ތާށިވެގެން އަބަދަކު ނުތިބެވޭނެ، ސަލާމަތުގެ އައްސޭރި އަށް ގެންގޮސްދޭނަން: ރައީސް ނަޝީދު
7 ޖުލައި 2020 | އަންގާރަ 19:30މައިމޫނާ އަށް ވަރަށް ބޮޑަށް ތައުރީފް ކުރެއްވި
އެމްޑީޕީ ގައުމީ މަޖިލީހުގައި، ރައީސް ނަޝީދު ވާހަކަފުޅު ދައްކަވަނީ
ކޮވިޑާ ހެދި ރާއްޖެ ވެއްޓިފައި މިއޮތް އަނދަވަޅުން އަރައި، ރައްޔިތުން ސަލާމަތުގެ އައްސޭރިއަށް އެމްޑީޕީން ގެންގޮސްދޭނެ ކަމަށް އެ ޕާޓީގެ އަދި ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.
އެމަނިކުފާނު އެހެން ވިދާޅުވީ، އެމްޑީޕީގެ ގައުމީ މަޖިލީހުގައި ޕާޓީގެ މެމްބަރުންނާ ބައްދަލުކުރައްވާ ދެއްކި ވާހަކަފުޅުގައެވެ.
އަންގާރ ދުވަހުގެރޭ ޖަމާލުއްދީން ސްކޫލުގެ ހޯލުގައި ބޭއްވި ބައްދަލުވުމުގައި ރައީސް ނަޝީދު ވިދާޅުވީ، ކޮވިޑް-19 ގެ ސަބަބުން މުޅި ދުނިޔެއަށް އައި ތާށިކަމާއި އެކު ރާއްޖެވެސް ވަރަށް ބޮޑަށް ބަންދުވެފައިވާ ކަމަށެވެ.
ފަތުރުވެރިން ނައުމާއި ގުޅިގެން އާމްދަނީ ދަށްވެފައިވާ މި ދަނޑިވަޅުގައިވެސް، މަސްވެރިން ކިރާ މަސް ވިއްކާލުމަކީ ކިރިޔާވެސް ލިބޭ ހިތްހަމަޖެހުމެއް ކަމަށް ވިދާޅުވިއެވެ.
ރައީސް ނަޝީދު ވިދާޅުވި ގޮތުގައި، ކޮވިޑުގެ ބަލިމަޑުކަން އިތުރަށް ފެތުރުނާ ނުދީ ކޮންޓްރޯލް ކުރެވިފައިވަނީ ސަރުކާރުން އަޅަމުން ގެންދިޔަ ހަރުދަނާ ފިޔަވަޅުތަކުގެ ސަބަބުންނެވެ. އެމަނިކުފާނު ވަނީ ޑިރެކްޓަރ ޖެނެރަލް އޮފް ޕަބްލިކް ހެލްތް މައިމޫނާ އަބޫބަކުރްގެ މަސައްކަތަށް ވަރަށް ބޮޑަށް ތައުރީފްކުރައްވާފައެވެ.
ފޯރިއާ ޖޯޝުގައި ވާހަކަ ދައްކަވަމުން ރައީސް ނަޝީދު ވިދާޅުވީ، ކޮވިޑުގެ ބަލިމަޑުކަން ފެތުރެމުންދާއިރު ރައްޔިތުންގެ މައްޗަށް ވެރިކަން ކުރަން އެމްޑީޕީ ދެއްވިކަން، އެއީ އެންމެ ބޮޑު އެއް ނަސީބު ކަމަށެވެ.
އެމްޑީޕީން ދެވަނަ ފަހަރަށް ވެރިކަމަށް އައީ ރައީސް ނަޝީދު ސިފަކުރެއްވި ގޮތުގައި ތަންދޮރު އެނގޭ ބައެއްގެ ގޮތުގައެވެ. އެމްޑީޕީގެ ރައީސް ވިދާޅުވި ގޮތުގައި ވާދަވެރިން ''ރޫޅި'' ނިމިއްޖެއެވެ. އަދި އެހެން ޕާޓީތަކުންވެސް މިހާރު ހިނގަމުންދަނީ އެމްޑީޕީގެ ފިޔަވަޅު ފަހަތުންނެވެ.
.
ރައީސް ނަޝީދު ވިދާޅުވީ، އެމްޑީޕީން ރައްޔިތުންނަށް ވީ ވައުދު އެ ޕާޓީން ހަނދާނެއް ނުނެތޭއެވެ. ހާލަތުން އަރައިގަންނައިރު އެ ޕާޓީން ރައްޔިތުންނަށް ވެފައިވާ ވައުދު ފުއްދުމާއިގެން ކުރިޔަށް ދާނެކަން ފާހަގަކުރެއްވިއެވެ.
