ހައްގުތައް ހޯދުމަށް ބިދޭސީންނަށް އަޑުއުފުލިދާނެ، ނަމަވެސް ފުލުހުންނަށް ގެއްލުން ދިނުމަކީ ބަލައިގަނެވޭނެ ކަމެއް ނޫން: ސަލީމް
13 ޖުލައި 2020 | ހޯމަ 07:51މި މުޒާހަރާގައި ހަމަނުޖެހުން ހިންގައި، ބައެއް ފުލުހުންނަށް އަނިޔާވެ، އަދި ފުލުހުންގެ ވެހިކަލްތަކަށް ވަނީ ގެއްލުންދީފަ
ހޯރަފުށި ދާއިރާގެ މެމްބަރު އަހުމަދު ސަލީމް، މަޖިލީހުގެ ޖަލްސާއެއްގައި ވާހަކަދައްކަވަނީ
ހައްގުތައް ހޯދުމަށް ބިދޭސީ މަސައްކަތްތެރިންނަށް އަޑު އުފުލިދާނެ ކަމަށާއި، ނަމަވެސް ފުލުހުންނަށް ގެއްލުން ދިނުމަކީ ބަލައިގަނެވޭނެ ކަމެއް ނޫން ކަމަށް ހޯރަފުށި ދާއިރާގެ މެމްބަރު އަހުމަދު ސަލީމް ވިދާޅުވެއްޖެއެވެ.
އައިލެންޑް އެކްސްޕާޓް ކުންފުނީގެ ބިދޭސީ މުވައްޒަފުންތަކެއް، މުސާރަ ނުލިބޭތީ، އެކަމާ ހިތްހަމަ ނުޖެހުން ފާޅުކުރުމަށް ހޯމަ ދުވަހު ހުޅުމާލޭގައި ކުރިއަށް ގެންދިޔަ މުޒާހަރާއާއި ގުޅިގެން މެމްބަރު ސަލީމް ކުރެއްވި ޓުވީޓެއްގައި ވަނީ ބިދޭސީ މަސައްކަތްކަތްތެރިންނަށް އެމީހުންގެ ހައްގުތައް ހޯދުމަށް އަޑުއުފުލިދާނެ ކަމަށެވެ. ނަމަވެސް، ފުލުހުންނާއި ފުލުހުންގެ އުޅަނދުތަކަށް ހަމަލާދީ ގެއްލުން ދިނުމަކީ ބަލައިގަނެވޭނެ ކަމެއް ނޫން ކަމަށެވެ.
އަދި އެއީ ސުލްހަވެރިކަމާއި އެކު އިހުތިޖާޖުކުރުމެއް ނޫން ކަމަށްވެސް ސަލީމް ވިދާޅުވިއެވެ.
ސަލީމް މިހެން ވިދާޅުވެފައިވާއިރު މި މުޒާހަރާގައި ހަމަނުޖެހުން ހިންގައި، ބައެއް ފުލުހުންނަށް އަނިޔާވެ، އަދި ފުލުހުންގެ ވެހިކަލްތަކަށް ވަނީ ގެއްލުންދީފައެވެ. ފުލުހުން ވަނީ ފަހުން ހަމަނުޖެހުން ކޮންޓްރޯލް ކޮށް ބައެއް ބިދޭސީން ފުލުހުންގެ ބެލުމުގެ ދަށަށް ވެސް ގެނެސްފައެވެ.
ބިދޭސީން ލައްވާ މަސައްކަތް ކުރުވުމަށްފަހު، އެމީހުންނަށް މުސާރަ ނުދޭ މައްސަލައަކީ ފެށުނީއްސުރެން ދައްކަމުން އަންނަ ވާހަކައެކެެވެ. މުސާރަ ނުދީގެން ބިދޭސީން ކުރަމުންދާ މުޒާހަރާތައް ވަނީ މިފަހަކަށް އައިސް އިތުރުވެފައެވެ.
