މައްސަލަތައް ބެލޭނެ މާހައުލެއް ނެތް ކަމަށް ވިދާޅުވެ ވަޒީފާއާއިބެހޭ ޓްރިބިއުނަލްގެ ރައީސް އިސްތިއުފާ ދެއްވައިފި
މައްސަލަ ރައީސް އޮފީހަށް ގެންދިޔަ
ވަޒީފާއާ ބެހޭ ޓްރިބިއުނަލްގެ ރައީސްގެ މަގާމަށް އަމްޖަދު އައްޔަން ކުރައްވާފައިވަނީ މާޗް މަހު
ވަޒީފާއާ ބެހޭ ގާނޫނުގެ ދަށުން އުފައްދާފައިވާ ވަޒީފާއާ ބެހޭ ޓްރިބިއުނަލްގައި މައްސަލަތައް ބެލޭނެ މާހައުލެއް ނެތް ކަމަށް ވިދާޅުވެ އެ ޓްރިބިއުނަލްގެ ރައީސްކަމުގެ މަގާމުން އަމްޖަދު މުސްތަފާ އިސްތިއުފާ ދެއްވައިފި އެވެ.
މީގެ ކުރިން އިލެކްޝަން ކޮމިޝަން (އީސީ) ގެ ނައިބް ރައީސް ކަމުގެ މަގާމުވެސް ފުރުއްވާފައިވާ އަމްޖަދު، ވަޒީފާއާ ބެހޭ ޓްރިބިއުނަލްގެ ރައީސްގެ މަގާމަށް އައްޔަން ކުރައްވާފައިވަނީ މާޗް މަހުއެވެ.
އަމްޖަދު އިސްތިއުފާ ދެއްވާފައިވަނީ ބުރާސްފަތި ދުވަހުއެވެ. ރާއްޖެ.އެމްވީއާ ވާހަކަ ދައްކަވަމުން އަމްޖަދު ވިދާޅުވީ، ވަޒީފާއާ ބެހޭ ޓްރިބިއުނަލްގެ ރައީސްކަމުގެ މަގާމަށް އައްޔަން ކުރެވުނު ހިސާބުން ފެށިގެން ޓްރިބިއުނަަލްގެ އެތެރެއިންނާއި، ބައެއް މެމްބަރުންގެ ފަރާތުން އެކި ކަހަލަ އުދަނގޫތައް ދިމާވަމުން އައި ކަމަށެވެ. އެކަމަކު އެއީ ކޮން މެމްބަރުންނެއް ކަމެއް އަމްޖަދު ވިދާޅެއް ނުވެއެވެ.
އޭގެ ސަބަބުން ކުރައްވަމުން ގެންދެވި ގިނަ މަސައްކަތްތަކަށް ގޮންޖެހުންތަކެއް ދިމާވެ އެ މައްސަލަ ރައީސް އޮފީހުގެ ސާމަލުކަމަށް ގެންދެވި ކަމަށް އަމްޖަދު ވިދާޅުވިއެވެ. އޭނާ ވިދާޅުވީ، އެ މަގާމަކީ އެތައް ރައްޔިތުންނާ ގުޅިފައިވާ މަގާމަކަށްވީ ހިނދު، ''ޕްރޮފެޝަނަލް'' ކޮށް މަސައްކަތް ކުރެވޭނެ ޖާގައެއް ޓްރިބިއުނަލްގައި ނެތް ކަމަށެވެ.
މައުލޫމާތު ލިބިފައިވާ ގޮތުގައި އަމްޖަދު އެ ވިދާޅުވާ މެމްބަރަކީ، ޓްރިބިއުނަލްގެ ނައިބް ރައީސްގެ މަގާމުގައި ހުންނެވި އާމިނަތު އަބްދުﷲ ޒުހައިރުއެވެ. ޓްރިބިއުނަލްގެ ނައިބް ރައީސްގެ މަގާމަށް އާމިނަތު އައްޔަން ކުރައްވާފައިވަނީ މިދިޔަ އަހަރުގެ މާޗް މަހުއެވެ. އާމިނަތު އަށް ކުރެވޭ ތުހުމަތުތަކާއި ގުޅިގެން ރާއްޖެ.އެމްވީން ގުޅާލުމުން އޭނާ ވިދާޅުވީ، އަމްޖަދާ އެއްވެސް ކަހަލަ މައްސަލައެއް ޖެހިފައިނުވާނެ ކަމަށާއި، ޓްރިބިއުނަލްގެ ހުރިހާ މެމްބަރުންނަކީވެސް ވަރަށް ގުޅިގެން މަސައްކަތް ކުރައްވަމުން އަންނަ މެމްބަރުން ކަމަށެވެ. އަމްޖަދު މަގާމާށް އައްޔަން ކުރެއްވުނުތާ ގިނަ ދުވަސްތަކެއް ނުވަނީސް އާމިނަތު ވަނީ ވިހެއުމުގެ ޗުއްޓީއަކަށް ގޮސްފައެވެ. އެހެންކަމުން މާ ގިނަ ދުވަހު އަމްޖަދާއެކު އޭނާ މަސައްކަތެއް ކުރައްވާފައެއްް ނުވެއެވެ. އޭނާއާ މެދު އެފަދަ ތުހުމަތުތަކެއް ކުރެވޭތީ އާމިނަތު ވަނީ ކަންބޮޑުވުން ފާޅުކުރައްވާފައެވެ. އަމްޖަދު އަށް ގާނޫނީ ވަކީލު ކަމުގެ ހުއްދަ ލިބިވަޑައިގެންނެވީ ދާދި ފަހުންނެވެ.
