ޖިންސީ ގޯނާގެ މައްސަލަތަކަށް އިންސާފު ހޯދައިދޭނަން: ރައީސް ނަޝީދު

އެއްވެސް ބަޔަކަށް ތަފާތު ކުރުމެއް ނެތި ޖިންސީ ގޯނާގެ މައްސަލަތަކަށް އިންސާފުު ހޯދައިދޭން އެމްޑީޕީން މަސައްކަތްކުރާނެ ކަމަށް އެ ޕާޓީގެ ރައީސް، ރައީސް މުހައްމަދު ނަޝީދު ވިދާޅުވެއްޖެއެވެ.

ރައީސް ނަޝީދު އެހެން ވިދާޅުވި، އެމްޑީޕީ ގައުމީ މަޖިލީހުގެ ބައްދަލުވުމުގައެވެ.

އެމަނިކުފާނު ވިދާޅުވީ، އަންހެނުންނަށް ކުރާ ޖިންސީ ގޯނާގެ މައްސަލަތަކާއި ދެކޮޅަށް އަޑު އުފުލައި އެކަމަށް އެންމެ ބޮޑަށް މަސައްކަތްކުރާ ޕާޓީއަކީ އެމްޑީޕީ ކަމަށެވެ. ރައީސް ނަޝީދު ސިފަކުރެއްވި ގޮތުގައި ޖިންސީ ގޯނާގެ މައްސަލަތަކުގައި ފާޑުކިޔުމަކީ ލިބޭ އުފަލެކެވެ.

އެމަނިކުފާނު ވިދާޅުވި ގޮތުގައި ޖިންސީ ގޯނާގެ މައްސަލަތަކަށް އިންސާފު ހޯދައިދޭން އެމްޑީޕީ އެއްވެސް ވަރަކަށް ފަހަތަށް ނުޖެހޭނެއެވެ.

ޖިންސީ ގޯނާގެ މައްސަލަތަކަށް އިންސާފު ހޯދައިދެއްވާނެ ކަމަށް ރައީސް ނަޝީދު ވިދާޅުވެފައިމިވަނީ، މި ފަދަ މައްސަލަތައް ފެންމަތިވަމުން އަންނަ ދަނޑިވަޅެއްގައެވެ.

މި ދޭތެރެއިން އެންމެ ބޮޑަށް ވާހަކަ ދެކެވެމުން ދިޔައީ ހުޅުމާލޭގައި ފަޅުގައި އޮތް ސަފާރީއެއްގައި ހުރި ކެންޔާގެ ޒުވާނަކު ރޭޕްކުރި ވާހަކައެވެ. އެ މީހާ އަށް ޖިންސީ ގޯނާކުރި ދެ މީހުން ދޫވި މައްސަލާގައި ފުލުހުންނަށާއި ސަރުކާރަށް ވަރަށް ބޮޑަށް ފާޑުކިޔުން އަމާޒުވިއެވެ.

ބައެއް ފަރާތްތަކުން ދަނީ އެ މީހުން ދިމާވީ ސިޔާސީ ނުފޫޒުން ކަމަށް ބުނަމުންނެވެ. ރައްޔިތުންގެ މަޖިލީހުން ދަނީ ވަރަށް ބޮޑު އިސްކަމެއްދީގެން މި މައްސަލަ ބަލަމުންނެވެ. ޖިންސީ ގޯނާގެ މައްސަލަތައް އެންމެ އެކަށީގެންވާ ވަރަށް އިދާރާތަކުން ސަމާލުކަން ނުދޭ ކަމުގެ ޝަކުވާ އަބަދުވެސް އޮވެއެވެ. އޭގެ ސަބަބުން އިންސާފަށް ކުރަން ޖެހޭ ދަތުރު ދިގުވެ ދެން ނިކުންނަ މައްސަލަތައް ބޮޑުވެއެވެ.