އަލުން ފުޓްބޯޅަ ފެށުމުގެ ގޮތުން އެމެރިކާ ކްލަބުތަކުގެ މެދުގައި ބުދަ ދުވަހު ފަށާ "އެމްއެލްއެސް އިޒް ބެކް" މުބާރާތުގައި ނުކުޅެން އެފްސީ ޑަލަސްއިން ނިންމައިފިއެވެ.

ކޮރޯނާވައިރަސް (ކޮވިޑް-19) ގެ މެދުކެނޑުމަށްފަހު އެމެރިކާގައި ފުޓްބޯޅަ އަލުން ފެށުމަށް މޭޖާ ލީގު ސޮކާ (އެމްއެލްއެސް) އިން ވަނީ ހާއްސަ މުބާރާތެއް ބޭއްވުމަށް ތާވަލުކޮށްފައެވެ. "އެމްއެލްއެސް އިޒް ބެކް" މި ނަމުގައި ކުރިއަށްދާ މި މުބާރާތް ބުދަ ދުވަހު ފަށާއިރު، މި މުބާރާތުގެ މެޗުތައް ކުޅުމަށް ހަމަޖެހިފައިވަނީ ފްލޮރިޑާގެ ސިޓީއެއް ކަމަށްވާ އޯލަންޑޯގައި ހުންނަ ޑިޒްނީ ވޯލްޑް ރިސޯޓުގައެވެ.

26 ޓީމުގެ މެދުގައި ބާއްވާ މި މުބާރާތުގައި ކުޅުން އެއްވެސް ޓީމަކަށް އަދި ކުޅުންތެރިއަކަށް މަޖުބޫރު ކޮށްފައިނުވާއިރު، ދާދި ފަހުން ޑަލަސްއިން ވަނީ މުބާރާތުގައި ނުކުޅެން ނިންމާފައެވެ. އެ ޓީމުން މި މުބާރާތުގައި ނުކުޅެން ނިންމީ 10 ކުޅުންތެރިއަކު ކޮވިޑް-19 ށް ޕޮޒިޓިވްވުމާ ގުޅިގެންނެވެ. ޑަލަސްގެ އިތުރުން ބައެއް މަޝްހޫރު ކުޅުންތެރިންވެސް ވަނީ އެކި ސަބަބުތަކަށްޓަކައި މުބާރާތުގައި ނުކުޅެން ނިންމާއެވެ.

ހާއްސަ މުބާރާތަކާއެކު އެމެރިކާގައި ފުޓްބޯޅަ އަލުން ފަށާއިރު، ކޮވިޑް-19 އާ ގުޅިގެން މާޗު މަހުގެ އަށްވަނަ ދުވަހުން ފެށިގެން މޭޖާ ލީގުގެ ކުޅުން ވަނީ މެދުކަނޑާލާފައެވެ. އަދި މީގެ ކުރިން މޭޖާ ލީގުން ވަނީ މިއަހަރު ބޭއްވުމަށް ތާވަލުކޮށްފައި އޮތް ތިން އިވެންޓެއް ކެންސަލް ކޮށްފައެވެ. މޭޖާ ލީގުން ކެންސަލް ކޮށްފައިވަނީ މިއަހަރުގެ އޯލް-ސްޓާ މެޗާއި، ލީގްސް ކަޕްގެ އިތުރުން ޗެމްޕިއަންސް ކަޕެވެ. މޭޖާ ލީގުން ބުނީ މިއަހަރުގެ އިވެންޓުތައް ކެންސަލް ކުރި ނަމަވެސް، އަންނަ އަހަރު މި އިވެންޓުތައް ބާއްވާނެ ކަމަށެވެ.