ޔޫތް މިނިސްޓްރީން 32 ރަށެއްގައި އައުޓްޑޯރ ޖިމް ހަދައިދޭނެ ފަރާތެއް ހޯދަން އިއުލާންކޮށްފި
17 ޖުލައި 2020 | ހުކުރު 07:07އައުޓްޑޯރ ޖިމްގެ ތަކެތި މާލެއިން ރަށްރަށަށް ގެންދަން ޖެހޭ
މޭލެ ސިޓީގެ ޖިމެއް، ދުޅަހެޔޮ ހަށިހެޔޮ މުޖުތަމައެއް ބިނާ ކުރުމުގެ ގޮތުން ކުޅިވަރާ ބެހޭ ވުޒާރާއިން އަންނަނީ ރަށްތަކުގައި ޖިމްތައް ގާއިމުކުރަމުން
މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓް އިން 32 ރަށެއްގައި އައުޓްޑޯރ ޖިމްގެ ސައިޓް ތައްޔާރުކޮށް އިންސްޓޯލް ކުރުމުގެ މަސައްކަތް ކޮށްދޭނެ ފަރާތެއް ހޯދަން އިއުލާން ކޮށްފިއެވެ.
ޔޫތް މިނިސްޓްރީން ބުނީ 32 ރަށެއްގައި އައުޓްޑޯރ ޖިމްގެ ތަކެތި މާލެއިން ރަށްރަށަށް ގެންގޮސް ސައިޓް ތައްޔާރުކޮށް އިންސްޓޯލް ކުރުމުގެ މަސައްކަތް ކޮށްދޭނެ ފަރާތެއް ހޯދަން ބޭނުންވާ ކަމަށެވެ.
ޔޫތް މިނިސްޓްރީން ބުނީ މިކަމަށް ޝައުގުވެރިވާ މީހުން މައުލޫމާތު ސާފުކުރުމަށްފަހު އެދި ރެޖިސްޓްރީ ކުރުމަށް އެދޭ ކަމަށެވެ. ރެޖިސްޓްރީ ކުރުމަށްޓަކައިaalim.abdul@youth.gov.mvއަދިprocurement@youth.gov.mvއަށް ކުންފުނީގެ (އަމިއްލަ ފަރާތެއް ނަމަ އެ ބޭފުޅެއްގެ) ނަމާއި ބޭނުންކުރާ މެއިލް އެޑްރެސް އަކާއި އަދި ގުޅޭނެ ނަންބަރެއް ހިމެނޭ ގޮތަށް މެއިލް ކުރުމަށް މިނިސްޓްރީން ވަނީ އެދިފައެވެ
ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހުގެ "ދުޅަހެޔޮ ހަށިހެޔޮ ޕްރޮގްރާމް" ގެ ދަށުން ދުޅަހެޔޮ ހަށިހެޔޮ މުޖުތަމައެއް ބިނާ ކުރުމުގެ ގޮތުން ކުޅިވަރާ ބެހޭ ވުޒާރާއިން އަންނަނީ ރަށްތަކުގައި ކުޅިވަރު ކުޅޭނެ ވަސީލަތްތަކާއި ޖިމްތައް ގާއިމު ކުރަމުންނެވެ.
