ކުރީގެ މަޝްހޫރު ފުޓްބޯޅަ ކުޅުންތެރިޔާ ޖެކް ކާލްޓަން މަރުވެއްޖެ

1966 ވަނަ އަހަރު އިންގްލެންޑާއެކު ފީފާ ވޯލްޑް ކަޕް ކާމިޔާބުކުރި ކުރީގެ މަޝްހޫރު ޑިފެންޑަރު ޖެކް ކާލްޓަން އުމުރުން 85 އަހަރުގައި މަރުވެއްޖެއެވެ.

ޖެކް ކާލްޓަން މަރުވިއިރު އޭނާ ވަނީ 2019 ވަނަ އަހަރު ކަރުގެ ކެންސަރު ބައްޔަށް ފަރުވާ ކޮށްފައެވެ.

އިންގްލެންޑުން 1966 ވަނަ އަހަރު ވޯލްޑް ކަޕް ތަށި ކާމިޔާބުކުރިއިރު އެޓީމުގެ ފަހަތުގައި ކާލްޓަން ވަނީ މުހިންމު ދައުރެއް އަދާކޮށްފައެވެ.

ކާލްޓަންގެ އާއިލާއިން އޭނާ މަރުވިކަން ޔަގީންކޮށްދީ ނެރުނު ބަޔާނުގައި ބުނެފައިވަނީ އޭނާ މަރުވީ ކެންސަރުގެ ބައްޔަށް ފަރުވާ ހޯދަމުން ދަނިކޮށް ކަމަށެވެ. އަދި ބުނީ އޭނާގެ ދިރިއުޅުމުގައި ހޯދައިފައިވާ ކާމިޔާބީތަކާމެދު އާއިލާއިން ފަޚުރުވެރިވާ ކަމަށާއި، އޭނާގެ މަރަކީ އާއިލާއަށް ފޫނުބެއްދޭނެ ވަރުގެ ގެއްލުމެއް ކަމަށެވެ.

އިނގިރޭސި އެފްއޭއިން ހުކުރު ދުވަހު ކުރި ޓްވީޓެއްގައި ބުނެފައިވަނީ ކާލްޓަން އަކީ މިހާތަނަށް ދުނިޔޭގައި އުފެދުނު އެންމެ މޮޅު ޑިފެންޑަރުންގެ ތެރޭގައި ހިމެނޭ ކުޅުންތެރިއެއް ކަމަށާއި އޭނާގެ މަރަކީ އިނގިރޭސި ފުޓްބޯޅައަށް ލިބުނު ހިތާމަވެރި ޚަބަރެއް ކަމަށެވެ.