އުތުރާއި ދެކުނުގެ ޕޯޓަށް އެތެރެކުރާ ގިނަ މުދަލުން 50 އިންސައްތަ ޑިއުޓީ ކަނޑާލަން ކޮމިޓީން ފާސްކޮށްފި
މިއިސްލާހު ފާސްކޮށްފައިވަނީ މިއިސްލާހުތައް ދިރާސާކުރި މުޅި މަޖިލީހުގެ ކޮމިޓީން
ރައްޔިތުންގެ މަޖިލީހުގެ ޖަލްސާއެއްގެ ތެރެއިން
އައްޑޫ ސިޓީ އަދި ކުޅުދުއްފުށީގައި ގާއިމު ކޮށްފައިވާ ޕޯޓުތަކަށް އެތެރެކުރާ ގިނަ ބާވަތުގެ މުދަލުގެ ޑިއުޓީއިން 50 އިންސައްތަ ކުޑަކުރުމަށް އިމްޕޯޓް އެކްސްޕޯޓް ގާނޫނަށް ހުށަހެޅި އިސްލާހުތައް ދިރާސާކުރި މުޅި މަޖިލީހުގެ ކޮމިޓީން ފާސްކޮށްފިއެވެ.
އިމްޕޯޓު އެކްސްޕޯޓް ޤާނޫނަށް އިސްލާހު ގެނައުމަށް ހުށަހެޅުއްވީ ގަމު ދާއިރާގެ މެމްބަރ މުހައްމަދު ވިސާމް އެވެ. މި އިސްލާހުތައް ދިރާސާކުރުމަށް ބޭއްވި މުޅި މަޖިލީހުގެ ކޮމިޓީގައި އިސްލާހު ހުށަހެޅުއްވީ ހިތަދޫ މެދު ދާއިރާގެ މެމްބަރު އަހުމަދު ރަޝީދެވެ. އަހުމަދު ރަޝީދު ހުށަހެޅުއްވި އިސްލާހުގައި މި ދެ ޕޯޓަށް ގެންނަ މުދަލުގެ ތެރެއިން 50 އިންސައްތަ ކަނޑާލަން ގިނަ ޗެޕްޓަރުތަކެއް ހުށަހެޅުއްވިއެވެ. މިއިސްލާހު މުޅި މަޖިލީހުގެ ކޮމިޓީން ފާސްކޮށްފައިވަނީ ވޯޓުގައި ބައިވެރިވެ ވަޑައިގެންނެވި 54 މެމްބަރުންގެ ވޯޓުންނެވެ.
އަހުމަދު ރަޝީދު ހުށަހެޅުއްވި އިސްލާހުތަކުގެ ތެރޭގައި އުތުރާއި ދެކުނުގެ ބަނދަރުން ޑިއުޓީ ކަނޑާލާ ތަކެތީގެ ތެރޭގައި ކެއުން ބުއިމަށް ބޭނުން ކުރާ ތައްޔާރީ ތަކެތި ހިމެނެއެވެ. އަންނައުނު އުފައްދަން ބޭނުން ކުރާ ކަފަ، އުއި، ރޮދި، އަދި ބަރަންޏާއި ފޮތި ފަދަ ތަކެތި ވެސް މީގެތެރޭގައި ހިމެނެއެވެ.
އާންމު ބޭނުންތަކަށް ބޭނުން ކުރާ މުދަލުގެ ތެރެއިން ތަށިމުއްޓާއި ބަދިގެ ސާމާނާއި، ބިއްލޫރި އާއި، އައިސްއަލަމާރި، ފެން ފިލްޓާ ކުރުމަށް ބޭނުންވާ ސާމާނާއި، ގޮދަޑި، ބާލީސް، ތަންމަތި، ފާރުނީޗަރު، އިންވާޓާ އެއަރ ކޮންޑިޝަނާ އުލާއި ސަމުސަލާއި، ވަޅި ވެސް ހިމެނެއެވެ.
މުތާއި އަގުބޮޑު މައުދަނާއި ޖަވާހިރު އާއި ދަނގަޑާއި އެކަތަ އާއި ޓިނު އެލްމަނިއަމް އާއި އެލްމަނިއަމް އިން އުފައްދާ ތަކެތި ވެސް ހިމެނެއެވެ. ކާރު، ޖިޕް، ވޭން، އޮޓޯ ސައިކަލާއި، މޮޓޯ ސައިކަލް ފަދަ އެއްގަމު އުޅަނދު ފަހަރު ވެސް ބަނދަރުތައް ގެންދެވޭ މުދަލުން ޑިއުޓީ ކަނޑާލެވޭ މުދާތަކުގެ ތެރޭގައި ހިމެނެއެވެ. މިފަދަ ތަކެތީގެ އިންޖީނާއި އޭގެ ބައިތަކާއި، މެރިން އިންޖީނުތައް ވެސް ހިމެނެ އެވެ.
އައިނާއި، އޭގެ ބައިބައި، ހިތުގެ ވިންދު އުފެއްދުމަށް ބޭނުން ކުރާ ގެޖެޓްއާއި، މެޑިކަލް، ސާޖިކަލް، ޑެންޓަލް ފަދަ ސިއްހީ ވަސީލަތްތަކުގެ ސާމާނުތައް ވެސް ހިމެނެއެވެ. ނެޕީ އާއި ނާސިން ޕެޑް، ސެނިޓަރީ ޓަވަލާއި ޓެމްޕްޓޮންސް ވެސް 50 އިންސައްތަ ކަނޑާލަން ހުށަހަޅާފައިވާ ތަކެތީގެ ތެރޭގައި ހިމެނެއެވެ.
އަހުމަދު ރަޝީދު ވިދާޅުވީ މި އިސްލާހުގެ ސަބަބުން ރާއްޖޭގެ އުތުރުގެ ސަރަހައްދާއި ދެކުނުގެ ސަރަހައްދުގައި އިގްތިސޯދީ ހަރަކާތްތައް ފުޅާވެ ވަޒީފާގެ ފުރުސަތުތައް އިތުރުވެގެން ދާނެ ކަމަށް ގަބޫލު ކުރައްވާ ކަމަށެވެ.
