އަވަސް އަރުވާލައިގެން ފަގީރުންގެ ލިސްޓަށް ބަދަލު ގެނައުމުން އިންސާފުވެރިއެއް ނުވާނެ
ގެއްލިފައިވާ އިތުބާރު އަލުން އިއާދަކުރަން އެކަށީގެންވާ ފިޔަވަޅުތަކެއް އަޅައިފައިވާ ކަމަށް މިނިސްޓްރީން ބުނި
އިސްލާމިކް މިނިސްޓްރީން ޒަކާތް ބަލައިގަންނަނީ
ކަނޑައެޅިފައިވާ އުސޫލުތަކާ ހިލާފަށް އަވަސް އަރުވާލައިގެން، ހަމަހަމަކަން ގެއްލޭގޮތަށް ފަގީރުންގެ ލިސްޓަށް ބަދަލު ގެނައުމަކީ އިންސާފުވެރި ގޮތެއް ނޫން ކަމަށް އިސްލާމިކް މިނިސްޓްރީން ބުނެފިއެވެ.
އެ މިނިސްޓްރީން އެހެން ބުނެފައިވަނީ، ޒަކާތް ބަހާފައިވަނީ އެންމެ ހައްގުކޮށް ނޫން ކަމަށް ރައްޔިތުންގެ މަޖިލީހުން ކަނޑައަޅާފައި ވަނިކޮށެވެ.
އަންގާރަ ދުވަހު މިނިސްޓްރީން އާއްމުކޮށްފައިވާ ބަޔާނެއްގައި ބުނީ، ޒަކާތް ބެހުމުގެ ކަންކަން އިސްލާމީ ޝަރީއަތުގެ ހަމަތަކާ އެއްގޮތަށް އިސްލާހުކޮށް ގެންނަން ޖެހޭ އިދާރީ ބަދަލުތައް ގެނެސް ޒަކާތުގެ ނިޒާމު ހަރުދަނާކޮށް ވޭތުވެދިޔަ ތަނުގައި ރައްޔިތުންގެ މެދުގައި ނިޒާމާމެދު އުފެދިފައިވާ އޮޅުންބޮޅުންތައް ފިލުވާލައި، ގެއްލިފައިވާ އިތުބާރު އަލުން އިއާދަކުރަން އެކަށީގެންވާ ފިޔަވަޅުތަކެއް އަޅައި އެ ކަމަށް މިނިސްޓްރީން މަސައްކަތް ކުރަމުންދާ ކަމަށެވެ.
މިނިސްޓްރީގެ ބަޔާނުގައި ބުނީ، 1441 ވަނަ އަހަރުގެ ފިތުރު ޒަކާތް ބެހުމަށްޓަކައި ރޯދަ މަހުގެ ކުރިން ފަގީރުންގެ ދަފްތަރު މުރާޖައާ ކުރުމަށް މަސައްކަތް ކުރި ނަމަވެސް ލޮކްޑައުންގެ ހާލަތު މެދުވެރިވުމުގެ ސަބަބުން އެކަން ކުރެވޭ ގޮތް ވެފައިނުވާ ކަމަށެވެ.
ނަމަވެސް، މި އަހަރުގެ ފިތުރު ޒަކާތް ބަހާފައިވަނީ، އަހަރުގެ ކުރީކޮޅު އެކުލަވާލެވުނު ލިސްޓަށް ކަމަށް މިނިސްޓްރީން ބުންޏެެވެ. އެހެން ކަމުން ޒަކާތް ބަހާފައިވަނީ، މި ހިނގާ 1441 ވަނައަހަރު މުރާޖައާ ކުރެވިފައިވާ އާ ލިސްޓަށް ކަމަށާއި، އެއީ 1439 ވަނަ އަހަރުގެ ލިސްޓެއް ނޫންކަމަށާއި، ދެ ސަފަރު 1441 ގައި އެކުލަވާލެވުނު ފަގީރުންގެ ދަފްތަރުކަން ބަޔާންކޮށް، މަޖިލީހުގެ އިދާރާއަށް އެ މައުލޫމާތު ހިއްސާކުރެވިފައި ވާނެ ކަމަށް މިނިސްޓްރީގެ ބަޔާނުގައި ބުންޏެވެ.
ޒަކާތުގެ ކަންކަން ނިންމުމުގައި އަބަދުވެސް އަހަރު ބަލާނީ ހިޖުރީ ތާރީހުންނެވެ. މީލާދީ ތާރީހަކުން ނޫނެވެ. ލޮކްޑައުންގެ ލުޔާއެކު ޖޫން މަހުގެ އެކަކުން ފެށިގެން މުދަލު ޒަކާތް ބެހުމުގެ ކުރިން ފަގީރުންގެ ދަފްތަރު މުރާޖައާ ކުރުމަށްޓަކައި މިނިސްޓްރީން މިހާރު ވަނީ އާއްމުކޮށް ހުޅުވާލާފައެވެ.
އާއްމު ހާލަތުގައިވެސް، މުއައްސަސާތަކުން ހޯދަންޖެހޭ ލިޔެކިޔުންތައް ހަމަކުރުމާއި، ފޯމު ހުށަހެޅުމުގައި ހުރި އެޖެންސީއާއެކު ގިނަ ގޮންޖެހުންތަކުގެ ޝަކުވާ މިނިސްޓްރީއަށް ލިބެމުންދާ ކަމަށް އެ މިނިސްޓްރީން ބުންޏެވެ.
މިނިސްޓްރީން ބުނީ، ފަގީރެއްގެ ގޮތުގައި ހުށައަޅަން ޖެހޭ ލިޔުންތަކަކީ އެކި އިދާރާތަކުން އެއްކުރާ މައުލޫމާތުތަކާއި، އަދި އެ ފަރާތްތަކާއި މަޝްވަރާކޮށްގެން ނިންމާ ނިންމުން ކަމަށެވެ.
އަދި އިސްލާމްދީނުގެ ތިންވަނަ ރުކުން ކަމުގައިވާ ޒަކާތުގެ ޝިއާރާ އެ ނޫންވެސް ދީނުގެ މަތިވެރި ޝިއާރުތައް ގާއިމުކުރުގައި މިނިސްޓްރީން އަމަލުކުރަމުންދާ ގޮތާމެދު އާއްމުންގެ ހިތްތަކުގައި ޝައްކު އުފެދި، އިތުބާރު ގެއްލޭފަދަ އެއްވެސް ކަމެއް ނުކުރުމަށް މިނިސްޓްރީން ވަނީ އިލްތިމާސްކޮށްފައެވެ.
