ތައުލީމުގެ ބިލަށް ޚިޔާލު ހޯދުމަށް ބާއްވާ ބައްދަލުވުމެއް މިރޭ

ތައުލީމުގެ ބިލަށް އާންމުންގެ ޚިޔާލު ހޯދުމަށް ބާއްވާ ބައްދަލުވުމެއް އާދިއްތަ ދުވަހުގެ ރޭ މަޖިލީހުގެ އިދާރާގައި އޮންނާނެކަމަށް މަޖިލީހުން ބުނެފި އެވެ.

ރައްޔިތުންގެ މަޖިލީހުގެ އިދާރާއިން ބުނީ އެއިދާރާގެ 4 ވަނަ ފަންގިފިލާގައި އާދިއްތަ ދުވަހުގެ ރޭ 20:30 ގައި ބައްދަލުވުން އޮންނާނެކަމަށެވެ.

މިބައްދަލުވުމުގައި ޕެނަލިސްޓުންގެ ގޮތުގައި ބައިވެރިވެ ވަޑައިގަންނަވާނީ ބިލް ހުށަހެޅުއްވި ފުވައްމުލަކު ދެކުނު ދާއިރާގެ މެމްބަރު މުޙައްމަދު މުމްތާޒް އާއި ބާރަށު ދާއިރާގެ މެމްބަރ އަހުމަދު އަބްދުﷲ އެވެ. އަދި މިނިސްޓަރ އޮފް ސްޓޭޓް ފޯރ އެޑިޔުކޭޝަން ޑރ އަބްދުﷲ ރަޝީދު އަހުމަދު އާއި އެމްއެންޔޫގެ ލެކްޗަރަރ ލީލާ އަހުމަދުގެ އިތުރުން އިބްރާހީމް އިސްމާއީލް (އިބްރާ) ވެސް މިބައްދަލުވުމުގައި ޕެނަލިސްޓުންގެ ގޮތުގައި ބައިވެރިވެ ވަޑައިގަންނަވާނެ އެވެ.

ބިލު މަޖިލީހަށް ބަލައިގަނެ ގައުމީ ތަރައްގީ އާއި ތަރިކައިގެ ކޮމިޓީން އަންނަނީ މިބިލް ދިރާސާކުރުމުގެ މަސައްކަތް ކުރަމުންނެވެ. ތައުލީމުގެ ބިލުގައިވާ ގޮތުން އުމުރުން ހަތަރު އަހަރުން ފެށިގެން 16 އަހަރާ ދެމެދުގެ ކޮންމެ ކުއްޖަކީ ތައުލީމު ލާޒިމުވާ އުމުރުގެ ކުއްޖެކެވެ. ބިލުގައި ޕްރީ ސްކޫލް ތައުލީމާއި ސާނަވީ ތައުލީމާއި މަތީ ސާނަވީ ތައުލީމު ހިލޭ ކޮށްދިނުމުގެ އުސޫލުތައް ބަޔާން ކޮށްފައިވެއެވެ. އަދި ދަރިވަރުންގެ ހައްގުތަކާއި ބެލެނިވެރިންނާއި ޓީޗަރުންނާއި ސަރުކާރުގެ ޒިންމާތައްވެސް އެ ބިލުގައި ބަޔާންކޮށްފައިވެއެވެ.

ރައްޔިތުންގެ މަޖިލީހުން އަންނަނީ މަޖިލީހަށް ހުށަހެޅޭ ބިލްތަކާއި ގުޅޭގޮތުން އާންމުންގެ ޚިޔާލު ހޯދުމުގެ ބައްދަލުވުންތައް ބާއްވަމުންނެވެ. އެގޮތުން މީގެކުރިން ވަނީ މިނިމަން ވޭޖް ކަނޑައެޅުމާއި ގުޅޭގޮތުންނާއި ފުލުހުންގެ ބިލާއި ބެހޭ ގޮތުން އާންމުންގެ ޚިޔާލު ހޯދުމަށް ބައްދަލުވުން ބާއްވާފައެވެ.