ކުއްލި މައްސަލައެއް ހުށަހެޅުމަށް މަޖިލީހުގައި ފުރަތަމަ ފަހަރަށް ގުރުއަތުލުމެއް ބާއްވައިފި
6 ޖުލައި 2020 | ހޯމަ 08:56ގުރުއަތު ނެގުނީ ތިނަދޫ ދެކުނު ދާއިރާގެ މެންބަރު އަހުމަދު ސަނީފާއި ނައިފަރު ދާއިރާގެ މެންބަރު އަހުމަދު ޝިޔާމްގެ މެދުގައި
އެއް ޖަލްސާއެއްގައި ދެ މެންބަރަކު ކުއްލި މައްސަލައެއް ހުށަހަޅުއްވަން ބޭނުންފުޅުވާތީ ހޯމަ ދުވަހުގެ ޖަލްސާގައި ނެގުނު ގުރުއަތުލުން
ކުއްލި މައްސަލައެއް ހުށަހެޅުއްވުމަށް ރައްޔިތުންގެ މަޖިލީހުގައި ފުރަތަމަ ފަހަރަށް ގުރުއަތުލުމެއް ބާއްވައިފިއެވެ.
މަޖިލީހުގެ ޖަލްސާއެއްގައި ދެ މެމްބަރަކު ކުއްލި މައްސަލައެއް ހުށަހަޅުއްވަން ބޭނުންފުޅުވާތީ ހޯމަ ދުވަހުގެ ޖަލްސާގައި ވަނީ ގުރުއަތެއް ނަގާފައެވެ. މި ގުރުއަތު ނެގުނީ ތިނަދޫ ދެކުނު ދާއިރާގެ މެންބަރު އަހުމަދު ސަނީފާއި ނައިފަރު ދާއިރާގެ މެންބަރު އަހުމަދު ޝިޔާމްގެ މެދުގައެވެ.
ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވީ، އެއް ޖަލްސާއެއްގައި ދެ މެންބަރަކު ކުއްލި މައްސަލަ ހުށަހަޅުއްވައިފިނަމަ، މަޖިލީހުގެ ގަވާއިދުގައިވާ ގޮތުން، އެ ދެ މެންބަރުންގެ މެދުގައި ގުރުއަތުލާން ޖެހެއެވެ. އަދި ގުރުއަތުން ހޮވޭ މެންބަރަކަށް މައްސަލަ ހުށަހެޅުމުގެ ފުރުސަތު ދޭން ޖެހެއެވެ.
ހޯމަ ދުވަހުގެ ޖަލްސާގައި ބަހުސް ކުރުމަށް ނިންމުނީ ނައިފަރު ދާއިރާގެ މެންބަރު ހުށަހެޅުއްވި މައްސަލައަށެވެ.
މެންބަރު ޝިޔާމް ކުއްލި މައްސަލައެއް ހުށަހަޅުއްވާފައިވަނީ ހިޔާ މަޝްރޫއުގެ ފްލެޓުތައް ލިބިފައިވާ ފަރާތްތަކަށް ވީ އެންމެ އަވަހަކަށް އެތަންތަން ހަވާލުކޮށް، ސަރުކާރުން ވެފައިވާ ބޯހިޔާވަހިކަމުގެ ވައުދު ފުއްދުން އަވަސް ކުރުމާއި ގުޅިގެންނެވެ.
