ކެލާގެ ކުނި މެނޭޖްކުރާ މަރުކަޒުގެ ނުނިމި ހުރި މަސައްކަތް ކުރުމަށް ބަޔަކާ ހަވާލުކޮށްފި

ހއ. ކެލާގައި ޤާއިމުކުރާ ކުނި މެނޭޖްކުރާ މަރުކަޒުގެ ނުނިމި ހުރި މަސައްކަތްތައް ކުރުމަށް ބަޔާކާ ހަވާލުކޮށްފިއެވެ.

މި މަސައްކަތް ހަވާލުކޮށްފައިވަނީ ބީލަން އުސޫލުން ހޮވިފައިވާ ފަރާތް ކަމުގައިވާ 'މަންގަނޑު' ކުންފުންޏާއެވެ. މި މަސައްކަތަކީ ހއ. ކެލާއަށް ދިމާވެފައިވާ ކުނީގެ މައްސަލައަށް ހައްލެއް ހޯދައިދިނުމުގެ ގޮތުން މިނިސްޓްރީ އޮފް އެންވަޔަރަންމަންޓްގެ ފަންނީ ލަފައާއިއެކު، ކުރިއަށްގެންދާ މަސައްކަތެކެވެ.

މި މަސައްކަތުގެ ޖުމްލަ އަގަކީ 496،502.50 (ހަތަރުލައްކަ ނުވަދިހަ ހަ ހާސް ފައްސަތޭކަ ދެ ރުފިޔާ ފަންސާސް ލާރި) އެވެ. މި މަސައްކަތަކީ ޕަބްލިކް ސަރވިސް އިންވެސްޓްމަންޓް ޕްރޮގްރާމް (ޕީއެސްއައިޕީ) އިން ޚަރަދުކޮށެގްން ކުރިއަށްގެންދާ މަސައްކަތެކެވެ. އަދި މި މަސައްކަތް ނިންމުމަށް ހަމަޖެހިފައިވަނީ 90 ދުވަހުންނެވެ.

ކެލާއަށް ދިމާވެފައިވާ ކުނީގެ މައްސަލަ ހައްލުކުރުމަށް މީގެ ކުރިން ބަޔަކާ ހަވާލު ކުރި ނަމަވެސް އެ މަސައްކަތް އެއްކޮށް ނިމިފައި ނުވާތީ، ކެލާ ކައުންސިލުން ވަނީ އެތައް ފަހަރެއްގެ މަތިން އެރަށު ކުނިގޮނޑުގައި ހުރި ކުނި ނަގާ ސާފްކުރުމުގެ މަސައްކަތް ކޮށްފައެވެ.

މީގެ ކުރިން ކެލާ ކުނި މެނޭޖްކުރުމުގެ މަރުކަޒު ހަދަން ހަވާލުކުރީ އަވޭވާ ކޮންސްޓްރަކްޝަންއާ 2017 ވަނަ ޑިސެމްބަރު މަހުގައެވެ. އަދި މަސައްކަތް ފަށައިފައިވަނީ 2018 ވަނަ އަހަރުގެ ސެޕްޓެމްބަރު މަހުއެވެ. ނަމަވެސް މަސައްކަތް ނިންމަން ހަވާލުވިކުރި ތާރީހަށް މަސައްކަތް ނުނިމިގެން އެއްބަސްވުން ފަހުން ވަނީ ބާތިލުކޮށްފައެވެ.