ހިޔާ ފްލެޓްތަކަށް ވަދެވޭނީ އަށް މަސް ފަހުން: އަސްލަމް
16 ޖުލައި 2020 | ބުރާސްފަތި 09:40މި މަހު ފަހުކޮޅު ލިޔުންތައް ހަވާލުކުރަން ފެށޭނެ ކަމަށް ފްލެޓް ކޮމިޓީން މައުލޫމާތު ދިން
ހުޅުމާލޭގައި އިމާރާތް ކޮށްފައިވާ ހިޔާ ފްލެޓް
ކުރީގެ ރައީސް އަބްދުﷲ ޔާމީންގެ ސަރުކާރުގައި ބޯހިޔާވަހިކަން ހޯދައި ދިނުމުގެ ގޮތުން ހުޅުމާލޭގައި ގާއިމްކުރި ހިޔާ ފްލެޓްތަކުގެ މަސައްކަތް ނިންމާ، އެ ފްލެޓްތަކަށް ވަންނަން އަށް މަސް ދުވަސް ނަގާނެ ކަމަށް މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓްރަކްޗަރ މުހައްމަދު އަސްލަމް ވިދާޅުވެއްޖެއެވެ.
ބުރާސްފަތި ދުވަހު ބޭއްވި ރައްޔިތުންގެ މަޖިލީހުގެ ގައުމީ ތަރައްގީ އާއި ތަރިކައިގެ ކޮމިޓީ އަށް މިނިސްޓަރު އަސްލަމްއާ، އެ މިނިސްޓްރީގެ އިސްބޭފުޅުންގެ އިތުރުން ކުރީގެ ހައުސިން މިނިސްޓަރު ޑރ. މުހައްމަދު މުއިއްޒު ހާޒިރުކޮށް މެމްބަރުން ވަނީ ހިޔާ ފްލެޓްތަކާއި ގުޅޭ ގޮތުން ގިނަ ސުވާލުތަކެއް ކުރައްވާފައެވެ.
ހިޔާ ފްލެޓްތައް ލިބެންވާ ފަރާތްތަކަށް އެ ފްލެޓް ހަވާލު ކުރަން ކުރެވޭ މަސައްކަތާއި ގުޅޭ ގޮތުން ކޮމިޓީގެ މެމްބަރަކު ސުވާލު ކުރެއްވުމުން އަސްލަމް ވިދާޅުވީ، މި މަަހު ފަހުކޮޅު ފްލެޓްގެ ހައްގުވެރި ފަރާތްތަކުގެ ލިސްޓު އާއްމު ކުރާނެ ކަމަށް ފްލެޓްގެ މައްސަލަ ބަލަން އެކުލަވާލި ކޮމިޓީން މައުލޫމާތު ދީފައިވާ ކަމަށެވެ. އަސްލަމް ވިދާޅުވީ، ފްލެޓް ކޮމިޓީން އިވެލުއޭޓް ކޮށްފައި ނިންމާ ލިސްޓަކީ މުޅިން އައު ލިސްޓަކަށްނވުން އެކަށީގެންވާ ކަމަށެވެ.
މިހާރު ކުރިޔަށްދާ މަސައްކަތުގެ ތަފްސީލު ދެއްވަމުން އަސްލަމް ވިދާޅުވީ، ފްލެޓްތަކަށް މީހުން ވަނުމުގެ ކުރިން ކޮންމެހެން ނިންމަން ޖެހޭ މަސައްކަތްތަކެއް އެބަހުރި ކަމަށެވެ. އެގޮތުން ހަމައެކަނި ތަޅުން އަޅަން ވެސް ދެމަސް ދުވަސް ހޭދަވާނެ ކަމަށް އޭނާ ވިދާޅުވިއެވެ.
ހިޔާ މަޝްރޫއުގެ އަމަލީ މަސައްކަތް ފަށާފައިވަނީ 19 ޑިސެމްބަރު 2017 ގައެވެ. އެގްރީމެންޓްގައިވާ ގޮތުން، 730 ދުވަހުގެ ތެރޭގައި އެ މަޝްރޫއު ނިންމަންޖެހެއެވެ. އެއީ ދެ އަހަރުގެ މުއްދަތެކެވެ. އެހެންކަމުން މި ޕްރޮޖެކްޓް 19 ޑިސެމްބަރު 2019 ހުންނަން ޖެހޭނީ ނިމިފައެވެ. އެކަމަކު އަދިވެސް މި ޕްރޮޖެކްޓްގެ މަސައްކަތް މުޅިއަކުން ނުނިމެއެވެ. ނަމަވެސް މިހާރު 90 ޕަސެންޓް ނިމިފައިވާ ކަމަށް ހައުންސިންގ ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެއެވެ.
ހިޔާ މަޝްރޫއުގެ ދަށުން އިމާރާތްކުރި 16 ޓަވަރަށް ބޭރުން ބަލާލާއިރު ރީތި ގޮތެއް ހުރިނަމަވެސް އެއީ އުޅެން އެންމެ އެކަށީގެންވާ ތަނެއް ނޫން ކަމަށް ބައެއް ފަރާތްތަކުން ސިފަކޮށްފައިވެއެވެ. އަދި ހާއްސަކޮށް، ފްލެޓްތަކުގެ ކޮޓަރިތަކުގެ ސައިޒު ކުޑަކަމާއި، ފާހަނާއާއި ލޯންޑަރީ ބައިގެ ޖާގަ ކުޑަކަމުންނާއި އެތަނުގައި ދިރިއުޅުމެއް، އުޅެން ބޭނުންވާ މީހުންނަށް ބޮޑެތި ދަތިތަކެއް ހުރިކަން ފާހަގަ ކޮށްފައިވެއެވެ.
