: ސުޒޭން

ދިވެހިރާއްޖެ ފުޓްބޯޅައިގެ ހަރަކާތްތަކުން ސަސްޕެންޑް ވެދާނެ އެއްވެސް ކަމެއް ރަޔިތުންގެ މަޖިލީހުން ކުރާނެ ކަމަށް ނުދެކޭ ކަމަށް ގައުމީ ފުޓްބޯޅަ ޓީމުގެ އެސިސްޓަންޓް ކޯޗު އަލީ ސުޒޭން ބުނެފިއެވެ.

ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބު މި މަހުގެ ދެވަނަ ދުވަހު ދުވަހު ބޭއްވިއިރު، ރައްޔިތުންގެ މަޖިލީހުގެ އިޖުތިމާޢީ ކޮމިޓީން އަންނަނީ އެފްއޭއެމްއާ ދޭތެރޭގައި ފިޔަވަޅު އަޅައިދިނުމަށް އެދި ރައްޔިތުންގެ މަޖިލީހަށް މެދު ހެންވޭރު ދާއިރާގެ މެންބަރު އަލީ އާޒިމް ހުށަހެޅުއްވި ކުއްލި މައްސަލަ އިތުރަށް ދިރާސާ ކުރަމުންނެވެ.

އެފްއޭއެމްގެ މައްސަލަ ރައްޔިތުންގެ މަޖިލީހުން ބަލަން ފެށުމާއެކު، ތިންވަނަ ފަރާތަކުން ނުފޫޒު ފޯރުވާނަ ރާއްޖެ ސަސްޕެންޑް ކުރަން ޖެހިދާނެ ކަމުގެ އިންޒާރެއް ފީފާއިން ވަނީ ދީފައެވެ. މިއީ ރާއްޖެއަށް ދެ އަހަރުގެ ތެރޭގައި ކުރިމަތިވި މިފަދަ ދެވަނަ އިންޒާރެވެ.

ރާއްޖެޓީވީގެ "ކުޅިވަރު ފައިލް" ޕްރޮގުރާމުގައި ވާހަކަދައްކަމުން ސުޒޭން ބުނީ މި މައްސަލަ ރައްޔިތުންގެ މަޖިލީހަށް ހުށަހެޅި މެންބަރު އަލީ އާޒިމަކީ އޭއެފްސީގެ އިތުރުން އެފްއޭއެމްގައިވެސް މަސައްކަތް ކުރައްވާފައިވާ ބޭފުޅަކަށްވާތީވެ، ރާއްޖެ ސަސްޕެންޑް ވުމަށް އަލީ އާޒިމްވެސް ބޭނުންފުޅުނުވާނެ ކަމަށެވެ.

ސުޒޭން އިތުރަށް ބުނީ އެފްއޭއެމްގެ އިންތިޚާބުގެ ކަންކަން ދިޔައީ ވަރަށް އޮމާންކޮށް ކަމަށާއި، އެހެންކަމުން ރާއްޖެ ސަސްޕެންޑް ވުމުގެ ވާހަކައަކީ ވަރަށް ދުރު ވާހަކައެއް ކަމަށެވެ. އަދި އެފްއޭއެމްގެ އިންތިޚާބުގައި ޤާނޫނީ ގޮތުން ބަލަން ހުރި ކަމެއް ބެލުން އެއީ އެއްވެސް މައްސަލައެއް ނޫން ކަމަށާއި، އެކަމަކު އެފްއޭއެމްގެ އިންތިޚާބު ބާއްވާފައިވަނީ ހުރިހާ ކަމެއް ފުރިހަމަކޮށްގެން ކަމަށްވެސް ސުޒޭން ބުންޏެވެ. އެހެންކަމުން ދެން ފުޓްބޯޅައާއެކު އެންމެ އެކުގައި ކުރިއަށްދިޔުމަށް ސުޒޭން ގޮވާލިއެވެ.

އެފްއޭއެމްގެ ރައީސްގެ މަގާމަށް ދެވަނަ ދައުރަކަށް ބައްސާމް އަދީލް ޖަލީލް އިންތިޚާބުކުރިއިރު، އެފްއޭއެމްގެ އިންތިޚާބުގައި ރައީސްގެ މަގާމަށް ކުރިމަތިލެއްވީވެސް ބައްސާމް އެކަންޏެވެ. ބައްސާމާއި އޭނާ ހުށަހެޅުއްވި ހިންގާ ކޮމިޓީއަށް އިތުރު ކެންޑިޑޭޓެއް ކުރިމަތިލާފައި ނެތުމުން، ބައްސާމުގެ ޓީމުގެ އިންތިޚާބު ކޮށްފައިވަނީ ވޯޓަކާނުލައެވެ.