ޗައިނީސް ސުޕަ ލީގު ފަށާ މެޗުގައި, ކޮރޯނާވައިރަސް (ކޮވިޑް-19) އާ ގުޅިގެން އެންމެ ބޮޑު ގޮންޖެހުމަކާ ކުރިމަތިލާން ޖެހުނު ވޫހާން ޒާލް ފުޓްބޯޅަ ޓީމު ކުޅޭ ގޮތަށް ހަމަޖައްސައިފިއެވެ.

ފެބްރުއަރީ މަހުގެ 22 ވަނަ ދުވަހު ފަށަން ތާވަލުކުރި ޗައިނީސް ސުޕަ ލީގު ކޮވިޑް-19 އާ ގުޅިގެން ފަސްކުރިއިރު، މިހާރު ވަނީ މި މަހުގެ 25 ވަނަ ދުވަހު ލީގު ފެށުމަށް ތާވަލުކޮށްފައެވެ. މި މަހުގެ 25 ވަނަ ދުވަހު ލީގު ފަށާއިރު، ޗައިނާގެ ފުޓްބޯޅަ ސީޒަން ހުޅުވާ މެޗުވެސް ކުޅުމަށް ހަމަޖައްސާފައިވަނީ ހަމަ އެ ދުވަހެވެ.

ސީޒަން ހުޅުވާ މެޗުގައި ގުއަންޒޫ އެވަގްރާންޑޭ އާއި ޝަންހާއި ޝެންހުއާ ބައްދަލުކުރާއިރު، ލީގުގެ ފުރަތަމަ މެޗުގައި ހަމަ އެ ދުވަހު ވޫހާން ޒާލް ނުކުންނާނީ ލީގަށް އަލަށް ޕްރޮމޯޓުވި ޗިންގްޑައީ ހުއާންހާއިއާއެވެ.

ޗައިނީސް ސުޕަ ލީގު ފަށާ މެޗުގައި ވޫހާން ޒާލް ކުޅޭ ގޮތަށް ހަމަޖެއްސިއިރު، ކޮވިޑް-19 އާ ގުޅިގެން އެޓީމު އެނބުރި ގައުމަށް ގޮސްފައިވަނީ 104 ދުވަސް ފަހުން އޭޕްރީލް މަހުގެ ތެރޭގައެވެ.

ކޮވިޑް-19 އެންމެ ފުރަތަމަ ފެތުރެން ފެށިއިރު، ވުހާން ޒާލް ޓީމު ގޮސް ތިބީ ޓްރެއިނިންގ ކޭމްޕެއްގައި ސްޕެއިންގައެވެ. ފަހުން ސްޕެއިންގައި ވެސް ވައިރަހުގެ ނުރައްކާ ބޮޑުވުމާއި ގުޅިގެން ވުހާން ޓީމު ދިޔައީ ޖަރުމަނަށެވެ. އަދި އެއަށްފަހު އެނބުރި ވުހާނަށް އެ ޓީމު ދިޔައީ 104 ދުވަހަށް ފަހުއެވެ.

މި މަހުގެ ފަހުކޮޅު ޗައިނީސް ސުޕަ ލީގުގެ ކުޅުން ފަށާއިރު، މެޗުތައް ކުޅެން ނިންމާފައިވަނީ ސަޕޯޓަރުން ނުވައްދައެވެ.

ކޮވިޑް-19 ގެ އަސަރު އެންމެ ބޮޑަށް ކުރި އެއް ގައުމު ކަމަށްވާ ޗައިނާގައި ވައިރަސް ކޮންޓްރޯލް ކުރެވިފައިވީ ނަމަވެސް، މި އަހަރު އެ ގައުމުގައި ބައިނަލްއަގުވާމީ ގިނަ މުބާރާތްތަކެއް ނުބާއްވަން އެ ގައުމުގެ ސަރުކާރުން މިހާރު ވަނީ ނިންމާފައެވެ. އަދި އެ ގައުމުގެ ފުޓްބޯޅަ ސީޒަން އަލުން ފަށާއިރު، ހާއްސަ އުސޫލުތަކެއް އެ ގައުމުން ވަނީ ކަނޑައަޅާފައެވެ.

ޗައިނާއިން މިހާތަނަށް 83،000 ށްވުރެ ގިނަ މީހުން ކޮވިޑް-19ށް ޕޮޒިޓިވް ވެފައިވާއިރު، އެ ގައުމުން ކޮވިޑް-19 ޖެހިގެން 4،600 ށްވުރެ ގިނަ މީހުން ވަނީ މަރުވެފައެވެ.