ސީލައިފްއަށް ފައިސާދިން ގިނަ ފަރާތްތަކަށް ބަދަލު ދެވިއްޖެ: އެޗްޑީސީ
އެ މަޝްރޫއު އެއްވެސް ވަރަކަށް ކުރިޔަށް ގެންގޮސްފައެއް ނުވޭ
އެޗްޑީސީގެ މެނޭޖިންގ ޑިރެކްޓަރ ސުހައިލް އަޙުމަދު
ހުޅުމާލޭގައި 3،000 ފްލެޓް އަޅަން ބުކިން ފީގެ ގޮތުގައި ސީ ލައިފުން ފައިސާ ނެގުމަށް ފަހު މަސައްކަތް ކުރިއަށް ނުގެންދިއުމުން ގެއްލުންވި ގިނަ މީހުންނަށް ބަދަލު ދެވިފައިވާކަމަށް ހައުސިންގ ޑިވޮލޮޕްމަންޓް ކޯޕަރޭޝަން (އެޗްޑީސީން) ބުނެފިއެވެ.
ބުރާސްފަތި ދުވަހުގެ ރޭ ރާއްޖެޓީވީގެ ފަލަސުރުޚީ ޕްރޮގްރާމްގައި ވާހަކަ ދައްކަވަމުން އެޗްޑީސީގެ މެނޭޖިންގ ޑިރެކްޓަރ ސުހައިލް އަޙުމަދު ވިދާޅުވީ، އެ މައްސަލައިގައި ކުރެވުނު މަޝްވަރާތަކަށް ފަހު، ބަދަލު ދިނުމަށް އޭރު ނިންމުނު ކަމަށާއި، ގެއްލުން ލިބުނު މީހުންކަން ކަށަވަރު ކުރުމަށް ބޭނުންވާ ލިއެކިއުންތައް ފުރިހަމަވެފައިވާ އެންމެންނަށް މިހާރު ބަދަލު ދެވިފައިވާ ކަމަށެވެ.
އޭގެ އިތުރުން، އެކަމަށް ހުޅުވާލި ފުރުސަތުގެ މުއްދަތު ހަމަވެގެން އަލުން 10 ދުވަހުގެ ފުރުސަތެއް ހުޅުވާލާފައިވާނެ ކަން ފާހަގަ ކުރައްވައި ސުޙައިލް ވިދާޅުވީ، ޑެޑްލައިން ހަމަވި ފަހުންވެސް ބައެއް ހުށައެޅުން ލިބިފައިވާ ކަމަށެވެ. އަދި އެ ފަރާތްތަކަށް ފައިސާ ދޫކުރުމުގައި ދަތިތަކެއް ހުރިކަމަށް އޭނާ ވިދާޅުވިއެވެ.
ސުހައިލް ވިދާޅުވީ، މިހާތަނަށް ލިއެކިއުންތަކުގެ މައްސަލައެއް ނެތް ހުރިހާ ފަރާތްތަކަށް އަނބުރާ ލާރި ދެވިފައިވާ ކަމަށާއި، މިހާރު ބާކީ ހުރީ އެކިކަހަލަ ސަބަބުތަކާއި ހެދި އަލުން ބަލަން ޖެހޭ ފަރާތްތައް އެކަނި ކަމަށެވެ. އެގޮތުން އެފަދަ 16 ވަރަކަށް ފަރާތެއް ފާހަގަވެފައިވާ ކަމަށް އޭނާ ވިދާޅުވިއެވެ.
ސީލައިފްގެ މައްސަލައިގައި އެޗްޑީސީ އާއި ސަރުކާރާ އެކު އެއްބަސްވެފައިވަނީ އެތަނުން ފްލެޓް ގަތުމަށްޓަކައި ފައިސާ ދެއްކި 203 ފަރާތަކަށް ފްލެޓަށް ދެއްކި ފައިސާ އަނބުރާ ދިނުމަށާއި، ގެއްލުމުގެ ބަދަލުގައި ސަރުކާރުން ކަނޑައަޅާ ހައުސިންގ ސްކީމެއްގެ ދަށުން ހައުސިންގ ޔުނިޓު ދިނުމަށެވެ. ސީލައިފްއަށް ފައިސާދިން ގިނަ ފަރާތްތަކުން ބުކިންގ ފީއާއި ޑައުންޕޭމަންޓް ފައިސާ ވަނީ ދައްކާފައެވެ.
ސީލައިފް ގްލޯބަލް ޕްރައިވެޓް ލިމިޓެޑްގެ ފަރާތުން ހުޅުމާލޭގައި އިމާރާތްކުރަން ހަވާލުކުރެވުނު 3000 ހައުސިންގ ޔުނިޓްގެ މަޝްރޫއު އެއްވެސް ވަރަކަށް ކުރިޔަށް ގެންގޮސްފައެއް ނުވެއެވެ. ސީލައިފް ގްލޯބަލް ކުންފުނީގެ މެނޭޖިން ޑިރެކްޓަރު އަހުމަދު މޫސާ މުހައްމަދު (އައްމަޓީ) އަކީ ކުރީގެ ރައީސް ޔާމީންއާ ގާތް ގުޅުމެއް އޮންނަ މީހެކެވެ.
